ءبارى 2024 جىلى اتىراۋدا وتكەن ۇلتتىق قۇرىلتايدا مەملەكەت باسشىسىنىڭ «كىتاپ وقيتىن ۇلت» قالىپتاستىرۋ تۋرالى ۇسىنىسىنان باستالعان ەدى. قاسىم-جومارت كەمەل ۇلىنىڭ «شىن مانىندە, وزىق ويلى ۇلت بولۋدىڭ ەڭ توتە جولى – كىتاپ وقۋ. سوندىقتان كىتاپ وقۋ مادەنيەتىن قوعامدا بارىنشا ورنىقتىرۋىمىز كەرەك», دەگەن ءسوزى قازتالوۆ اۋدانىندا دا حالىق قولداۋىنا يە بولدى. اۋدان اكىمى اسلانبەك سارقۇلوۆتىڭ باستاماسىمەن مەكتەپ وقۋشىلارى اراسىندا «مەن وقىعان 30 كىتاپ» جوباسى ۇيىمداستىرىلدى.
اۋەلى اۋداندىق دەڭگەيدە وتكەن رۋحاني جوبا بىلتىر وبلىستىق دەڭگەيگە كوتەرىلدى. ءسويتىپ, باس جۇلدەنى شىڭعىرلاۋلىق ايزەرە جاۋىمباي جەڭىپ الىپ, 300 مىڭ تەڭگە قارجىلاي سىيلىققا يە بولدى. جەڭىمپازدىڭ قۇرمەتىنە بيىل بايقاۋدىڭ وبلىستىق كەزەڭى شىڭعىرلاۋ اۋدانىندا وتەدى. ال «مەن وقىعان 30 كىتاپ» ءى رەسپۋبليكالىق بايقاۋى قازتالوۆتا قورىتىندىلانباق.
جاقىندا وسى بايقاۋدىڭ رەسپۋبليكالىق كەزەڭىنىڭ تانىستىرىلىمى ءوتتى. ايتۋلى شاراعا اقىن, «پاراسات» وردەنىنىڭ يەگەرى, مادەنيەت جانە ءبىلىم بەرۋ سالاسىنىڭ ۇزدىگى, «ەرەن ەڭبەگى ءۇشىن» مەدالىنىڭ ى.التىنسارين توسبەلگىسىنىڭ يەگەرى, حالىقارالىق «الاش» ادەبي سىيلىعىنىڭ لاۋرەاتى, قازتالوۆ اۋدانىنىڭ قۇرمەتتى ازاماتى, جازۋشىلار وداعىنىڭ بقو فيليالىنىڭ جەتەكشىسى داريعا مۇشتانوۆا, «جايىق پرەسس» جشس باس ديرەكتورىنىڭ كەڭەسشىسى توقتار كەنجەعاليەۆ, زيالى قاۋىم وكىلدەرى قاتىستى.
– مەملەكەت باسشىسىنىڭ تاپسىرماسىنا سايكەس قوعامدا كىتاپ وقۋ مادەنيەتىن قالىپتاستىرۋ ماقساتىندا اۋدانىمىزدا جاس بۋىننىڭ زەيىنىن ارتتىرۋ, سانالى ۇرپاق تاربيەلەۋدە وسى بايقاۋدى جىل سايىن ۇيىمداستىرىپ, بيىل ءتىپتى اۋقىمىن كەڭەيتۋدى جوسپارلاپ وتىرمىز. بيىل بايقاۋدىڭ رەسپۋبليكالىق كەزەڭ جەڭىمپازىنا 1 ملن تەڭگە قارجىلاي سىياقى بەرىلەدى, – دەدى ءوز سوزىندە اۋدان اكىمى.
يگى باستامانى وقۋ-اعارتۋ مينيسترلىگى, مادەنيەت جانە اقپارات مينيسترلىگى, باتىس قازاقستان وبلىسى اكىمدىگى, «amanat» پارتياسى, «Adyrna» ۇلتتىق پورتالى قولداپ وتىر.
ايتا كەتەيىك, بىلتىر رۋحاني بايقاۋدىڭ وبلىستىق كەزەڭىنە تەرەكتى, تاسقالا, قاراتوبە, جانىبەك, بوكەي وردا, شىڭعىرلاۋ, جاڭاقالا, بايتەرەك, اقجايىق, قازتالوۆ اۋداندارى مەن ورال قالاسىنان 15 وقۋشى قاتىسقان ەدى.
باتىس قازاقستان وبلىسى
