- ءباا-ءنىڭ فۋدجەيراسىندا سەمسەرلەسۋدەن الەم كۋبوگىنىڭ كەزەڭى اياقتالدى. ەلىمىز وكىلدەرى اراسىندا رۋسلان قۇربانوۆ ەڭ ءتاۋىر كورسەتكىشكە قول جەتكىزدى. الەم چەمپيوناتىنىڭ ەكى دۇركىن قولا جۇلدەگەرى 11-ورىنعا تابان تىرەدى. كوماندالىق سايىستا جەرلەستەرىمىز 13-ساتىعا تۇراقتادى.
- قازاقتىڭ تانىمال ارالاس جەكپە-جەك شەبەرى باعدوس ولجاباي 16 قاڭتاردا رەسەيدىڭ كراسنودار قالاسىندا وتەتىن اسا 199 تۋرنيرىنە قاتىسادى. ول اتاقتى حابيب نۇرماعومەدوۆ جەتەكشىلىك ەتەتىن Eagle FC ليگاسىنىڭ ەكس-چەمپيونى, ارمەنيالىق جورا ايۆازيانمەن ايقاسادى. قانداسىمىز وسى كۇنگە دەيىن 21 كەزدەسۋ وتكىزىپ, سونىڭ 17-سىندە جەڭىسكە جەتسە, قارسىلاسى 17 باسەكەنىڭ تەك بىرەۋىندە عانا ۇتىلدى.
- وسكەمەننىڭ «تورپەدو» حوككەي كلۋبى لوندوندا وتەتىن قۇرلىقتىق كۋبوككە قاتىسادى. جەرلەستەرىمىز پولشانىڭ «كاتوۆيتسە», ۇلىبريتانيانىڭ «نوتتينگەم پانتەرس», دانيانىڭ «حەرنينگ بليۋ فوكس», فرانتسيانىڭ «ديۋك د’انجە», لاتۆيانىڭ «موگوسىمەن» بىرگە جارىستى ەكىنشى كەزەڭنەن باستايدى. تۋرنير 14 قاڭتاردا باستالادى.
- فريستايل-موگۋلدان كانادانىڭ ۆال-سەنت-كوم قالاسىندا وتكەن الەم كۋبوگى كەزەڭىندە ەلىمىزدىڭ بىردە-ءبىر سپورتشىسى جەڭىس تۇعىرىنا كوتەرىلە المادى. جەرلەستەرىمىزدىڭ اراسىنان ەڭ ۇزدىك ناتيجە اناستاسيا گورودكوعا تيەسىلى. ول 5-ورىندى قاناعات تۇتتى. سونىڭ الدىندا پاراللەلدى موگۋلدان دا اناستاسيا ءدال سول مەجەدەن كورىنگەن ەدى. الەم چەمپيونى, وليمپيادا جۇلدەگەرى يۋليا گالىشەۆا سايىستىڭ وسى تۇرلەرىنەن 15, 17-ورىنداردا قالىپ قويدى.
- گەرمانيانىڭ نوتشرايە قالاسىندا پارابياتلوننان الەم كۋبوگى ءوتتى. سپورينتەرلىك سايىستا سىنعا تۇسكەن ەربول حاميتوۆ قولا مەدالدى يەلەندى. 7,5 شاقىرىمدىق قاشىقتىقتى 22 مينۋت 9,1 سەكۋندتا ءجۇرىپ وتكەن ول قىتايدىڭ قوس وكىلى – ليۋ مەنتاو مەن ماو چجۋنۋنەن عانا قالىپ قويدى.
- قۇرلىقتىق حوككەي ليگاسىندا (قحل) كۇش سىناسىپ جۇرگەن «بارىس» قاتارىنان ءتورتىنشى كەزدەسۋىندە جەڭىلىس تاپتى. بۇل جولى ولار ەكاتەرينبۋرگتە جەرگىلىكتى «اۆتوموبيليستكە» ەسە جىبەردى. باسەكە وتە تارتىستى ءوتتى. نەگىزگى ۋاقىت 1:1 ەسەبىمەن تەڭ اياقتالدى. وۆەرتايمدا ياروسلاۆ بۋسىگين جەڭىس گولىن سوقتى – 2:1.
- گرۋزيادا تۋىپ, اقش-تا ەڭبەك ەتىپ جۇرگەن ارمەنيالىق مامان رافاەل ارۋتيۋنياننىڭ ەسىمى مانەرلەپ سىرعاناۋدىڭ داڭق زالىنا (U.S. Figure Skating Hall of Fame) ەندى. كەزىندە ول ميشەل كۆان, ساگا كوەن, دجەففري باتتل, ماو اسادا, ماي اسادا, الەكساندر ابت, سەرگەي ۆورونوۆ, يۆان دينيەۆ, الەكساندر شۋبين, نەيتان چەن, ادام ريپپون, ەشلي ۆانگەر, مەرايا بەلل, رومەن پونسار, ميحال برجەزينا, تاعى باسقا جۇلدىزداردى باپتادى. قازىرگى كەزدە ارۋتيۋنيان ايەلدەر اراسىنداعى ەلىمىزدىڭ ەڭ ۇزدىك سىرعاناۋشىسى سوفيا سامودەلكينانى جاتتىقتىرىپ ءجۇر.
- شەشەنستاننىڭ باس شاھارى – گروزنىيدا ارالاس جەكپە-جەكتەن اسا ءتۋرنيرى ۇيىمداستىرىلدى. جارىستا قازاقتىڭ ەكى سپورتشىسى كۇش سىناسىپ, ءبىرى قۋانتتى, ەكىنشىسى مۇڭايتتى. اسا جەڭىل سالماقتاعى قايرات «قازاق» احمەتوۆ (31-2) جەرگىلىكتى فايتەر مانسۋر حاتۋەۆتى (16-6) تورەشىلەردىڭ شەشىمىمەن ەش كۇمانسىز ۇتىپ, 38 جاسقا كەلسە دە ءالى دە بابىندا ەكەنىن بايقاتتى. كەيىنگى كەزدەرى بىردە ۇتىپ, بىردە ۇتىلىپ جۇرگەن جارتىلاي اۋىر سالماقتاعى اسىلجان «ساق» باقىتجان ۇلىن (17-5-1) بۇل جولى شەشەن جىگىتى سۋليم باتالوۆ (9-1) ءبىرىنشى راۋندتا-اق اۋىر سوققىلارىمەن سۇلاتىپ سالدى.
