فوتو: كونستيتۋتسيالىق سوت
«وسىنداي شەشۋشى ساتتە بىزگە اسا ماڭىزدى ميسسيا جۇكتەلدى. بۇل – ۇلكەن جاۋاپكەرشىلىك. بۇگىن وسى زالعا ءتۇرلى سالانىڭ كاسىبي ماماندارى, تاجىريبەسى مول, ەلگە بەلگىلى ازاماتتار جينالعان. ءبارىمىزدىڭ ماقسات-مىندەتىمىز – ورتاق.
سوندىقتان, وسى ايرىقشا مىندەتتى ابىرويمەن اتقارىپ شىعامىز دەپ سەنەمىن», دەدى ە.قارين.
بۇدان سوڭ, ەرلان قارين پارلامەنتتىك رەفورما جونىندەگى جۇمىس توبىنىڭ اتقارعان ىسىنە توقتالدى.
«بۇگىن جۇمىسىن باستاعالى وتىرعان كونستيتۋتسيالىق كوميسسيا – وسىعان دەيىن جارتى جىل بويى جۇمىس ىستەگەن پارلامەنتتىك رەفورما جونىندەگى جۇمىس توبىنىڭ زاڭدى جالعاسى, دەدى ول.
ە.قارين وتكەن جىلدىڭ 8 قىركۇيەگىندە مەملەكەت باسشىسى جولداۋىندا ءبىر پالاتالى پارلامەنتكە كوشۋ تۋرالى باستاما كوتەرگەنىن تىلگە تيەك ەتىپ, مۇنى ەل ازاماتتارىنىڭ كوپشىلىگى قولداعانىن اتاپ ءوتتى.
«قازان ايىندا قازاقستاننىڭ ستراتەگيالىق زەرتتەۋلەر ينستيتۋتى جۇرگىزگەن زەرتتەۋگە سۇيەنسەك, رەسپوندەنتتەردىڭ 70 پايىزعا جۋىعى وسى يدەياعا قولداۋ بىلدىرگەن. ءبىر ايدان كەيىن 8 قازاندا پرەزيدەنت وكىمىمەن پارلامەنتتىك رەفورما جونىندەگى جۇمىس توبى قۇرىلدى.
ونىڭ قۇرامىنا پارلامەنتتەگى ساياسي پارتيا فراكتسيالارىنىڭ جەتەكشىلەرى, بەلگىلى زاڭگەر-عالىمدار, ساراپشىلار مەن قوعام بەلسەندىلەرى, ۇلتتىق قۇرىلتاي مۇشەلەرى ەندى.
14 قازان كۇنى جۇمىس توبىنىڭ العاشقى وتىرىسى ءوتتى. وعان پرەزيدەنت ارنايى قاتىستى. سول وتىرىستا جۇمىس توبىنىڭ مۇشەلەرى اۋقىمدى وزگەرىستەر كونستيتۋتسيانىڭ بىرنەشە ءبولىمىن قامتيتىنىنا نازار اۋداردى. مۇنداي اۋقىمدى تۇزەتۋلەر كەزىندە ازاماتتاردىڭ دا پىكىرى ەسكەرىلۋگە ءتيىس», دەدى ول.
ونىڭ ايتۋىنشا, سول سەبەپتى 14 قازاندا ازاماتتاردىڭ ۇسىنىس-پىكىرىن جيناقتاۋ ءۇشىن e-Otinish جانە eGov پورتالدارىندا «پارلامەنتتىك رەفورما» دەگەن ارنايى ءبولىم اشىلدى. پارلامەنتاريزم ينستيتۋتى كەلىپ تۇسكەن ۇسىنىستاردى جيناقتاپ, جۇيەلەۋمەن اينالىسقان.
سونىمەن قاتار بۇل ىسكە زاڭناما جانە قۇقىقتىق اقپارات ينستيتۋتى, ستراتەگيالىق زەرتتەۋلەر ينستيتۋتى تارتىلعان. بۇل قۇرىلىمدار پارلامەنتاريزمگە قاتىستى حالىقارالىق تاجريبەنى ءبىر اي بويى مۇقيات زەردەلەگەن.
«وسىلايشا, جۇمىس توبىنىڭ مۇشەلەرىنە بارلىق اقپارات پەن تالداۋ ناتيجەلەرى ۇسىنىلدى. قازان ايىنان بەرى پارلامەنتتىك رەفورماعا قاتىستى ۇسىنىستار تۇگەل جيناقتالدى. سونىڭ ىشىندە جۇمىس توبىنىڭ مۇشەلەرىنە الداعى رەفورماعا قاتىستى ءوز ۇسىنىس-پىكىرلەرىن ازىرلەۋگە ءبىر اي ۋاقىت بەرىلدى.
جۇمىس توبىنىڭ مۇشەلەرىمەن قاتار, Amanat, اۋىل, Respublica, اق جول, قازاقستان حالىق پارتياسى, جالپىۇلتتىق سوتسيال-دەموكراتيالىق پارتياسى وزدەرىنىڭ وي-پىكىرىن دايىنداپ, جولدادى», دەدى ەرلان قارين.
ەسكە سالايىق, ەلوردادا كونستيتۋتسيالىق رەفورما جونىندەگى كوميسسيانىڭ العاشقى وتىرىسى ءوتىپ جاتىر.
