اتىراۋ جىلۋ ەلەكتر ورتالىعى قالانى جىلۋ ەنەرگياسىمەن, ايماقتىڭ باسىم بولىگىن ەلەكتر ەنەرگياسىمەن قامتاماسىز ەتەدى. ال گاز جەتكىزۋ بارىسىنداعى كەز كەلگەن ىركىلىس نەمەسە جەتكىزۋ شارتىنىڭ وزگەرۋى تاريفكە جانە الەۋمەتتىك تۇراقتىلىققا تىكەلەي اسەر ەتەدى. بۇعان دەيىن ءماجىلىس الاڭىندا ايتىلعانداي, قولايسىز جاعداي تۋىندايتىن بولسا, ەلەكتر ەنەرگياسىنىڭ ءتاريفى 41%-عا, ال جىلۋ ءتاريفى 91%-عا دەيىن ءوسۋى مۇمكىن ەدى. الايدا «تەڭىزشەۆرويل» جشس مەن «QazaqGaz» ۇك» اق اراسىندا اتىراۋ جەو-مەن جاسالعان كەلىسىمدى بيىل 30 ساۋىرگە دەيىن ۇزارتۋ جونىندە ۋاعدالاستىق بار.
كەزدەسۋدە ءماجىلىس دەپۋتاتى دۇيسەنباي تۇرعانوۆ مەملەكەت باسشىسىنىڭ تاپسىرماسىنا سايكەس, ۇكىمەت بيىل I توقساننىڭ سوڭىنا دەيىن تۇتىنۋشىلاردىڭ بارلىق ساناتى ءۇشىن كوممۋنالدىق تاريف باعاسىن قىمباتتاتپاۋ تۋرالى شەشىم قابىلدانعانىن ەسكە سالدى. بۇل شارا ازاماتتاردى قورعاۋ جانە باعا قىسىمىنا جول بەرمەۋ ءۇشىن قابىلدانعان.
ماجىلىسمەن «تەڭىزشەۆرويل» جشس-نىڭ «اتىراۋ جەو» كاسىپورنىنا گاز جەتكىزۋدى توقتاتۋ تۋرالى شەشىمى ءوڭىردىڭ ەلەكتر قۋاتىمەن جانە جىلۋمەن قامتىلۋىنا قاۋىپ ءتوندىرىپ قانا قويماي, قولدانىستاعى زاڭناماعا دا قايشى كەلەتىنىن اتاپ ءوتتى.
«AMANAT» پارتياسى اتىراۋ جىلۋ ەلەكتر ورتالىعىنىڭ گازبەن تولىق ءارى تۇراقتى قامتاماسىز ەتىلۋىن تالاپ ەتەدى. بۇل – تۇراقتى جىلۋمەن قامتۋ, تاريف قىمباتشىلىعىنا جول بەرمەۋ قادامدارىمەن تىكەلەي بايلانىستى ماسەلە. بۇعان دەيىن دە اتاپ وتكەنىمدەي, قولدانىستاعى زاڭناما ستراتەگيالىق نىساندارعا دەلدالدار ارقىلى گاز جەتكىزۋگە تىيىم سالادى. سوندىقتان گاز جەتكىزۋ ماسەلەسىن پارلامەنت دەڭگەيىندە كوتەردىك. «AMANAT» پارتياسى فراكتسياسىنىڭ كۇش-جىگەرى ارقىلى ۋاقىتشا شەشىم تابىلدى. ەندى ءبىز «تەڭىزشەۆرويلمەن» ۇزاقمەرزىمدى ىنتىماقتاستىقتى قايتا جانداندىرۋعا جانە ونى جۇيەلى جولعا قويۋعا كۇش سالامىز. بۇل – ءوڭىردىڭ ەنەرگەتيكالىق قاۋىپسىزدىگىنە قاتىستى ماڭىزدى ماسەلە», دەدى دەپۋتات.
سونداي-اق دۇيسەنباي تۇرعانوۆ ءماجىلىس دەپۋتاتتارى گازبەن جابدىقتاۋ, تاۋارلىق گازدى ۇنەمدى تۇتىنۋ ماسەلەلەرى جونىندەگى زاڭ جوباسى بويىنشا جۇمىس ىستەپ جاتقانىن اتاپ ءوتتى. بۇل قۇجات نارىقتى رەتتەۋگە, تۇتىنۋشىلاردى قورعاۋعا جانە جەكە گاز تاراتۋ ۇيىمدارىنا مەملەكەتتىك رەتتەۋ جۇرگىزۋدى كۇشەيتۋگە باعىتتالعان.
ەل يگىلىگى ءۇشىن: 2025 جىلى گاز سالاسى قانداي جەتىستىكتەرگە قول جەتكىزدى؟
ايتا كەتەيىك, كەيىنگى ءۇش جىلدا پارتيانىڭ سايلاۋالدى باعدارلاماسى اياسىندا اتىراۋ وبلىسىندا شامامەن 220 شاقىرىم گاز جەلىلەرى تارتىلىپ, شالعايداعى 8 ەلدى مەكەن كوگىلدىر وتىنمەن قامتاماسىز ەتىلدى.
