جيىندا ەنەرگەتيكا مينيسترلىگى, «سامۇرىق-ەنەرگو», KEGOC جانە ەنەرگيا ءوندىرۋشى ۇيىمدار پرەزيدەنتتىڭ «جاساندى ينتەللەكت داۋىرىندەگى قازاقستان: وزەكتى ماسەلەلەر جانە ونى تۇبەگەيلى تسيفرلىق وزگەرىستەر ارقىلى شەشۋ» اتتى جولداۋىندا قويىلعان مىندەتتەر شەڭبەرىندە جۇرگىزىپ جاتقان قازىرگى ينفراقۇرىلىمدى جاڭعىرتۋ جانە جاڭا قۋاتتاردى گەنەراتسيالاۋ جونىندەگى جۇمىستاردىڭ ورىندالۋ قارقىنىن تالقىلادى.
ەنەرگەتيكا مينيسترلىگى اۋقىمدى ينۆەستيتسيالىق جوسپاردى جۇزەگە اسىرۋدىڭ پراكتيكالىق كەزەڭىنە كوشىپ جاتىر. بۇگىندە جالپى ينۆەستيتسيا كولەمى 13 ترلن تەڭگەدەن اساتىن جانە قۋاتى 15,3 گۆت بولاتىن 81 جوبا بويىنشا جۇمىس باستالعان. ىسكە قوسىلىپ جاتقان جوبالاردىڭ ەداۋىر بولىگى ەلەكتر قۋاتى نارىعىنىڭ تەتىگى ارقىلى جەكە ينۆەستيتسيالاردى تىكەلەي تارتۋ ەسەبىنەن جۇزەگە اسىرىلىپ جاتىر.
ەنەرگەتيكا مينيسترلىگى: جەلتوقسان ايىندا كقك ارقىلى مۇناي جونەلتۋ كولەمى تومەندەدى
ەرلان اقكەنجەنوۆ الداعى ءۇش جىلدا نەگىزىنەن رەتتەۋ قۋاتىنىڭ تاپشىلىعىن جابۋعا جانە بىرىڭعاي ەنەرگەتيكالىق جۇيەنىڭ يكەمدىلىگىن ارتتىرۋعا باعىتتالعان مانەۆرلى گەنەراتسيا سەگمەنتىن ىسكە قوسۋ جوسپارلانىپ وتىرعانىن باياندادى.
«قازىرگى جۇمىس جۇرگىزىلىپ جاتقان نىسانداردى ىسكە قوسۋ 2027 جىلدىڭ ءبىرىنشى توقسانىنىڭ سوڭىنا قاراي ەكونوميكانىڭ ەلەكتر ەنەرگياسىنا دەگەن قاجەتتىلىگىن تولىعىمەن جابۋعا جانە قازاقستاندى ەنەرگيادان تاپشىلىق كورىپ وتىرعان ەلدەر قاتارىنان شىعارۋعا مۇمكىندىك بەرەدى. 2029 جىلعا قاراي ەلەكتر ەنەرگياسىنىڭ دا, رەتتەۋ قۋاتىنىڭ دا تۇراقتى پروفيتسيتىنە قول جەتكىزىلمەك. بۇل ەلىمىزدىڭ ەكسپورتتىق الەۋەتىن ارتتىرۋعا جاعداي تۋعىزادى», دەدى ەنەرگەتيكا ءمينيسترى ەرلان اقكەنجەنوۆ.
مينيسترلىك مالىمەتىنشە, 2035 جىلعا دەيىن قوسىمشا 26 گۆت-تان استام قۋات ءوندىرۋ كوزدەرى ىسكە قوسىلادى. جيىندا «سامۇرىق-ەنەرگو» اق باسقارما توراعاسى قايرات ماقسۇتوۆ پەن «KEGOC» اق باسقارما توراعاسى ءنابي ايتجانوۆ بايانداما جاسادى.
پرەمەر-مينيستر ەنەرگەتيكالىق جوبالاردى جۇزەگە اسىرۋ كەزىندە مەرزىمدەرىن كەيىنگە ىسىرۋ پراكتيكاسىن سىنعا الدى.
«پرەزيدەنت ەنەرگەتيكادا ءتيىستى ديناميكا جوق ەكەنىن بىرنەشە مارتە ايتىپ كەلەدى. سوندىقتان, بارلىعىڭىز كۇش جۇمىلدىرۋىڭىز كەرەك. بارلىق جوسپارلانعان جوبا بەلگىلەنگەن مەرزىمدە جۇزەگە اسىرىلۋى ءتيىس. ەشقانداي ءۇزىلىس, كەيىنگە قالدىرۋ بولماۋى كەرەك. مينيستر, «سامۇرىق-ەنەرگو» جانە KEGOC باسشىلارى, سىزدەر ءاربىر نىسان ءۇشىن تىكەلەي جاۋاپتىسىزدار. سىزدەردىڭ جۇمىس ورىندارىڭىز – كابينەتتەردە ەمەس, قۇرىلىس الاڭدارىندا», دەپ اتاپ ءوتتى ولجاس بەكتەنوۆ.
