فوتو: parlam.kz
«بۇگىن ءبىزدىڭ كوز الدىمىزدا الەمدىك ءتارتىپ وزگەرىپ جاتىر. ءبىز ۇزاق جىلدار بويى تۇراقتىلىق پەن بولجامدىلىقتى قامتاماسىز ەتكەن حالىقارالىق قۇقىق نورمالارىنىڭ السىرەپ جاتقانىن كورىپ وتىرمىز. الەم كۇننەن كۇنگە تىنىشسىز جانە بولجاۋعا كەلمەيتىن بولىپ بارادى», دەدى ول.
مارات باشيموۆتىڭ سوزىنشە, سىرتقى تۇراقتىلىق مىقتى ىشكى نەگىزسىز مۇمكىن ەمەس, سوندىقتان قازاقستاندا كونستيتۋتسيالىق ورنىقتىلىقتى قامتاماسىز ەتۋ ەرەكشە مانگە يە بولىپ كەلەدى.
ماڭىزدى قادامداردىڭ ءبىرى رەتىندە ول ءبىر پالاتالى پارلامەنتكە كوشۋ دەپ كورسەتتى, بۇل جوعارى وكىلدى ورگاننىڭ جۇمىس تيىمدىلىگىن ارتتىرادى دەپ كۇتىلىپ وتىر. بۇدان باسقا دەپۋتات شەتەلدىك زاڭدى تۇلعالاردىڭ, شەتەلدىكتەردىڭ جانە ازاماتتىعى جوق ادامداردىڭ, شەت مەملەكەتتەر مەن حالىقارالىق ۇيىمداردىڭ, سونداي-اق شەتەلدىك قاتىسۋى بار وتاندىق زاڭدى تۇلعالاردىڭ ساياسي پارتيالاردى قارجىلاندىرۋىنا جول بەرمەۋ ماڭىزدى ەكەنىن اتاپ ءوتتى.
«2026 جىلعى كونستيتۋتسيالىق رەفورما ادامنىڭ ماڭىزدى ەكەنىن, مەملەكەتتىك ساياساتتىڭ ورتاسىندا ناقتى ادام, ونىڭ قۇقىقتارى, بوستاندىقتارى مەن قادىر-قاسيەتى تۇراتىن باعىتتى جالعاستىرادى. قۇقىقتار مەن بوستاندىقتار ادامعا تۋا بەرىلەدى, ولار مەملەكەت تاراپىنان بەرىلمەيدى. رەفورمانىڭ نەگىزگى ماقساتى – ازاماتتاردىڭ كونستيتۋتسيالىق قۇقىقتارىن ناقتى قورعاۋدى قامتاماسىز ەتۋ جانە مەملەكەتتىك باسقارۋ ساپاسىن ارتتىرۋ», دەپ قوستى مارات باشيموۆ.
رەفورمانىڭ نەگىزگى باعدارلارىن اتاپ وتەردە, ول ۇلتتىق قۇرىلتايدا پرەزيدەنت جاريالاعان جالپىۇلتتىق قۇندىلىقتاردى اتاپ ءوتتى: تاۋەلسىزدىك پەن پاتريوتيزم, بىرلىك پەن ىنتىماقتاستىق, ادىلەتتىلىك پەن جاۋاپكەرشىلىك, زاڭ مەن ءتارتىپ, ەڭبەكقورلىق, كاسىبيلىك, جاڭاشىلدىق پەن شىعارماشىلىق.
مارات باشيموۆتىڭ پىكىرىنشە, كونستيتۋتسيالىق رەفورما قازاقستاننىڭ پروگرەسسيۆتى دامۋىنا جاعداي تۋعىزادى, مەملەكەت پەن قوعام اراسىنداعى سەنىمدى نىعايتادى, سونداي-اق ازاماتتاردىڭ كونستيتۋتسيالىق قۇقىقتارىن ءتيىمدى قورعاۋعا مۇمكىندىك بەرەدى.
