پرەزيدەنتتىككە ۇمىتكەرلەردىڭ سانى كۇرت كەمىدى

استانا. 24 ناۋرىز. ورتالىق سايلاۋ كوميسسياسى بىرنەشە ۇمىتكەردى تىركەۋدەن باس تارتتى. بۇل تۋرالى «حابار» تەلەارناسى حابارلادى. كوميسسيانىڭ 24 ناۋرىزداعى وتىرىسىندا ياكوبجان جۇنىسبەكوۆتى, قايرات الەمباي ۇلى مايشەۆتى, ايگۇل دۇيسەنقىزى وتەپوۆا مەن امانتاي حانتەمىر ۇلى اسىلبەكتى پرەزيدەنتتىككە كانديداتتار رەتىندە تىركەۋدەن باس تارتۋ تۋرالى قاۋلىلارىن قابىلدادى. بۇل شەشىم اتالعان كانديداتتار لينگۆيستيكالىق كوميسسيانىڭ وتىرىستارىنا كەلمەگەندىكتەن, ولاردىڭ كونستيتۋتسيا مەن «قازاقستان رەسپۋبليكاسىنداعى سايلاۋ تۋرالى» كونستيتۋتسيالىق زاڭنىڭ كانديداتتارعا قويىلاتىن تالاپتارىنىڭ مەملەكەتتىك ءتىلدى ەركىن مەڭگەرگەندىگىن انىقتاۋ بولىگىندە سايكەستىگىنىڭ بەلگىلەنبەۋىنە بايلانىستى تۋىندادى. سونداي-اق, ورتالىق سايلاۋ كوميسسياسى قانات سابىر ۇلى ەسجانوۆ پەن ءبىرجان جەتىرۋ ۇلى دىلماعامبەتتى بۇلاردىڭ مەملەكەتتىك ءتىلدى ەركىن مەڭگەرگەندىگىن انىقتاۋ راسىمىنەن وتۋدەن باس تارتۋلارىنا بايلانىستى كانديدات رەتىندە تىركەۋدەن باس تارتتى. سونىمەن قاتار كوميسسيا حاتشىسى باقىت مەلدەشوۆ مۇحامەدراحيم قادىرباي ۇلى قۇرساباەۆتان, مەلس حامزا ۇلى ەلەۋسىزوۆ پەن جاقسىباي ءابىش ۇلى بازىلباەۆتان ءوز كانديداتۋرالارىن الىپ تاستاۋ تۋرالى جازباشا وتىنىشتەرىن قابىلداپ, ارنايى شەشىم شىعاردى. ورتالىق سايلاۋ كوميسسياسىنىڭ حاتشىسى باقىت مەلدەشەۆ: «ءۇش ۇمىتكەر مۇحامەدراحيم قابىرباي ۇلى قۇرساباەۆ, مەلس حامزا ۇلى ەلەۋسىزوۆ جانە جاقسىباي ءابىش ۇلى بازىلباەۆ ورتالىق سايلاۋ كوميسسياسىنا جازباشا ءوتىنىش بەرىپ, ءوز كانديداتۋرالارىن الىپ تاستادى. سول سەبەپتەن بىزگە حاتتاما رەتىندە شەشىم قابىلداۋىمىز كەرەك. ول شەشىمدە بۇل ۇمىتكەرلەردى ءبىز تىركەۋدەن باس تارتامىز», – دەدى. جوعارىدا ايتىلىپ وتكەن قاۋلىلاردىڭ جوباسىن وسك مۇشەلەرى ءبىراۋىزدان ماقۇلدادى. جولدىباي بازار. دەرەك, سۋرەت: «حابار» تەلەارناسى.