قاي كەزەڭدە بولسىن كينو يدەولوگياعا قىزمەت ەتىپ كەلەدى. سوندىقتان دا كەڭەستىك كەزەڭ رەجيسسەرلەرى كوركەم تۋىندىلارىندا كورەرمەننىڭ كوڭىل كۇيى مەن ويىنا اسەر ەتىپ, قىزىل كوز كوممۋنيستىك يدەيانى بۇقارا ساناسىنا سىڭىرۋگە تىرىستى. بۇعان قول جەتكىزۋ ماقساتىندا سول تۇستاعى جۇيە قارجىنى دا اياعان جوق.
كوركەم فيلمدەردىڭ ءار ءسوزى ەلەكتەن ءوتىپ, قوعامدىق كوزقاراسقا كولدەنەڭ قيعاش ويلار قيىلىپ قالاتىن, كورەرمەنگە كۇندەلىكتى كۇيبەڭدى ۇمىتتىرىپ, قىزىل جالاۋلى يدەولوگيانى ناسيحاتتايتىن سونداي زاماندا شاكەن ايمانوۆ ۇلتتىڭ جانايقايىن جالقى سوزگە سىيدىرىپ جىبەرىپتى. كوپشىلىك بايقاي قويماعان سول ءساتتى قاپەرىڭىزگە سالىپ, ەسىڭىزگە ءتۇسىرىپ كورەيىك.
قىستى كۇنى تاقيالى پەرىشتەسىنە قالىڭدىق ىزدەگەن تانا اجەي كوشەدە كەلە جاتىپ, لەنا اتتى كونكيشى قىزبەن كەزىگەتىن ءساتى بار ەمەس پە؟ ادەتتەگىدەي «كۇيەۋگە تيگىڭ كەلە مە؟» دەگەن سۇراعىن قويادى. كونكيشى قىز اسىعىس ەكەنىن ايتىپ, تاۋداعى جارىسقا شاقىرادى. تانا اجەي ونىڭ سوڭىنان «اينالايىن, توقتاي تۇرشى», دەپ قالبالاقتاپ جۇگىرە جونەلەدى. تايلاقتىڭ شەشەسى لەنا مىنگەن قوعامدىق كولىككە سىيماي, كەلەسى اۆتوبۋسپەن مەدەۋگە جولعا شىعادى.
وسى ساتتەگى كادرلاردان نەنى كورەمىز؟ تاۋعا اپاراتىن جول كورىنىسى. الماتىنىڭ اسەم تابيعاتى كوزدى اربايدى. حالىقارالىق جارىس وتەتىنىنەن حابار بەرىپ, تۋلار جەلبىرەپ تۇر. مۇز ايدىنىندا جان سالا جارىسىپ, سىرعاناپ بارا جاتقان جاستار مەن ولاردىڭ ونەرىنە جانكۇيەرلىك تانىتىپ شۋلاپ جاتقان كوپشىلىك.
رەجيسسەر وسىنداي سانسىز كادر كەزەكتەسە الماسقان تۇستا كۇننىڭ سۋىقتىعىنان مۇزداپ, قالتاداعى شاقپاعىن جاقپاي ەرنىنە قىستىرعان تەمەكىنى ەكىنشىسىنىڭ اۋزىنداعى تەمەكىمەن تۇتاتىپ تۇرعان كوزىلدىرىكتى شەتەلدىكتەرگە بۇرا قويادى. ياعني شاكەن ايمانوۆ كوپشىلىك ساحناداعى ەرىندە قىستىرعان شىلىمدى اۋىزداعى تەمەكىمەن تۇتاتقان ازاماتتاردىڭ ارەكەتىنەن كۇلكى تۋدىرىپ, مۇنىڭ سىرتىنا جانكۇيەرلەردىڭ شۋىن قوسىپ, كوكەيىندەگى ءسوزدى ايتۋعا ىڭعايلانعانىن كورەمىز. سوندا نە ايتتى دەرسىز؟ ەگدە جاستاعى شەتەلدىك باسىن شايقاپ كۇلە وتىرىپ: «ورىس قىسى سۋىق ەكەن؟» دەپ تومارداي ەتىپ, توسىن ويدى ورتاعا تاستاپ كەپ جىبەرەدى. وعان ىلە ەكىنشىسى «قازاقتىڭ قىسى» دەڭىز دەپ جاۋاپ بەرىپ, ميلليونداردىڭ كوكەيىندەگى ءسوزدى ساۋىردان ۇرعان قامشىداي سارت ەتكىزەدى. ال قولىن ىسقىلاپ جاۋراعان شەتەلدىك: «و, ءيا, ءيا! قازاقتىڭ قىسى» دەپ الگىنىڭ ۋاجىنە باس شۇلعي كەلىسىپ, قارقىلداپ كۇلەدى.
