بيلىك وكىلدەرى يران يسلام رەسپۋبليكاسىن قولداۋعا ارنالعان بۇكىلحالىقتىق شەرۋلەر وتكىزۋگە شاقىردى. HRANA قۇقىق قورعاۋ ۇيىمىنىڭ دەرەكتەرىنە سايكەس, ەلدەگى تارتىپسىزدىكتەر سالدارىنان 500-دەن استام ادام قازا تاپقان, ولاردىڭ ىشىندە قاۋىپسىزدىك كۇشتەرىنىڭ 48 قىزمەتكەرى بار. سونىمەن قاتار ەكى اپتاعا سوزىلعان نارازىلىقتار بارىسىندا 10 600-دەن استام ادام تۇتقىندالعان.
جارالانعاندار تىم كوپ: يران دارىگەرلەرى نارازىلىقتارعا بايلانىستى دابىل قاقتى
نارازىلىق اكتسيالارى 28 جەلتوقساندا باعانىڭ كۇرت وسۋىنە قارسى باستالىپ, كەيىن 1979 جىلدان بەرى بيلىك ەتىپ كەلە جاتقان كلەريكالدىق رەجيمگە (ساياسي بيلىكتىڭ ءدىن قىزمەتكەرلەرىنىڭ قولىندا بولۋى) قارسى قوزعالىسقا ۇلاسقان. يران بيلىگى تارتىپسىزدىكتىڭ ورشۋىنە اقش پەن ءيزرايلدى ايىپتادى. اقش پرەزيدەنتى دونالد ترامپتىڭ ارالاسۋ جونىندەگى قوقان-لوقىسىنا جاۋاپ رەتىندە يران پارلامەنتىنىڭ سپيكەرى مۇحاممەد باعەر قاليباف يرانعا قارسى كەز كەلگەن ارەكەت امەريكالىق بازالار مەن يزرايلگە قارسى جاۋاپ شارالارىنا الىپ كەلەتىنىن ەسكەرتتى.
بەيسەنبىدەن بەرى ەلدە ينتەرنەت وشىرىلگەن, بۇل بولىپ جاتقان وقيعالار تۋرالى اقپارات الۋدى قيىنداتىپ وتىر. سوعان قاراماستان الەۋمەتتىك جەلىلەردە كوشەلەرمەن ءجۇرىپ, ۇرانداتقان ادامدار بەينەلەنگەن نارازىلىق ۆيدەولارى تارادى. جەكسەنبى كۇنى مەملەكەتتىك تەلەارنا قازا تاپقانداردىڭ مايىتتەرى كورسەتىلگەن كادرلاردى ۇسىنىپ, ولاردىڭ «قارۋلى تەرروريستەردىڭ» قۇربانى بولعانىن مالىمدەدى.
اقش-تىڭ ىقتيمال ارالاسۋىنا بايلانىستى يزرايل جوعارى دايىندىق رەجيمىنە كوشكەنىمەن, يزرايلدىك اسكەري وكىلدەر بۇل نارازىلىقتار يراننىڭ ىشكى ءىسى ەكەنىن اتاپ ءوتتى. جاعداي ءالى دە كۇردەلى كۇيىندە قالىپ وتىر, ال حالىقارالىق قاۋىمداستىق وقيعالاردىڭ دامۋىن مۇقيات باقىلاۋعا الدى.
اقش-تىڭ بۇرىنعى ديپلوماتى ءارى يران بويىنشا ساراپشى الان ەيردىڭ پىكىرىنشە, بۇل نارازىلىقتاردىڭ بيلىكتەگى ەليتانى قۇلاتۋى ەكىتالاي.
«ەڭ ىقتيمال ستسەناري – نارازىلىقتار باسىپ-جانشىلادى, الايدا ۇكىمەت بۇل ۇردىستەن ايتارلىقتاي السىرەپ شىعادى», دەدى ول Reuters اگەنتتىگىنە.
ونىڭ ايتۋىنشا, يراندىق ەليتا ءالى دە ءبىرتۇتاس كورىنەدى, ال ۇيىمداسقان وپپوزيتسيا جوق.
يراننىڭ مەملەكەتتىك تەلەارناسى باتىستاعى گاچاران مەن ياسۋدج قالالارىندا نارازىلىقتار كەزىندە قازا تاپقان قاۋىپسىزدىك كۇشتەرى قىزمەتكەرلەرىن ەسكە الۋعا ارنالعان جەرلەۋ راسىمدەرىن كورسەتتى.
سونداي-اق قاۋىپسىزدىك كۇشتەرىنىڭ 30 قىزمەتكەرى ەلدىڭ ورتالىق بولىگىندەگى يسفاحان قالاسىندا جەرلەنەتىنى, ال تاعى التاۋى باتىستاعى كەرمانشاحتا «ب ۇلىكشىلەردىڭ قولىنان قازا تاپقانى» حابارلاندى.
