بۇگىندە قىسقى وليمپيادالىق سپورتتىڭ 13 ءتۇرى قاتار دامىپ كەلەدى. ولاردىڭ قاتارىندا كونكيمەن جۇگىرۋ, شورت-ترەك, مانەرلەپ سىرعاناۋ, بياتلون, كەرلينگ, شاڭعى جارىسى, تاۋ شاڭعىسى, فريستايل, سنوۋبورد, شاڭعىمەن قوسسايىس, ترامپليننەن سەكىرۋ, شايبالى حوككەي جانە سكي-الپينيزم بار. بۇل باعىتتاردىڭ بارلىعىندا ۇلتتىق قۇرامالار جاساقتالىپ, جوسپارلى جۇمىس جۇرگىزىلىپ وتىر.
سپورتشىلاردىڭ دايىندىعى تەك ەل ىشىندەگى جاتتىعۋمەن شەكتەلگەن جوق. قۇرامالار شەتەلدەردە وقۋ-جاتتىعۋ جيىندارىنان ءوتىپ, حالىقارالىق جارىستاردا باق سىنادى. ءتورت جىل ىشىندە قىسقى سپورت تۇرلەرى بويىنشا ۇلتتىق كوماندالار 612 وقۋ-جاتتىعۋ جيىنىن وتكىزسە, سپورتشىلار 434 حالىقارالىق جارىسقا قاتىسقان. بۇل تاجىريبە جيناۋعا دا, الەمدىك دەڭگەيدەگى قارسىلاستارمەن كۇش سىناسۋعا دا مۇمكىندىك بەردى.
ەل سپورتشىلارى قىسقى وليمپيادا ويىندارىندا قانداي كيىم ۇلگىسىمەن ونەر كورسەتەدى؟
دايىندىق ساپاسىن ارتتىرۋ ءۇشىن شەتەلدىك ماماندار دا تارتىلدى. مەملەكەت باسشىسىنىڭ تاپسىرماسىنا سايكەس نيدەرلاند, پولشا, گەرمانيا, رۋمىنيا, رەسەي, بەلارۋس, بولگاريا جانە سلوۆەنيا ەلدەرىنەن الەمدىك دەڭگەيدەگى 13 جاتتىقتىرۋشى-كەڭەسشى جۇمىسقا شاقىرىلعان. ولار ۇلتتىق قۇرامالاردىڭ ادىستەمەلىك جانە تەحنيكالىق دايىندىعىن كۇشەيتۋگە اتسالىستى.
وليمپيادالىق ءتورت جىلدىق تسيكلدى قارجىلاندىرۋعا بارلىعى 13,3 ملرد تەڭگە باعىتتالعان. قاراجات رەسپۋبليكالىق جانە جەرگىلىكتى بيۋدجەتتەن, سونداي-اق بيۋدجەتتەن تىس جانە دەمەۋشىلىك كوزدەردەن ءبولىندى. بۇل قارجى سپورتتىق قۇرال-جابدىق پەن كيىم-كەشەك الۋعا, باپكەرلەر مەن سپورتشىلاردىڭ ەڭبەكاقىسىن تولەۋگە, مەديتسينالىق جانە فارماكولوگيالىق قولداۋعا, حالىقارالىق جارىستارعا قاتىسۋعا جانە وقۋ-جاتتىعۋ جيىندارىن وتكىزۋگە جۇمسالدى.
كونكيمەن جۇگىرۋ: 2026 جىلعى قىسقى وليمپياداعا كىمدەر قاتىسادى؟
قىسقى سپورت تۇرلەرىن دامىتۋ مەملەكەت باسشىسىنىڭ سپورت سالاسىن جاڭعىرتۋ جانە جوعارى جەتىستىكتەر سپورتىنداعى ناتيجەنى ارتتىرۋ جونىندەگى تاپسىرمالارى اياسىندا جۇزەگە اسىرىلىپ كەلەدى. تۋريزم جانە سپورت مينيسترلىگى بۇل باعىتتاعى جۇمىستى جالعاستىرىپ, قىسقى سپورتتاعى رەزەرۆتى كۇشەيتۋگە جانە بولاشاق سپورتشىلاردى دايىنداۋعا باسىمدىق بەرۋدى كوزدەپ وتىر.
