«وسى كەزەڭدە پرەزيدەنت پەن ۆيتسە-پرەزيدەنتتىڭ ءبىر ماقساتقا جۇمىلىپ, ۇيلەسىمدى ارەكەت ەتە الاتىنىن كورسەتتىك. مەن يليانا يوتوۆا بولگاريانىڭ لايىقتى باسشىسى بولاتىنىنا سەنىمدىمىن», دەدى رۋمەن رادەۆ.
ول ءوز پرەزيدەنتتىگى تۇسىندا ەل ەكى ءىرى قوعامدىق تولقىندى – 2020 جانە 2025 جىلدارداعى جاپپاي نارازىلىقتاردى باستان وتكەرگەنىن ەسكە سالدى. وسى ارالىقتا ۋاقىتشا ۇكىمەت جەتى مارتە قۇرىلعان.
«بۇگىن مەن سىزدەرگە بولگاريا پرەزيدەنتى رەتىندە سوڭعى رەت ءۇن قاتىپ تۇرمىن. وسى توعىز جىلدا ەل ەۋروپالىق ينتەگراتسيا ۇدەرىسىن اياقتادى. ءبىز بۇگىندە شەنگەن ايماعى مەن ەۋروايماقتىڭ مۇشەسىمىز. بۇل – 1990-جىلداردىڭ سوڭىندا بەلگىلەگەن ستراتەگيالىق مەجە», دەدى ول.
مەملەكەت باسشىسى ەلدەگى ساياسي تۇيتكىلدەردىڭ ءتۇپ-توركىنىن «سىرتتاي دەموكراتياعا ۇقسايتىن, بىراق شىن مانىندە وليگارحيالىق تەتىكتەرمەن جۇمىس ىستەيتىن» باسقارۋدىڭ قاساڭ مودەلىنەن كورەتىنىن ايتتى.
«بولگارياداعى ساياسات مەملەكەتتىك ينستيتۋتتاردان تىس دامىپ وتىر. قۋىرشاقتار كامەرا الدىندا اشىق كورىنىپ, ۇلتتىق جينالىسقا نۇسقاۋ بەرەدى. ولار پرەمەر-ءمينيستردىڭ كوزىنشە ۇكىمەت اتىنان سويلەيدى, پارتيالاردى, بانكتەردى, كاسىپورىندار مەن بۇقارالىق اقپارات قۇرالدارىن يەمدەنەدى. بيلىكتى ساياسي قارسىلاستارعا قارسى تاياق رەتىندە پايدالانادى», دەپ مالىمدەدى پرەزيدەنت.
رۋمەن رادەۆ 2025 جىلدىڭ كۇزىندە نارازىلىققا شىققان جاستاردىڭ ارەكەتى وزىنە ەرەكشە جىگەر بەرگەنىن اتاپ ءوتتى.
«بۇل – حالقىمىزدىڭ پسيحولوگياسىنداعى بەتبۇرىس. ەندى بەيجايلىققا, جەكە باس قامىن عانا كۇيتتەۋگە نۇكتە قوياتىن ۋاقىت كەلدى. ءبىزدى وتكەنگە بايلاپ تۇرعان الاۋىزدىقتى ارتتا قالدىرۋ قاجەت. العا باستار جولدى الاڭداعى بىرلىك كورسەتتى», دەدى ول.
Reuters اگەنتتىگىنىڭ حابارلاۋىنشا, پرەزيدەنتتىڭ بۇل شەشىمى كۇتىلگەن قادام سانالادى. بولگاريا الداعى ايلاردا وتەتىن كەزەكتەن تىس پارلامەنت سايلاۋىنا دايىندالىپ جاتىر, بۇل سوڭعى ءتورت جىلداعى سەگىزىنشى ناۋقان بولماق. اقپارات كوزدەرىنىڭ دەرەگىنشە, رۋمەن رادەۆ الداعى سايلاۋعا قاتىسۋ ءۇشىن جەكە ساياسي پارتيا قۇرۋى ىقتيمال.
2025 جىلدىڭ قاراشا ايىنىڭ سوڭىنان بەرى بولگاريا اۋماعىندا جاپپاي نارازىلىقتار ءوتتى. شەرۋشىلەر سالىق ساياساتىنا, الەۋمەتتىك اۋدارىمداردىڭ وسۋىنە قارسى شىعىپ, بيلىكتىڭ اۋىسۋىن جانە سىبايلاس جەمقورلىقپەن كۇرەستى كۇشەيتۋدى تالاپ ەتتى. 11 جەلتوقساندا ەل پرەمەر-ءمينيسترى روسەن جەليازكوۆ ۇكىمەتىنىڭ وتستاۆكاعا كەتەتىنىن رەسمي تۇردە جاريالاعان ەدى.
