سۋرەت: infonews.kz
بۇعان دەيىن اۋىلداعى ەكى پاتەرلى تۇرعىن ءۇيدىڭ بەيىمدەلگەن تار بولمەسىن پانالاپ كەلگەن مەديتسينالىق پۋنكت ەندى ەڭسەلى عيماراتقا كوشتى. جاڭا نىساننىڭ جالپى اۋماعى – 196,4 شارشى مەتر. بۇل – مەديتسينا قىزمەتكەرلەرىنىڭ الاڭسىز جۇمىس ىستەۋىنە, اۋىل تۇرعىندارىنىڭ ساپالى ەم قابىلداۋىنا جاسالعان قولايلى جاعداي.
جاڭا عيمارات ماتەريالدىق-تەحنيكالىق جاعىنان تولىق قامتاماسىز ەتىلگەن. پروتسەدۋرالىق كابينەت سوڭعى ۇلگىدەگى قۇرىلعىلارمەن جابدىقتالعان. اتاپ ايتقاندا, وكپەنىڭ تىنىس الۋ فۋنكتسياسىن تەكسەرەتىن سپيرومەتر, جۇرەك قىزمەتىن باقىلايتىن كارديوگراف, تىنىس جولدارى مەن قۇلاق اۋرۋلارىن ەمدەۋگە ارنالعان كۆارتس شامدارى ورناتىلعان. سونىمەن قاتار ناۋقاستار قاجەتتىلىگىنە قاراي ماگنيت ورىسىمەن ەمدەۋ, نەبۋلايزەر اپپاراتى ارقىلى ينگالياتسيالىق شارالار جۇرگىزىلەدى.
قازىر يۆانوۆكا اۋىلىندا تۇراقتى قىزمەت ەتەتىن ءبىر مەدبيكە 500-دەن استام تۇرعىنعا, ونىڭ ىشىندە 14 جاسقا دەيىنگى 114 بالاعا العاشقى مەديتسينالىق كومەك كورسەتەدى. ال دارىگەر ارنايى كەستەگە ساي, التاي اۋىلىنداعى امبۋلاتوريادان اپتاسىنا ءبىر رەت كەلىپ, قابىلداۋ جۇرگىزەدى.
وبلىستىق دەنساۋلىق ساقتاۋ باسقارماسىنىڭ مالىمەتىنشە, بۇل نىسان – اۋىلدىق جەردەگى مەديتسينا ساپاسىن ارتتىرۋعا باعىتتالعان اۋقىمدى جۇمىستىڭ ءبىر پاراسى عانا. جالپى, 2024–2025 جىلدارى وڭىردە اتالعان باعدارلاما اياسىندا 30 جاڭا مەديتسينالىق نىسان سالىنعان. قۇرىلىس جۇمىستارىنا بيۋدجەتتەن 4 ملرد 800 ملن تەڭگە قاراجات جۇمسالعان. ناتيجەسىندە, وبلىس بويىنشا 2 دارىگەرلىك امبۋلاتوريا, 5 فەلدشەرلىك-اكۋشەرلىك پۋنكت, 23 مەديتسينالىق پۋنكت پايدالانۋعا بەرىلدى. وسى يگى ءىستىڭ يگىلىگىمەن اۋىلدىق جەردەگى 15 مىڭنان استام تۇرعىن ساپالى مەديتسينالىق قىزمەتپەن قامتىلىپ وتىر.
پاۆلودار وبلىسى
