ايدا بالاەۆا قۇتتىقتاۋ سوزىندە تەاتردىڭ عاسىرلىق شەجىرەسىن باسا ايتىپ, ۇلت رۋحانياتىنا ەرەسەن ەڭبەك ءسىڭىرىپ جاتقانىن اتاپ ءوتتى.
«قازاق رۋحانياتىنىڭ قارا شاڭىراعى – مۇحتار اۋەزوۆ اتىنداعى ۇلتتىق دراما تەاترىنىڭ 100 جىلدىق مەرەيتويىمەن بارشاڭىزدى قۇتتىقتايمىن! عاسىر بۇرىن «ەڭلىك-كەبەكپەن» اشىلعان قاسيەتتى شىمىلدىق سودان بەرى تالاي ءداۋىردى ارتقا تاستاپ, ۇلتتىڭ تاعدىرلى كەزەڭدەرىن, ارمان-مۇراتىن ساحنا تىلىمەن سويلەتىپ كەلەدى», دەدى مينيستر.
سونىمەن قاتار ۇجىمنىڭ كلاسسيكالىق قويىلىمدارى مەن الەمدىك دەڭگەيدەگى جەتىستىكتەرىنە توقتالدى.
«كيەلى ساحنادا قازاق دراماتۋرگياسىنىڭ ءىنجۋ-مارجانىنا اينالعان «اباي», «قوبىلاندى», «قاراگوز», «ايمان – شولپان» جانە وزگە دە تۋىندىلار ساحنالاندى. ونەر وشاعى الماتىعا قونىس اۋدارىپ, 1937 جىلى اكادەميالىق مارتەبە الدى, كەيىن وعان مۇحتار اۋەزوۆتىڭ ەسىمى بەرىلدى. بۇگىندە «ۇلتتىق» مارتەبەگە يە تەاتر الەمدىك مادەني كەڭىستىككە باتىل قادام جاساپ كەلەدى. تەاتر بۇگىندە ۇلت ونەرىن وركەندەتىپ, ءداستۇر ساباقتاستىعىن ساقتاپ, ۇلكەن شىعارماشىلىق وردا قالىپتاستىرىپ وتىر. تەاتر ۇجىمىنا زور دەنساۋلىق, شىعارماشىلىق شابىت, ونەر جولىندا جاڭا جەتىستىكتەر تىلەيمىن!», دەدى ايدا بالاەۆا.
ەسكە سالايىق, «Egemen Qazaqstan» گازەتىنىڭ بۇگىنگى سانىندا «ۇلت تەاترىنىڭ تۇڭعىش قويىلىمى» اتتى ماقالا جارىق كوردى.
