قىزىلوردادا پوليتسياعا باعىنباعاندار جازالاندى

قىزىلوردا. 12 تامىز. بيىلعى جىلدىڭ 7 ايىندا پوليتسيا قىزمەتكەرلەرىنىڭ قىزمەتتىك مىندەتتەرىن اتقارۋ كەزىندە ولاردىڭ زاڭدى تالابىنا باعىنباۋ, قارسىلىق كورسەتۋ جانە كۇش قولدانۋ بويىنشا 14 فاكت تىركەلدى. ولار بويىنشا قىلمىستىق ىستەر قوزعالىپ, سوتقا جىبەرىلدى. بۇل تۋرالى egemen.kz ءتىلشىسى حابارلادى. سونداي ءبىر عانا وقيعانى ايتايىق. جەدەل باسقارۋ ورتالىعىنىڭ ينسپەكتورى بەينەباقىلاۋ كامەراسى ارقىلى مۇراتباەۆ كوشەسىنىڭ بويىندا «نەكسيا» ماركالى اۆتوكولىكتىڭ قارسى باعىتىنا شىعىپ, جول قوزعالىسى ەرەجەسىن بۇزعاندىعىن بايقايدى. جەدەل تۇردە وسى اۋماققا جاۋاپتى «بوران-9» ەكيپاجى قىزمەتكەرلەرىنە حابار بەرەدى. پوليتسيا قىزمەتكەرلەرى اتالعان اۆتوكولىكتى توقتاتىپ, قۇجاتتارىن سۇراۋ بارىسىندا, 1990 جىلى تۋعان قالا تۇرعىنى بيلىك وكىلىنىڭ زاڭدى تالابىنا باعىنباي, قاتتى جىلدامدىقپەن ءجۇرىپ كەتەدى. زاڭ بۇزۋشى پوليتسيانىڭ كىشى سەرجانتىن 10 مەتردەي قاشىقتىققا دەيىن سۇيرەتىپ, بىرنەشە دەنە جاراقاتتارىن سالعان. تارتىپكە باعىنباي, زاڭ وكىلدەرىنە مۇرنىن شۇيىرە قاراعاندار ءتيىستى جازاسىن الادى. ەرجان بايتىلەس. دەرەك: egemen.kz. سۋرەت: idrive.kz.