سىر وڭىرىندە قۇرىلىس قارقىندى ءجۇرىپ جاتىر

قىزىلوردا. 12 تامىز. بيىل قىزىلوردا وبلىسىندا 83 نىسان پايدالانۋعا بەرىلمەك. بۇل وتكەن جىلمەن سالىستىرعاندا 3,5 ەسەگە ارتىق. بۇل تۋرالى egemen.kz ءتىلشىسى حابارلادى. قىزىلوردا وبلىسى قۇرىلىس سالۋ قارقىنى بويىنشا رەسپۋبليكادا الدىڭعى قاتارعا شىقتى. بۇگىندە ءبىلىم بەرۋ سالاسى بويىنشا 24 نىساننىڭ قۇرىلىسى جۇرگىزىلۋدە. جىل سوڭىنا دەيىن ونىڭ 20-سى ەل يگىلىگىنە بەرىلەدى. سونىمەن قاتار, وسى جىلى جەتىم بالالارعا قامقورلىق جاساۋ ماقساتىندا «بالالار اۋىلى» پايدالانۋعا بەرىلدى. دەنساۋلىق ساقتاۋ سالاسى بويىنشا 6 نىساننىڭ قۇرىلىسى جۇرگىزىلۋدە. ونىڭ 3-ءى جىل سوڭىندا اشىلادى. مادەنيەت سالاسى بويىنشا بيىل 7 اۋىلدىق كلۋب, كىتاپحانا جانە مۇراجايدىڭ قۇرىلىسى جۇرگىزىلۋدە. سپورت سالاسىنا كەلسەك, جىل سوڭىنا دەيىن يپپودرومنىڭ جانە بوكس ورتالىعىنىڭ قۇرىلىسى اياقتالادى. سونىمەن قاتار, قالاداعى ع.مۇراتباەۆ اتىنداعى ستاديوننىڭ قوسالقى الاڭى قايتا جاڭعىرتىلادى. بۇعان قوسا, بيىل يليا يلين اتىنداعى اۋىر اتلەتيكا حالىقارالىق ورتالىعى مەن 3 مىڭ ورىندىق جابىق فۋتبول مانەجىنىڭ قۇرىلىسى باستالادى. ەرجان بايتىلەس. دەرەك: egemen.kz. سۋرەت: diapazon.kz.