ەسىمدەرى اتالعان مىقتىلاردىڭ ەكەۋى دە قازىر ۇلكەن سپورتتا جوق. سوچي وليمپياداسىندا قولا الىپ, الەم چەمپيوناتىندا ەكى رەت جەڭىس تۇعىرىنا كوتەرىلگەن دەنيس 2018 جىلدىڭ جازىندا, جارقىلداپ تۇرعان 25 جاسىندا الماتىنىڭ قاق ورتاسىندا قاراقشىلار قولىنان قازا تاپتى. ەليزابەت 2019 جىلى سايتامادا ۇيىمداستىرىلعان دۇنيەجۇزىلىك دودادا كۇمىس مەدالدى موينىندا جارقىراتتى. سول جىلى دۇنيەجۇزىلىك ۋنيۆەرسيادا مەن ء«تورت قۇرلىق بىرىنشىلىگىندە» دە ەكىنشى ورىندى يەلەندى. بىراق ارادا ەكى جىل وتكەن سوڭ, ەسكى جاراقاتتارىنان ايىعا الماعان 21 جاستاعى اسا دارىندى ەليزابەت قالىڭ جۇرتتىڭ الدىندا ءوزىنىڭ سپورتتىق مانسابىن اياقتايتىنىن جاريا ەتتى.
سودان كەيىن ميحايل شايدوروۆتىڭ ءداۋىرى باستالدى. 2004 جىلدىڭ جازىندا الماتىدا دۇنيەگە كەلگەن جاس ورەن بىردەن دارا تالانتىمەن تانىلدى. العاشىندا اكەسى ستانيسلاۆ شايدوروۆتىڭ, ودان كەيىن رەسەيلىك الەكسەي ۋرمانوۆتىڭ قول استىندا جاتتىققان جاستىڭ شەبەرلىگى ۋاقىت وزعان سايىن شىڭدالا ءتۇستى. 2022 جىلى ميشا تالليندە وتكەن جاستار اراسىنداعى الەم بىرىنشىلىگىندە كۇمىس مەدال يەلەنىپ, كوپشىلىك نازارىن وزىنە اۋداردى. بالتىق جاعالاۋىندا جەرلەسىمىز امەريكالىق يليا مالينيننەن عانا قالىپ قويدى. بۇل تاريحي ءسات ەدى. ولاي دەۋگە نەگىز, وعان دەيىن ەلىمىزدىڭ بىردە-ءبىر مانەرلەپ سىرعاناۋشىسى جاستاردىڭ الەمدىك دوداسىندا جۇلدە العان ەمەس. ءتىپتى ماقتاۋلى تەن مەن تۇرسىنباەۆالاردىڭ ءوزى كەزىندە ءتورتىنشى ورىندى قاناعات تۇتتى.
كوپ ۇزاماي كەيىپكەرىمىز ەرەسەكتەر اراسىنداعى باسەكەلەردە ونەر كورسەتە باستادى. بۇل سايىستاردا دا شايدوروۆتىڭ جۇلدىزى جارقىراي جاندى. قاتارىنان بەس رەت ەل چەمپيونى اتانعان سايىپقىران حالىقارالىق جارىستاردان دا ولجالى ورالدى. الماتىلىق ورەنگە اسىرەسە وتكەن جىل اسا تابىستى بولدى. سەۋلدەگى ء«تورت قۇرلىق بىرىنشىلىگىندە» الدىنا جان سالماسا, حاربيندەگى ازيا چەمپيوناتىندا قولاعا قول سوزدى. بوستوندا جالاۋى جەلبىرگەن الەم چەمپيوناتىندا كۇللى قازاق جانكۇيەرلەرى ميحايلگە ءدان ريزا بولدى. نەبىر كۇردەلى ەلەمەنتتەردى ءساتتى ورىنداپ, شەبەرلىكتىڭ شىنايى ۇلگىسىن كورسەتكەن وتانداسىمىز كۇمىس مەدال ەنشىلەدى. بۇل جولى دا ونىڭ الدىن يليا مالينين وراپ كەتتى.
21 جاستاعى ميحايل شايدوروۆ قازىر ناعىز بابىندا. كەيىنگى كەزدەرى وتكەن جارىستاردا ونىڭ ۇنەمى جەڭىس تۇعىرىنان كورىنۋى – وسى ءسوزىمىزدىڭ ايقىن دالەلى. ەندىگى ماقساتى – اپەننين تۇبەگىندە الاۋى تۇتاناتىن وليمپيا ويىندارىندا اتوي سالۋ. ول ماقساتىنا قول جەتكىزۋگە ەلىمىزدىڭ اتاقتى مانەرلەپ سىرعاناۋشىسىنىڭ بارلىق مۇمكىندىگى بار. باسقالاي ايتقاندا, بۇل جىگىتتىڭ ءجونى بولەك, وليمپيادا التىنىنان ءۇمىتتىمىز.
