بۇل جوبا – ورتالىق ازيادا جاسالعان وسىنداي دەڭگەيدەگى تۇڭعىش ازىرلەمە. بۇعان دەيىنگى حالىقارالىق شەشىمدەر نەگىزىنەن اعىلشىن تىلىنە بەيىمدەلسە, Cybernet AI مودەلى باستان-اياق تۇركى تىلدەرىنىڭ فونەتيكاسى مەن لينگۆيستيكالىق قۇرىلىمىنا نەگىزدەلىپ جاسالعان.
جوبا Astana Hub, جاساندى ينتەللەكت جانە تسيفرلىق دامۋ مينيسترلىگىنىڭ قولداۋىمەن Microsoft GPU-ينفراقۇرىلىمىندا ىسكە اسىرىلدى.
«Cybernet AI ازىرلەمەسى تۇركى تىلدەس ەلدەر توبى ءۇشىن جاساندى ينتەللەكتىنى قولدانا وتىرىپ, ساپانى جوعالتپاستان جانە قولجەتىمدى باعامەن ءوز انا تىلدەرىندە تسيفرلىق سەرۆيستەر مەن كليەنتتەرگە قىزمەت كورسەتۋ دەڭگەيىن كەڭەيتۋگە جول اشادى. قازاقستان ءۇشىن بۇل – جاھاندىق جي (جاساندى ينتەللەكت) شەشىمدەرىن تۇتىنۋشى رولىنەن حالىقارالىق دەڭگەيدە باسەكەگە قابىلەتتى جەكە تەحنولوگيالاردى ازىرلەۋشى رولىنە ءوتۋ دەگەندى بىلدىرەدى», دەدى Astana Hub باسقارۋشى ديرەكتورى تاڭات وسكەمباەۆ
جاڭا مودەل قازاق, تۇرىك, وزبەك, قىرعىز, ازەربايجان جانە تاتار تىلدەرىندەگى سوزدەردى تانيدى. ونىڭ باستى ارتىقشىلىعى – كۇندەلىكتى ومىردە ءجيى كەزدەسەتىن ارالاس تۇركى-ورىس تىلىندەگى سويلەمدەردى دە قاتەسىز تۇسىنۋىندە. بۇل بيزنەس پەن مەملەكەتتىك قىزمەتتەردەگى كليەنتتەرمەن ديالوگتى ساپالى دەڭگەيگە كوتەرەدى.
ء«بىز اعىلشىن ءتىلدى مودەلدەردى بەيىمدەۋدەن سانالى تۇردە باس تارتىپ, ءتىرى ءارى ارالاس سويلەۋ فورمالارىن باستاپقىدان تۇسىنەتىن ASR-مودەلىن جاساپ شىعاردىق. بۇل ازىرلەمەنى جاي عانا كەزەكتى تەحنولوگيالىق ءونىم ەمەس, جەرگىلىكتى جاساندى ينتەللەكت ەكوجۇيەسىن قالىپتاستىرۋعا جانە قازاقستاننىڭ تەحنولوگيالىق ەگەمەندىگىنە قوسىلعان ۇلەس ەتەدى», دەپ اتاپ ءوتتى Cybernet AI كومپانياسىنىڭ تەحنيكالىق ديرەكتورى راشيد يسمايلوۆ.
بۇل مودەل مىنا سالالار ءۇشىن وتە ءتيىمدى:
- بانكتەر مەن قارجى ۇيىمدارى;
- تەلەكوممۋنيكاتسيا وپەراتورلارى;
- بايلانىس ورتالىقتارى مەن لوگيستيكالىق كومپانيالار;
- مەملەكەتتىك قىزمەت كورسەتۋ قۇرىلىمدارى.
مودەل شۋعا, اكتسەنتكە جانە ءبىر سويلەم ىشىندە ءتىل اۋىستىرۋعا ءتوزىمدى. بۇل كليەنتتەرگە قىزمەت كورسەتۋ شىعىندارىن ازايتىپ, جاساندى ينتەللەكت ارقىلى تاۋلىك بويى ساپالى داۋىستىق سەرۆيس ۇسىنۋعا مۇمكىندىك بەرەدى.
