كوپشىلىككە ءمالىم بولعانىنداي, بيىل جىل باسىندا قالاداعى 200-دەن استام مەكتەپ Kundelik.kz پلاتفورماسىنان جاڭا BilimClass جۇيەسىنە كوشە باستادى. بۇل جاعداي اتا-انالار مەن پەداگوگتەردىڭ الاڭداۋشىلىعىن تۋعىزعانى بەلگىلى. پلاتفورما اتا-انالار مەن مۇعالىمدەرگە رەسمي حابارلاما بەرىلمەستەن اۋىستىرىلعان. سالدارى دەربەس دەرەكتەردىڭ ساقتالۋى, زاڭناماعا سايكەستىك جانە ءبىلىم بەرۋ ءۇردىسىنىڭ سەنىمسىزدىگىنە ۇلاستى.
وسى جايتقا قاتىستى قالالىق ءبىلىم باسقارماسى جاۋاپ بەرىپ, مەسسەندجەرلەر مەن الەۋمەتتىك جەلىلەردە وقۋشىلاردىڭ جەكە دەرەكتەرىنىڭ تارالعانى جالعان ەكەنى, مالىمەتتەردىڭ شىندىقپەن جاناسپايتىندىعى تۋرالى ايتتى.
ءباسپاسوز ءماسليحاتىندا مۇحتار ءىلياسوۆ وقۋشىلار دەرەكتەرىنىڭ تارالۋى جالعان اقپارات ەكەنىن راستادى. ايتۋىنشا, پلاتفورمادا پايدالانىلاتىن بارلىق دەرەكتەر استانادا داتا ورتالىقتا ورنالاسقان. ترانسشەكارالىق دەرەكتەردىڭ تارالۋى مۇمكىن ەمەس. ياعني, مەكتەپ وقۋشىلارىنىڭ جەكە دەرەكتەرى تولىعىمەن ەل اۋماعىندا ساقتالادى. رەسەيلىك ازىرلەۋشىلەر مەن قۇرىلتايشىلار ءۇشىن قولجەتىمسىز. مۇنىمەن قوسا Kundelik.kz پلاتفورماسى رەسەيدە قولدانىلاتىن نۇسقادان ايتارلىقتاي ەرەكشەلەنەدى. ينتەرنەتكە قوسىلۋ, باسقا دا فۋنكتسيالار بويىنشا ءبىر شليۋز ارقىلى جۇمىس ىستەيتىن كومپانيا ءۇش-التى اي سايىن تەكسەرىستەن ءوتىپ وتىرادى.
«Kundelik» جۇيەسىنە تىركەلگەن وقۋشىلاردىڭ دەرەكتەرى راسىمەن تاراپ كەتتى مە؟
مۇحتار ءىلياسوۆ سونىمەن قاتار اتالعان پلاتفورما قولدانىسقا ەنبەستەن بۇرىن ەكى جىلعا جۋىق تەكسەرۋدەن, مەملەكەتتىك-جەكەمەنشىك ارىپتەستىك پروتسەدۋرالارىنان وتكەندىگىن اتاپ ءوتتى. الاڭداتىپ وتىرعان جاعداي پلاتفورما وكىلدەرى, قالا ءبىلىم باسقارماسى تاراپىنان رەسمي سۇرانىستار مەن تۇسىندىرمەلەردىڭ بولماعاندىعىمەن بايلانىستى. ءبىزدىڭ ويىمىزشا, بۇل مۇلدەم زاڭسىز, سەبەبى الماتى قالاسىنىڭ ءبىلىم باسقارماسى مەن بالامالى جۇيە اراسىندا زاڭدى كۇشىنە ەنەتىن قۇجاتتار جوق.
كاسىپكەر جەلتوقساننىڭ 17-ءسى كۇنى الماتى قالالىق ءبىلىم باسقارماسىنىڭ باسشىلىعىمەن سويلەسكەن. كەزدەسۋدە شەشىمىن تابۋ قاجەتتى ماسەلەلەر ايتىلىپ, وڭ ناتيجەمەن اياقتالعان. ال ازىرگە ءبىلىم باسقارماسى ديالوگقا شىقپاعان.
قوستاناي وبلىسىنداعى مەكتەپتەر «Kundelik» جۇيەسىنەن باس تارتتى
مۇحتار ءىلياسوۆتىڭ ايتۋىنشا, Kundelik.kz كومپانياسىمەن جاسالعان مەملەكەتتىك-جەكەمەنشىك ارىپتەستىك كەلىسىمى 2030 جىلعا دەيىن سوزىلىپ, 16 وبلىستاعى 5190 مەملەكەتتىك مەكتەپتى قامتۋى ءتيىس ەدى. قازىرگى كەزدە كومپانيا توعىز ايماقتا – ءۇش مەگاپوليس پەن التى وبلىستا جۇمىس ىستەپ جاتىر. كومپانيا باسشىسى فۋنكتسيونالدىعى جاقسى جولعا قويىلعان ەكى ەلەكتروندى كۇندەلىك پلاتفورماسىنىڭ قاتار جۇمىس ىستەۋىنە قارسى ەمەس. بىراق بارلىق ءىس-ارەكەتتەردىڭ زاڭ اياسىندا, قۇقىقتىق قۇجاتتار نەگىزىندە ىسكە اسقانى قاجەت.
الماتى
