ول ساپتان شىعىپ, الدىمەن انت بەرگەن سوڭ, سۇيىكتىسى توميريسكە ۇيلەنۋگە ۇسىنىس تاستادى. اسكەري ءتارتىپ سالتانات قۇرعان سالماقتى جيىن ءبىر ساتتە قۋانىش پەن اسەرلى كورىنىسكە ۇلاسىپ, ەكى جاس كوپتىڭ ىقىلاسىنا بولەندى.
بولاشاق جارىنىڭ كەلىسىمىن العان جاس سارباز اسكەردەن ورالعان سوڭ ۇيلەنۋ تويىن جاساۋعا دايىن ەكەنىن مالىمدەدى. بۇل وقيعاعا اسكەري ءبولىمنىڭ جەكە قۇرامى, 3000-عا جۋىق اتا-انا مەن ساربازداردىڭ تۋىستارى كۋا بولدى.
ءىس-شارا بارىسىندا اسكەري ءبولىم كومانديرى جاندار اشىربەكوۆ ءسوز سويلەپ, اسكەري انتتىڭ ءار سارباز ءۇشىن ۇلكەن جاۋاپكەرشىلىك ەكەنىن اتاپ ءوتتى.
«اسكەري انت – جاي عانا ءسوز ەمەس, ول – وتانعا, حالىققا, اتا-اناعا دەگەن ادالدىقتىڭ ايقىن كورىنىسى. سىزدەر ارتىلعان سەنىمدى اقتاپ, ۇلتتىق ۇلان جاۋىنگەرىنە لايىقتى قىزمەت اتقارادى دەگەن ۇمىتتەمىن», دەدى ول.
وسى كۇننەن باستاپ قاتارداعى ا.ابدراحوۆ پەن باسقا دا ساربازدار قالا كوشەلەرى مەن ماڭىزدى ءىس-شارالار كەزىندە جاۋىنگەرلىك قىزمەت اتقارۋعا كىرىسەدى.
ءراسىم سوڭىندا جەكە قۇرام ساپ تۇزەپ, اسكەري تەحنيكالاردىڭ قاتىسۋىمەن شەرۋ ءوتتى.