كەڭەس وداعى تۇسىندا جەكە رەسپۋبليكا بولعانىمىزبەن, ەلىمىز دە, جەرىمىز دە قازاقتىكى ەمەس ەدى. جەر مەن ەلدى «قازاقتىكى» دەپ مەنشىكتەپ ايتۋعا قايتپاس قايسار سوم جۇرەك كەرەك بولاتىن. ونداي جۇرەك شاكەندەي رەجيسسەردە بار ەكەن. ءبىر قىزىعى, ايمانوۆ بۇل جەردە «ايتارىن اشىپ ايتقان ابايلاماي, داريعا-اي, ماحامبەتتەر, ابايلار-اي» دەگەندەي, الگى «سويقان سوزدەردى» ابايلاماي ايتىپ وتىرعان جوق. وسى ءسوزدى ايتۋ ءۇشىن باسىن قاتەرگە تىگىپ, تاۋەكەل ەتكەنىن بايقايسىز. جالقى اۋىز شىندىقتى تارازىعا سالىپ ولشەپ-ءپىشىپ, مايدان قىل سۋىرعانداي تسەنزۋراعا ىلىكتىرمەي وتكىزۋ – شىنىندا دا ەرلىك.
مۇنداي اقيقات ايتىلعاننان كەيىن تانا اجەي قاسىندا وتىرعان ەتجەڭدى ازاماتتىڭ قولىنداعى شارابىن ج ۇلىپ الىپ, قىلعىتا سالاتىن ءسات باستالىپ كەتەدى. ىلە «ماسساعان, اپاي كونياكتى سىلتەپ وتىر, سۋ ىشكەن قۇرلى كورمەيدى» دەگەن جارق-جارق ەتكەن داۋىس شىعادى.
كونكيشى ورىس قىزى لەنا, مانەرلەپ سىرعاناۋدان ءوتىپ جاتقان حالىقارالىق جارىس, مەدەۋ مۇز ايدىنىنىڭ كوركەم كورىنىسى... ءبارى-ءبارى تەك «قازاقتىڭ قىسى» دەگەن نارقى قورعاسىننان دا اۋىر ءسوزدى استارلاپ جەتكىزۋگە وراي تۋعىزعان.
الەمدىك كينونىڭ دەنى قوعامداعى وزەكتى ماسەلەلەردى تالقىلاۋعا شىعارىپ, پىكىرتالاس تۋعىزىپ, قوعامدىق پىكىرگە اسەر ەتەتىنىن جاقسى بىلەمىز. ءدال وسى ۇستانىممەن «تاقيالى پەرىشتەنىڭ» رەجيسسەرى دە بۇل جەردىڭ كىمدىكى ەكەنىن قوعامدىق تالقىعا ۇسىنعانداي كورىنەدى.
قوش! جارىق كورگەنىنە 57 جىلدان اسقان «تاقيالى پەرىشتە» ءالى دە كورەرمەنىن جالىقتىرعان جوق. ونىڭ باستى ءبىر سەبەبى, كينو استارىنداعى يگى يدەولوگيانىڭ ماڭگىلىكتىگىنەن دە بولار دەپ ويلايمىز. رەجيسسەردىڭ «قازاقتىڭ قىسى» دەگەن جالعىز ءسوزدى جەر-جاھانعا جار سالۋعا جانتالاسقان ەڭبەگى وسى ءبىر تۋىندىنىڭ عۇمىرىن ۇزاق ەتىپ تۇرعان جوق پا ەكەن؟ ءسىز قالاي ويلايسىز؟
