فوتو: ۇلتتىق وليمپيادا كوميتەتى
جاتتىقتىرۋشىلار كەڭەسىنىڭ شەشىمىمەن ۆلاديسلاۆ كيرەەۆ, اسەت دۇيسەنوۆ, ميلانا گەنەۆا, ايشا راكيشەۆا قىسقى وليمپيادادا سايىسادى. فەدەراتسيانىڭ مالىمەتىنشە, بۇل قۇرام – ۇلتتىق قۇرامانىڭ تاريحىنداعى ەڭ جاس كوماندالاردىڭ ءبىرى. سپورتشىلار 24-25 جاستا.
قۇراما قازىرگى ۋاقىتتا چەحيادا وقۋ-جاتتىعۋ جيىنىنا قاتىسىپ جاتىر جانە الەم كۋبوگىنىڭ كەزەكتى كەزەڭىندە باق سىنايدى. بۇل تۋرنير وليمپياداعا دايىندىقتىڭ سوڭعى كەزەڭى بولماق. ودان كەيىن وليمپيادالىق قۇراما يتالياعا وقۋ-جاتتىعۋ جيىنىنا اتتانادى.
ايتا كەتەيىك, 2026 جىلعى وليمپيادادا بياتلون جارىستارى 8 اقپاندا باستالادى.
بۇعان دەيىن قازاقستان بياتلونشىلارىنا 4 جولداما بەرىلگەنىن جازعانبىز.
