وزتۇرىك ەسىمى كومەسكى تارتپاسا ەكەن

العاش رەت مۇستافا وزتۇرىك ەلىم, جەرىم دەپ الماتىعا كەلگەندە “اسسالاۋماعالەيكۋم, حالقىم!” دەپ تىزەرلەپ وتىرا كەتىپ, اكەم ءۇي تىككەن, شەشەم وت جاققان جەردە جۇرمەسەم دە قازاقستانىمدى, تۋعان جەرىمدى ساعىندىم, اللاعا شۇكىر بۇل ارمانعا جەتكىزگەنىڭە. ءتۇر­كيا­دا ءبىر قازاق دەگەن ەلىم بار. ءبارى ءوز ساعى­نىش­تارى مەن سالەمدەرىن مەنىڭ مىناۋ ءبىر جۇ­دىرىقتاي جۇرەگىمە سىيدىرىپ جىبەردى. سول ىس­تىق ىقىلاستى قابىل الىڭىزدار”, – دەپ ەدى. قۇم ىشىندەگى التىن سەكىلدى ەلەۋسىز عانا ەل ىشىندە جۇرەتىن اسا ءبىر ەرەكشە تالانتتار بولادى. سولاردىڭ ءبىرى تاەكۆاندودان الەمدەگى بيىك تۇرعان ساڭلاق مۇستافا وزتۇرىك بولاتىن. تورتكۇل الەمدەگى الپاۋىت مەملەكەتتەردىڭ ءوزىن ءتانتى ەتكەن, مۇسىلمان بالاسىنىڭ ىشىنەن ءبى­رىن­شى بولىپ شىققان 6 داننىڭ يەگەرى, حالىق­ارالىق دارەجەدەگى باپكەر ءىنىمىز مۇستافانى ءدىني قايراتكەر, جازۋشى حاليفا التاي, مانسۇر تايجىلەر ماقتان ەتەتىن. ءوز ۇلتىن الەمگە تانىتىپ, بەدەلىن بيىكتەتكەن مۇستافا وزتۇرىك تايۆان, گونكونگ, كورەيادا ءجۇرىپ, تاەكۆاندونىڭ قىر-سىرىن ۇيرەنگەنى شىندىق. اتى ايگىلى بريۋس ليمەن ءبىر مەكتەپتە تاربيەلەنگەن مۇستافا وزتۇرىك بۇگىنگى شىعىس جەكپە-جەگى – تاەكۆاندومەن اينالىسىپ ءجۇر­گەن جاستاردىڭ ءپىرى دەسەك ارتىق بولماس. ءبۇ­گىندە مۇستافا وزتۇرىكتىڭ كوپتەگەن شاكىرتتەرى قازاقستاننىڭ تۇكپىر-تۇكپىرىندە ۇستازىنىڭ ارۋاعىنا تاعزىم ەتىپ, ەگەمەن ەلىمىزدىڭ ءمار­تە­بەسىن بيىكتەتىپ جۇرگەنى راس. مۇستافا ءوزتۇ­رىك: “مەنىڭ قازاقستانعا كەلۋىمنىڭ باستى ماق­ساتى – قازاق حالقىنىڭ اتىن الەمگە تانىتۋ, سىزدەرمەن جۇزدەسىپ, تۋعان ەلىمنىڭ ءومىر تىنىسىن سەزىنۋ. مەنىڭ بۇل ايتقاندارىم بوس ءسوز بولىپ كورىنەر, بىراق مىنانى قاراڭىز­دار­شى. بريۋس ءليدى جاقسى تانيسىزدار. تاريح­تان بىلەتىن بولارسىزدار, بۇرىن جاپوندار كورەيا مەن قىتايدى ەزگىدە ۇستاعان بولاتىن. مىنە, ەندى ءبىر كەزدە ەزگىدە بولعان قىتاي حالقىن الەمگە تانىتىپ, ونىڭ مارتەبەسىن اسىرعان جاننىڭ ءبىرى بريۋس لي بولاتىن. ءار ادام ءوز ەلىنە سونداي قىزمەت جاساسىن. ءبارىمىزدىڭ دە مىندەتىمىز وتاندى ءسۇيۋ دەپ بىلەمىن”, دەگەن ەدى. كەشە عانا قازاق جەرىنە دەگەن ىستىق ساعىنىشىن, ماحابباتىن جەتكىزە بىلگەن مۇستافا وزتۇرىكتىڭ دۇنيەدەن وتكەنىنە ءبىراز جىل بو­لىپتى. ەلىمىز ءوزىنىڭ ارداقتى دا ءبىرتۋار پەر­زەن­تىن ەسكە الىپ, ونىڭ اتىندا سپورتتىق جارىستار وتكىزىپ, ارۋاعىنا قۇران باعىشتاپ جاتادى. دەسەك تە وتكەن عاسىردىڭ جارىق جۇلدىزى بولعان ءىنىمىزدىڭ ەسىمى كومەسكى تارتىپ بارا جاتقانداي. قازاق حالقىنىڭ عانا ەمەس, ءوز ءداۋىرىنىڭ ماقتانىشىنا اينالعان مۇستافا وزتۇرىكتىڭ قادىرىن بىلسەك نۇر ۇستىنە نۇر بولار ەدى. تولىباي شامەت ۇلى. جامبىل وبلىسى, بايزاق اۋدانى, تۇيمەكەنت اۋىلى.