قايرات تۇرسىنقان ۇلى ەڭبەك جولىن اباي وبلىسىنىڭ اياكوز قالاسىندا قاراپايىم باپكەرلىكتەن باستادى. سول جاقتا ءجۇرىپ, دارىندى جاستارعا جۇدىرىقتاسۋ ونەرىنىڭ قىر-سىرىن ۇيرەتتى. كەيىننەن وبلىستىڭ اعا جاتتىقتىرۋشىسى بولدى. سول كەزدە سەمەي وڭىرىنەن كوپتەگەن جاقسى بوكسشىلار شىقتى. ونىڭ ەڭبەكقورلىعى مەن جۇمىس ىستەۋ ءستيلى قفب باسشىلارىنىڭ كوڭىلىنەن شىقسا كەرەك, كوپ ۇزاماي ق.ءساتجانوۆ ەلىمىزدىڭ جاسوسپىرىمدەر, ودان كەيىن جاستار قۇراماسىن باپتادى. بۇل رەتتە دە نەسىبەسىز بولعان جوق. قايراتتىڭ كومانداسى الەم, ازيا بىرىنشىلىكتەرىندە ۇنەمى الدىڭعى لەكتەن كورىندى.
2021 جىلى توكيو وليمپياداسىندا ەلىمىزدىڭ قۇراماسى ءساتسىز ونەر كورسەتكەننەن كەيىن رەسپۋبليكامىزدىڭ باس كومانداسىنىڭ تىزگىنىن ءساتجانوۆ ۇستادى. سول كەزدە جەرلەستەرىمىز بەلگرادتا وتكەن الەم چەمپيوناتىندا 5 التىن, 1 كۇمىس, 3 قولا الىپ, جالپى كوماندالىق ەسەپتە ەكىنشى ورىندى ەنشىلەدى. كەلەسى جىلى اممانداعى ازيا بىرىنشىلىگىندە 3 التىن, 6 كۇمىس, 3 قولا مەدالدى يەلەنىپ, تاعى دا ەكىنشى ساتىعا تۇراقتادى. بىراق قايراتقا بوكسشىلاردى پاريج وليمپياداسىنا اپارۋ باقىتى بۇيىرمادى. «دەنساۋلىعى سىر بەردى» دەگەن جەلەۋمەن ورنىنان الىپ تاستادى.
2024 جىلى فرانتسيانىڭ باس شاھارىندا جۋان جۇدىرىقتى جىگىتتەرىمىز ەل سەنىمىن اقتاي المادى. نۇربەك ورالبايدان باسقا بوكسشىلارىمىز تەگىس ۇتىلدى. ءدال سول كەزدە قازاق بوكسىن تىعىرىقتان شىعارۋ ماقساتىندا قايرات تۇرسىنقان ۇلىن قايتا قىزمەتكە شاقىردى. تاڭداعان كاسىبىنە جان-تانىمەن بەرىلگەن مامان وزىنە جۇكتەلگەن مىندەتتى ابىرويلى اتقاردى. ناتيجەسىندە, ەلىمىزدىڭ قۇراماسى الەم, قۇرلىق چەمپيوناتتارىندا زور تابىسقا قول جەتكىزىپ, قايتا جەر-جاھانداعى ەڭ مىقتى كوماندالاردىڭ قاتارىنا قوسىلدى. ق.ءساتجانوۆ باس باپكەر بولعان جىلدارى ەلىمىزدەن 7 الەم, 43 ازيا چەمپيونى شىقتى.
سپورت سالاسىنىڭ تىزگىنىن ۇستاپ وتىرعان باسشىلاردىڭ كەيبىر تىرلىكتەرىن تۇسىنبەي قالاتىنىمىز بار. جانىن سالىپ جەمىستى ەڭبەك ەتىپ جۇرگەن مامانداردى كەز كەلگەن ۋاقىتتا ەش سەبەپ-سالدارسىز ورىندارىنان الىپ تاستايدى. قفب تاراتقان مالىمەتكە جۇگىنسەك, ق.ءساتجانوۆتىڭ دەنساۋلىعى كۇرت ناشارلاعان. سپورت تاقىرىبىنا قالام تارتىپ جۇرگەن باق وكىلدەرىن ايتپاعاندا, قاراپايىم جانكۇيەرلەر دە ولاردىڭ بۇل ۋاجىنە سەنبەدى. گازەت-جۋرنالدار, الەۋمەتتىك جەلى ارقىلى قفب باسشىلارىنا وكپە-رەنىشتەرىن ءبىلدىردى. ونىڭ اقىرى داۋ-دامايعا ۇلاسا جازدادى. ايتەۋىر, ءبارى وڭ شەشىلىپ, كۇنى كەشە ق.ءساتجانوۆتىڭ جاڭا قىزمەتتىڭ تىزگىنىن ۇستاعانى بەلگىلى بولدى. قايرات تۇرسىنقان ۇلى بوكس فەدەراتسياسىنىڭ ۆيتسە-پرەزيدەنتتىگىنە تاعايىندالدى. سونىمەن قوسا سول ۇيىمنىڭ باسشىسى شاحمۇرات ءمۇتالىپ باستاعان ازاماتتار مايتالمان مامانعا ءۇش بولمەلى پاتەر مەن تويوتا لەند كرۋزەر كولىگىن سىيعا تارتتى.
