«قازاقستان رەسپۋبليكاسىنىڭ باس پروكۋراتۋراسى مەن قارجىلىق مونيتورينگ اگەنتتىگىنىڭ قىزمەتكەرلەرى قازاقستاننىڭ گرۋزياداعى ەلشىلىگىنىڭ قولداۋىمەن اتالعان ەلدەن ەكونوميكالىق قىزمەت سالاسىنداعى اۋىر قىلمىس جاساعانى ءۇشىن قىلمىستىق جاۋاپكەرشىلىككە تارتۋ ماقساتىندا قازاقستان ازاماتىن ەكستراديتسيالادى», دەلىنگەن باس پروكۋراتۋرانىڭ حابارلاماسىندا.
قاداعالاۋ ورگانىنىڭ مالىمەتىنشە, كۇدىكتى استانادا World Business Consulting قارجى پيراميداسىنىڭ قۇرىلىمىن باسقارعان. بۇل ۇيىمنىڭ بولىمشەلەرى 2018-2022 جىلدار ارالىعىندا قازاقستاننىڭ ءتۇرلى وڭىرلەرىندە ازاماتتارعا جوعارى تابىس ۋادە ەتىپ, زاڭسىز تۇردە 6,5 ملرد تەڭگەدەن استام قاراجات تارتقان.
«قىلمىس جاساعاننان كەيىن كۇدىكتى بوي تاسالاپ, حالىقارالىق ىزدەۋگە جاريالاندى. 2025 جىلعى قاراشادا ول گرۋزيا اۋماعىندا ۇستالىپ, قازاقستان رەسپۋبليكاسىنىڭ باس پروكۋراتۋراسىنىڭ سۇراۋى بويىنشا ەلگە ەكستراديتسيالاندى. قازىرگى ۋاقىتتا كۇدىكتى تەرگەۋ يزولياتورىنا قامالدى», دەپ حابارلادى باس پروكۋراتۋرانىڭ ءباسپاسوز قىزمەتى.
باس پروكۋراتۋرادا اتالعان قىلمىس ءۇشىن مۇلكىن تاركىلەي وتىرىپ, 12 جىلعا دەيىن باس بوستاندىعىنان ايىرۋ جازاسى كوزدەلگەنىن ناقتىلادى.
سونداي-اق بۇل قىلمىستىق ۇيىمنىڭ بىرقاتار سىبايلاسى بۇعان دەيىن ناقتى مەرزىمگە باس بوستاندىعىنان ايىرىلعانى ايتىلدى.
ۋكراينا ءىرى الاياقتىق جاسادى دەگەن كۇدىكتىنى قازاقستانعا ەكستراديتسيالادى
ايتا كەتەيىك, باس پروكۋراتۋرا اسا ءىرى مولشەردە بىرنەشە رەت الاياقتىق جاساعانى ءۇشىن قىلمىستىق جاۋاپتىلىققا تارتۋ ماقساتىندا قازاقستان ازاماتىن رەسەي فەدەراتسياسىنان ەكستراديتسيالاعان ەدى.
