قمدب توراعاسى بايانداماسىندا مۇسىلمانداردىڭ كۇندەلىكتى قارجىلىق ىستەرىندە وسىمقورلىقتان, ادىلەتسىز كەلىسىمدەردەن جانە كۇماندى تابىستان ساقتانۋعا تىرىساتىنىن, سونداي-اق قوعامدا ادال تابىسقا دەگەن سۇرانىستىڭ كۇشەيگەنىن ايتا كەلىپ, يسلام قارجىسى قاعيدالارىنا نەگىزدەلگەن ونىمدەر مەن قىزمەتتەرگە دەگەن قاجەتتىلىك ارتقانىن تىلگە تيەك ەتتى.
«قوعامداعى بۇل سۇرانىس قارجى جۇيەسىنىڭ قۇرىلىمدىق وزگەرۋىنە تۇرتكى بولىپ جاتىر. ءداستۇرلى بانك قىزمەتتەرىمەن قوسا يسلامدىق قارجىلاندىرۋ, سەرىكتەستىككە نەگىزدەلگەن كەلىسىمدەر, ليزينگ, ساقتاندىرۋدىڭ يسلامدىق ءتۇرى سياقتى باعىتتارعا سۇرانىس ارتىپ كەلەدى. بۇل قارجى جۇيەسىنىڭ ادىلەتتىلىك پەن الەۋمەتتىك جاۋاپكەرشىلىككە نەگىزدەلۋىنە جول اشادى. بۇل رەتتە حالىقتىڭ يسلامعا بەت بۇرۋى شاريعي قارجى سالاسىندا ءپاتۋالاردىڭ ءرولىن ارتتىرىپ وتىرعانىن ايتا كەتكەن ءجون. قارجىعا قاتىستى ءدىني سۇراقتاردىڭ كوبەيۋىن جانە قوعامدا وسى سالاعا بايلانىستى سۇرانىستىڭ ارتۋىن ەسكەرىپ, قمدب يسلام قارجىسى سەكتورىن اشۋ تۋرالى شەشىم قابىلدادىم. اتالعان سەكتور قارجىلىق ونىمدەرگە شاريعي ساراپتاما جاساپ, قوعامعا سەنىمدى ءارى ءبىرىزدى ءپاتۋا ۇسىناتىن بولادى», دەدى ناۋرىزباي قاجى تاعان ۇلى.
ايتا كەتەيىك, جاڭا سەكتور ليزينگ, ساقتاندىرۋ, ينۆەستيتسيا, وبليگاتسيا, تسيفرلىق اكتيۆتەر مەن ەلەكتروندى تولەم جۇيەلەرى سەكىلدى جاڭا قارجىلىق قۇرالدارعا شاريعات تۇرعىسىنان باعا بەرەدى.
قمدب: جەلىدەگى وقىرمان سانىن بوت ارقىلى كوبەيتۋگە تىيىم سالىنادى
سونىمەن قاتار جيىندا 2026 جىل ءدىني سالا اياسىندا «يسلام جانە ادال قوعام» جىلى دەپ جاريالانىپ, نەگىزگى 4 باعىتتاعى جۇمىستارعا, اتاپ ايتقاندا, يحسان جانە ناسيحات, ءدىني وقۋ-اعارتۋ, ءداستۇر جانە وتباسى, جات ءدىني اعىمداردان ساقتاندىرۋ ءىس-شارالارىنا باسىمدىق بەرىلەتىنى ايتىلدى.
