فەستيۆالدە قازاقستان اتىنان شامامەن 68 ونەرپاز ونەر كورسەتتى. ولاردىڭ قاتارىندا ماەسترو ابزال ءمۇحيتديننىڭ جەتەكشىلىگىندەگى استانا قالاسىنداعى ەركەعالي راحماديەۆ اتىنداعى مەملەكەتتىك اكادەميالىق فيلارمونيا, «گاككۋ» بالەت بي ءانسامبلى, سونداي-اق عازيزا جۇبانوۆا اتىنداعى اقتوبە وبلىستىق فيلارمونياسىنىڭ قازاق كامەرالىق حورى بار. ءار ۇجىم ۇلتتىق مۋزىكالىق-بي مۇراسىن زاماناۋي ساحنالىق شەشىمدەرمەن ۇشتاستىرىپ, كورەرمەنگە اسەرلى باعدارلاما ۇسىندى.
ءىس-شارانىڭ ەڭ ايرىقشا تۇستارىنىڭ ءبىرى – قازاقستان ونەر ۇجىمدارىنىڭ ۇندىستاندىق كورنەكتى مۋزىكانتتارمەن بىرلەسكەن كونتسەرتتىك قويىلىمدارى بولدى. اتاپ ايتقاندا, الەمگە تانىمال سكريپكاشى دوكتور ل. سۋبرامانيام جانە ايگىلى ۆوكاليست كاۆيتا كريشنامۋرتيمەن بىرگە ونەر كورسەتۋى ەكى ەلدىڭ مۋزىكالىق داستۇرلەرى اراسىنداعى ۇندەستىكتى, ورتاق رۋحاني قۇندىلىقتاردى ايقىن كورسەتتى. بۇل بىرلەسكەن قويىلىمدار ۇلتتىق مەكتەپتەردىڭ ءوزارا ىقپالداسۋىنىڭ مۇمكىندىكتەرىن اشىپ, مادەني ديالوگتىڭ جاڭا قىرىن ۇسىندى.
كونتسەرتكە ءۇندىستاندا تۇرىپ جاتقان قازاقستان ازاماتتارى, قازاقستان رەسپۋبليكاسىنىڭ ۇندىستانداعى ەلشىلىگىنىڭ قىزمەتكەرلەرى, سونداي-اق ءۇندى جوعارى وقۋ ورىندارىندا ءبىلىم الىپ جۇرگەن قازاقستان ستۋدەنتتەرى قاتىستى. كورەرمەن اراسىندا قالىپتاسقان بىرلىك پەن ۇلتتىق ماقتانىش اتموسفەراسى قازاق ونەرىنىڭ شەتەلدەگى ىقپالىن ايقىن سەزدىردى.
اتالعان مادەني جوبا – قازاق-ءۇندى مادەني ديپلوماتياسىنىڭ جارقىن ۇلگىسى. ول حالىقتار اراسىنداعى ءوزارا تۇسىنىستىكتى نىعايتىپ قانا قويماي, قازاقستاننىڭ حالىقارالىق مادەني بەدەلىن ارتتىرۋعا دا ەلەۋلى ۇلەس قوستى. فەستيۆال اياسىنداعى ونەر كورسەتۋلەر قازاقستاننىڭ باي مۋزىكالىق مۇراسىن جاھاندىق مادەني كەڭىستىككە تانىتۋعا, شىعارماشىلىق ارىپتەستىكتى كەڭەيتۋگە مۇمكىندىك بەردى.
ءبىزدىڭ ونەرپازداردىڭ گاسترولدىك ساپارى مۇنىمەن شەكتەلمەيدى. الداعى كۇندەرى ولار ءۇندىستاننىڭ كالكۋتتا, چەنناي جانە بانگالور قالالارىندا كونتسەرتتىك باعدارلامالار ۇسىنۋدى جوسپارلاپ وتىر. بۇل ساپارلار قازاق ونەرىنىڭ گەوگرافياسىن كەڭەيتىپ, مادەني بايلانىستاردى تەرەڭدەتۋگە باعىتتالعان ماڭىزدى قادام بولماق.
