فۋتبول. «بارسەلونا» ۋەفا سۋپەركۋبوگىن بەسىنشى رەت يەمدەندى (ۆيدەو)

استانا. 12 تامىز. وتكەن تۇندە گرۋزيانىڭ استاناسى – تبيليسي قالاسىندا فۋتبولدان ۋەفا سۋپەركۋبوگى ءۇشىن ويىن وينالدى. بۇل سىندا يسپانيانىڭ ەكى بىردەي كومانداسى «بارسەلونا» مەن «سەۆيليا» سىنعا ءتۇستى. اسا تارتىستى وتكەن كەزدەسۋدە كاتالونيالىقتار 5:4 ەسەبىمەن جەڭىپ, كلۋب تاريحىندا بەسىنشى مارتە ۋەفا سۋپەركۋبوگىن يەمدەندى. بۇل تۋرالى egemen.kz حابارلادى. ماتچتاعى العاشقى گول بار بولعانى 3-مينۋتتا تىركەلدى. ونىڭ اۆتورى «سەۆيليا» ويىنشىسى ەۆەر بانەگا. بىراق سەۆيليالىقتاردىڭ بۇل باسىمدىقتى 4-اق مينۋت ۇستاپ تۇرۋعا شامالارى جەتتى. ياعني, 7-مينۋتتا «بارسەلونا» شابۋىلشىسى ليونەل مەسسي مەرگەندىگىمەن كوزگە ءتۇستى. ال 16-مينۋتا ول ءدۋبلدىڭ اۆتورى اتاندى. ۇزىلىسكە ءبىر مينۋت ۋاقىت قالعان كەزدە كاتالونيادان كەلگەن كوماندا ەسەپتى ءوز پايدالارىنا 3:1-گە جەتكىزدى. بۇل جولى دوپ رافينيانىڭ اتىنا جازىلدى. ەكىنشى تايم «بارسەلونانىڭ» ەسەپتى ەسەلەۋىمەن باستالدى. 52-مينۋتتا لۋيس سۋارەستىڭ تەپكەن دوبى قارسىلاستارىنىڭ قاقپاسىنان تابىلدى. وسىدان كەيىن عانا «سەۆيليا» جۇيەلى ويىن ورنەگىن كورسەتىپ, جيناقىلىق تانىتتى. ناتيجەسىندە 81-مينۋتقا دەيىن ءۇش گول سوعىپ, تارازى باسىن تەڭەستىردى. اتاپ ايتقاندا, انتونيو رەيەس (57-مينۋت), كەۆين گامەيرو (72-مينۋت, پەنالتي) جانە ەۆگەني كونوپليانكا (81-مينۋت) كومانداسىنا ءۇمىت سىيلاپ, جانكۇيەرلەرىن قۋانىشقا بولەدى. وسىلايشا, نەگىزگى ۋاقىت 4:4 ەسەبىمەن تەڭ اياقتالدى. 15 مينۋتتان تۇراتىن قوسىمشا ەكى تايمنىڭ العاشقىسىندا ەسەپ وزگەرگەن جوق. ال كەزدەسۋدىڭ اياقتالۋىنا 5 مينۋت قالعان كەزدە, ياعني 115-مينۋتتا بارسەلونالىق پەدرو ناتيجەلى سوققى جاساپ, جەڭىس گولىنىڭ اۆتورى اتاندى. سوعان سايكەس, تبيليسيدەگى ويىن 5:4 ەسەبىمەن «بارسەلونانىڭ» پايداسىنا شەشىلدى. اتالعان كوماندا ءۇشىن بۇل – بەسىنشى ۋەفا سۋپەركۋبوگى. مۇنداي كورسەتكىش بويىنشا «بارسەلونا» وسى سايىستا ەڭ كوپ جەڭىسكە جەتكەن يتاليانىڭ «ميلان» كومانداسىمەن تەڭەستى. العاش رەت بۇل كۋبوكتى 1992 جىلى يەمدەنگەن كاتالونيالىقتاردىڭ 1997, 2009 جانە 2011 جىلدارى دا مەرەيلەرى ۇستەم بولدى. ەلامان قوڭىر. دەرەك: egemen.kz. سۋرەت: uefa.com.