قايعىلى وقيعا شۇبارسۋ اۋىلىندا بولعان. وندا 38 جاستاعى بالاباقشا تاربيەشىسى ءۇش ۇلىمەن بىرگە جالدامالى شاعىن ۇيدە تۇرعان. ايەل جولداسىمەن اجىراسقان ەكەن.
كورشىلەردىڭ ايتۋىنشا, قايعىلى جاعدايدىڭ الدىندا ايەل مۇرجانى تازالاۋدى جوسپارلاعان, الايدا وعان ۇلگەرمەگەن. تاڭەرتەڭ جۇمىسقا كەلمەگەنىن بايقاعان ارىپتەستەرى دابىل قاققان.
«ارىپتەستەرى كەلگەن كەزدە ەسىك جابىق بولعان, ال ىشتەن تەلەفوننىڭ داۋىسى مەن ىڭىرسىعان ءۇن ەستىلگەن. ولار ەسىكتى بۇزىپ كىرگەندە, ءۇش ادام جان تاپسىرعان ەكەن. ۇلكەن ۇلى عانا ءتىرى قالىپ, ونى جەدەل جاردەممەن اۋرۋحاناعا الىپ كەتتى», دەيدى مارقۇمنىڭ تۋىسى جامبىل داۋلەتوۆ.
ايەلمەن بىرگە 5 جانە 7 جاستاعى ەكى بالانىڭ ءمايىتى تابىلعان. ۇشەۋى دە جەر قوينىنا تاپسىرىلدى. تەك ۇلكەن ۇلى – 13 جاستاعى بالا عانا ءتىرى قالدى. قازىرگى تاڭدا ونىڭ ومىرىنە قاۋىپ ءتونىپ تۇرعان جوق.
«بۇعان دەيىن ماماندار بۇل ۇيگە بارىپ, ءۇي يەسىنە ءورت قاۋىپسىزدىگىنە بايلانىستى ءتۇسىندىرۋ جۇمىستارىن جۇرگىزگەن. الايدا وسىنداي جاعداي ورىن الدى. الداعى ۋاقىتتا مۇنداي قايعىلى وقيعالاردىڭ الدىن الۋ ءۇشىن بۇكىل اۋىلدىق وكرۋگ بويىنشا الەۋەتتى قاۋىپتى ۇيلەردى انىقتاۋ جۇمىسىن كۇشەيتۋدى جوسپارلاپ وتىرمىز», دەدى شۇبارسۋ اۋىلدىق وكرۋگى اكىمىنىڭ ورىنباسارى عابيت امان.
ايتا كەتەيىك, بۇعان دەيىن اتىراۋ ماڭىنداعى تومارلى اۋىلىنداعى جەكە تۇرعىن ۇيدە ءۇش ادام كومىرقىشقىل گازىنان ۋلانىپ كوز جۇمعان ەدى.
