جوبا وپەراتورى East Star Com.kz كومپانياسىنا 2025 جىلعى جەلتوقساندا 7 جىل مەرزىمگە جىلدىق 6 پايىزدىق جەڭىلدەتىلگەن مولشەرلەمەمەن 480 ملن تەڭگە ءبولىندى. ينۆەستيتسيانىڭ جالپى كولەمى 1,5 ملرد تەڭگەگە جەتەدى, سونىڭ 1 ملرد تەڭگەسى كومپانيانىڭ ءوز قاراجاتى ەسەبىنەن باعىتتالادى.
قاسىم-جومارت توقاەۆ KazPan سەندۆيچ-پانەلدەرىن وندىرەتىن زاۋىتتى ارالاپ كوردى
وندىرىستىك كەشەن الماتىنىڭ يندۋستريالىق ايماعىندا ورنالاسادى. جوبا اياسىندا ءبىر اۋىسىمدا 3 مىڭ شارشى مەترگە دەيىن ءونىم شىعارۋعا مۇمكىندىك بەرەتىن زاماناۋي تەحنولوگيالىق جەلى ساتىپ الىنىپ, پايدالانۋعا بەرىلەدى. سەندۆيچ-پانەلدەر ءورت جانە ەكولوگيالىق قاۋىپسىزدىكتىڭ جوعارى تالاپتارىنا ساي, كاسىپورىننىڭ وزىندە وندىرىلەتىن مينەرالدى جىلۋ وقشاۋلاعىش ماتەريالداردى قولدانا وتىرىپ دايىندالادى. بۇل ونىمدەر مەكتەپتەر, اۋرۋحانالار, تۇرعىن ۇيلەر جانە كوممەرتسيالىق نىساندار قۇرىلىسىندا پايدالانىلادى.
جوبانىڭ ىسكە اسۋى الماتىنى عانا ەمەس, ەلدىڭ وزگە وڭىرلەرىن دە وتاندىق قۇرىلىس ماتەريالدارىمەن قامتۋعا جول اشادى. سونىمەن بىرگە يمپورتقا تاۋەلدىلىكتى ازايتىپ, قۇرىلىس نارىعىنداعى جەرگىلىكتى ءونىم ۇلەسىن ارتتىرۋ كوزدەلگەن.
«الماتى يندۋستريالىق ايماعىنداعى جوبالاردى قولداۋ قارجىلاندىرۋدىڭ باسىم باعىتتارىنىڭ ءبىرى. بۇل جوبا قالانىڭ ونەركاسىبىن دامىتۋعا سەرپىن بەرىپ قانا قويماي, 33 جاڭا جۇمىس ورنىن اشادى. الداعى 7 جىلدا بيۋدجەتكە شامامەن 490 ملن تەڭگە سالىق ءتۇسىمى ءتۇسۋى كۇتىلەدى», دەدى Almaty Finance باسقارما توراعاسى ەرلان ەگەمبەرديەۆ.
