فوتو: اشىق دەرەككوز
«پارتيالاردىڭ پارلامەنتكە ءوتۋ مەجەسىن قازىرگى بەس پايىزدان جەتى پايىزعا قايتارۋ قاجەت دەگەن پىكىر ايتىلدى. بۇل ەرەجە كەزىندە ۇلتتىق قوعامدىق سەنىم كەڭەسىنىڭ باستاماسىمەن قابىلدانعان بولاتىن. بەس جىل بۇرىن ەنگىزىلگەن وسىنداي وزگەرىستەر سايلاۋ زاڭناماسىن جاقسارتۋعا ەداۋىر سەپتىگىن تيگىزدى. مەجەنى تومەندەتۋ ارقىلى پارلامەنتتەگى ءىرى ساياسي كۇشتەردىڭ ۇستەمدىگىن ازايتىپ, پارتيالار اراسىنداعى باسەكەنى كۇشەيتۋدى ماقسات تۇتقان ەدىك. بۇگىنگى تاڭدا وسى نورمانىڭ تيىمدىلىگىنە كوزىمىز جەتتى. ەل تاريحىندا العاش رەت ماجىلىسكە التى پارتيانىڭ ءوتۋى – سونىڭ ايقىن دالەلى. سوندىقتان مەن بەس پايىزدىق مەجەنى قالدىرعان ءجون دەپ سانايمىن», دەدى قاسىم-جومارت توقاەۆ.
پرەزيدەنتتىڭ ايتۋىنشا, ۇسىنىستاردىڭ ءتورتىنشى بولىگى زاڭ شىعارۋشى ورگاننىڭ جۇمىس ءتارتىبى مەن راسىمدەرىنە قاتىستى بولدى. جاڭا پارلامەنتتە دەپۋتاتتاردى بەس جىلعا سايلاۋ كوزدەلىپ وتىر.
«زاڭ قابىلداۋدىڭ ءۇش كەزەڭنەن تۇراتىن پروتسەدۋراسى ۇسىنىلادى. دەپۋتاتتار ءبىرىنشى كەزەڭدە زاڭ جوباسىن جالپى ماقۇلدايدى. ودان كەيىن وزگەرىستەردى ماقۇلدايدى, سوڭىندا زاڭدى قابىلدايدى. وسىلايشا, ءبىز پارلامەنت قىزمەتىن تۇبەگەيلى قايتا قۇرۋ ارقىلى وسىعان دەيىن جۇزەگە اسىرىلعان ساياسي رەفورمالاردى ودان ءارى جالعاستىرامىز. مەملەكەتتىڭ ينستيتۋتسيونالدىق تۇعىرىن نىعايتىپ, «كۇشتى پرەزيدەنت – ىقپالدى پارلامەنت – ەسەپ بەرەتىن ۇكىمەت» قاعيداتىنا سايكەس ورنىقتى ساياسي جۇيە قالىپتاستىرامىز. باستى ماقساتىمىز دا – وسى», دەدى مەملەكەت باسشىسى.
بۇعان دەيىن مەملەكەت باسشىسىنىڭ جاڭا پارلامەنتتىڭ اتاۋىن «قۇرىلتاي» دەپ اتاۋدى ۇسىنعانىن جازعان ەدىك.
