شەبەردىڭ قولىنان شىققان دۇنيەلەردى جۇرت اتتاي قالاپ الىپ كەتىپ جاتادى. اسىرەسە قامشىعا تاپسىرىس بەرۋشى كوپ. قولونەر شەبەرى كاسىبىنە كەرەك شيكىزاتتى جۇرتتان تەرى جيناپ, ونى يلەپ, كەيىن قايىستان تاسپا ءتىلىپ ءوزى جاساپ الادى.
«ال توبىلعىنى كۇز كەزىندە تورعايدان, الماتى جاقتان تاۋدان الدىرامىز. بىراق تورعايدىڭ توبىلعىسى مەن تاۋدىڭ توبىلعىسىنىڭ ايىرماشىلىعى بار. تورعايعا جاڭبىر از جاۋادى, شولەيتتى, ىستىق بولىپ كەلەدى. توبىلعى سوعان بەيىمدەلەدى دە, شىمىر بولىپ وسەدى. بىرىنشىدەن, دالا توبىلعىسىنىڭ سىرتقى قابىعى ەشقاشان تۇسپەيدى. ماي جاعىپ, وتپەن قىزدىرساڭىز, قىپ-قىزىل بولىپ ءوز ءتۇسىن بەرەدى. ەكىنشىدەن, ىلعالى از شولەيتتى جەردە وسكەندىكتەن, وزەگى ينەنىڭ كوزىندەي عانا بولادى. ال تاۋدىڭ توبىلعىسىن قىزدىرساڭىز, قابىعى تۇلەيدى دە, استىنان ەكىنشى قابىق شىعادى. ىلعالى مول توپىراقتا وسكەندىكتەن, وزەگى دە شەگە سىيىپ كەتەتىندەي جۋان بولادى», دەيدى قولونەر شەبەرى.
ايدىننىڭ ايتۋىنشا, توبىلعىنى قىزدىرىپ, كۇيدىرگەن كەزدە ەرەكشە ءيىس شىعادى. سول ءيىستىڭ ادام دەنساۋلىعىنا دا پايداسى بار بولسا كەرەك. سوندىقتان قازاقتىڭ كۇبىنى توبىلعىمەن ىستاپ جاتاتىنى دا بەكەر ەمەس.
«توبىلعىنى جاعادى دا, تۇتىنىنە كۇبىنى توڭكەرىپ قويادى. ال ءتۇتىننىڭ ىسىن ۇستاپ قالۋ ءۇشىن كۇبىنىڭ ىشىنە قايماق جاعادى. ىس سول قايماققا سىڭەدى. كەسەگە قىمىز قۇيعاندا بەتىندە ءبىر قارا ماي جۇرەدى عوي, سول – وسى توبىلعىنىڭ مايى. قازىر ونى كوبى ءسۇزىپ الىپ تاستاپ جاتادى. ونى الماۋ كەرەك, كەرىسىنشە ءدامىن شىعارىپ, ءيىن قاندىرىپ تۇرىپ ءىشۋ كەرەك. ويتكەنى توبىلعىنىڭ اسقازانعا پايدالى ەمدىك قاسيەتى بولادى. حالىقتا «قىمىز قىرىق اۋرۋعا ەم» دەگەن ءسوز بار. سول قىرىق ەمنىڭ ءبىرى توبىلعى ارقىلى تارايدى. توبىلعىمەن ىستالعان كۇبىدەن قىمىز ىشكەن ادام ەشقاشان ىشەك اۋرۋىمەن اۋىرمايدى», دەيدى شەبەر.
قوستاناي وبلىسى
