ينستيتۋت مەملەكەت باسشىسى قاسىم-جومارت توقاەۆتىڭ كولىك, لوگيستيكا جانە ترانزيت سالالارىن دامىتۋعا قاتىستى ستراتەگيالىق تاپسىرمالارىن ىسكە اسىرۋ اياسىندا قۇرىلىپ وتىر. پرەزيدەنت ءوز جولداۋلارىندا جانە جاريا سۇحباتتارىندا كولىك-لوگيستيكالىق سەكتوردى دامىتۋ قازاقستاننىڭ حالىقارالىق ەكونوميكالىق باسەكەگە قابىلەتتىلىگىن ارتتىرۋدىڭ جانە ۇزاق مەرزىمدى ورنىقتى ءوسۋدىڭ نەگىزگى فاكتورلارىنىڭ ءبىرى ەكەنىن بىرنەشە رەت اتاپ ءوتتى.
ءىس-شارا بارىسىندا ءسوز سويلەگەن پرەزيدەنت جانىنداعى ۇلتتىق عىلىم اكادەمياسىنىڭ پرەزيدەنتى اقىلبەك كۇرىشباەۆ مەملەكەت باسشىسى ايقىنداعان مىندەتتەردىڭ عىلىمي تۇرعىدا قامتاماسىز ەتىلۋىنىڭ ماڭىزدىلىعىنا توقتالدى.
«مەملەكەت باسشىسى كولىك پەن لوگيستيكانى ەلدىڭ ستراتەگيالىق باسىمدىعى رەتىندە ايقىندادى. وسى مىندەتتەردى تابىستى ىسكە اسىرۋ ءۇشىن سالانى زاماناۋي عىلىممەن قامتاماسىز ەتۋ قاجەت. كولىك عىلىمدارى مەن تەحنولوگيالارى ينستيتۋتى ءدال وسى ماقساتقا قىزمەت ەتەدى», دەدى ۇعا پرەزيدەنتى.
ونىڭ ايتۋىنشا, ۇلتتىق عىلىم اكادەمياسىندا «كولىك» باعىتى بويىنشا ارنايى عىلىمي سەكتسيا قۇرىلىپ, بۇل باعىت العاش رەت عىلىمنىڭ باسىم باعىتتارىنىڭ تىزبەسىنە ەنگىزىلگەن. ناتيجەسىندە كولىك سالاسىنداعى عىلىمي جوبالار گرانتتىق جانە باعدارلامالىق-ماقساتتى قارجىلاندىرۋعا, سونداي-اق كوممەرتسيالاندىرۋ تەتىكتەرىنە قول جەتكىزدى. سونىمەن قاتار ينستيتۋت قىزمەتىندە جاساندى ينتەللەكت, گەواقپاراتتىق جۇيەلەر جانە بولجامدىق مودەلدەۋ تەحنولوگيالارىن قولدانۋ كوزدەلىپ وتىر. بۇل شەشىمدەر كولىك اعىندارىن وڭتايلاندىرۋعا, ينتەللەكتۋالدى لوگيستيكانى دامىتۋعا جانە قازاقستاننىڭ ترانزيتتىك-كولىك ينفراقۇرىلىمىنىڭ قاۋىپسىزدىگى مەن تيىمدىلىگىن ارتتىرۋعا باعىتتالماق. كولىك عىلىمدارى مەن تەحنولوگيالارى ينستيتۋتىنىڭ قۇرىلۋى مەملەكەت باسشىسى قويعان ستراتەگيالىق مىندەتتەردى عىلىمي تۇرعىدا قامتاماسىز ەتۋگە, قازاقستاننىڭ كولىك سالاسىن ۇزاق مەرزىمدى دامىتۋعا جانە ەلدىڭ ەۋرازيالىق كەڭىستىكتەگى ترانزيتتىك الەۋەتىن نىعايتۋعا بەرىك عىلىمي-تەحنولوگيالىق نەگىز قالايدى.
قازاقستاننىڭ ەۋرازيا قۇرلىعىنىڭ ءدال ورتاسىندا ورنالاسۋى ەلگە حالىقارالىق كولىك-لوگيستيكالىق حابقا اينالۋ جانە قۋاتتى ترانزيتتىك الەۋەت قالىپتاستىرۋ ءۇشىن ايرىقشا مۇمكىندىك بەرەدى.
بۇگىندە رەسپۋبليكا اۋماعى ارقىلى 11 حالىقارالىق كولىك ءدالىزى وتەدى, ونىڭ ىشىندە 6 اۆتوجول جانە 5 تەمىرجول باعىتى بار. اۆتوموبيل جولدارىنىڭ جالپى ۇزىندىعى 157 مىڭ شاقىرىمدى, تەمىرجول جەلىلەرى 15 مىڭ شاقىرىمدى قۇرايدى.
كولىك عىلىمدارى مەن تەحنولوگيالارى ينستيتۋتى كولىك سالاسىنداعى ىرگەلى جانە قولدانبالى عىلىمي زەرتتەۋلەردى جۇزەگە اسىراتىن مامانداندىرىلعان عىلىمي ورتالىق رەتىندە جۇمىس ىستەيتىن بولادى. ينستيتۋت قىزمەتىنىڭ نەگىزگى باعىتتارىنا كولىك جۇيەسىن دامىتۋعا ارنالعان عىلىمي-تەحنيكالىق نەگىزدەمەلەردى ازىرلەۋ, ترانزيت پەن لوگيستيكانىڭ تيىمدىلىگىن ارتتىرۋ, كولىك ينفراقۇرىلىمىنىڭ بەرىكتىگى مەن ۇزاق مەرزىمدىلىگىن قامتاماسىز ەتۋ, يننوۆاتسيالىق ماتەريالدار مەن تەحنولوگيالاردى ەنگىزۋ, سونداي-اق كولىك نىساندارىن ءارتۇرلى جول-كليماتتىق جاعدايلارعا بەيىمدەۋ كىرەدى.
ينستيتۋتتىڭ ماڭىزدى عىلىمي باعىتتارىنىڭ ءبىرى – قازاقستان اۋماعىنىڭ جول-كليماتتىق اۋدانداستىرىلۋىن ناقتىلاۋ. قازىرگى تاڭدا ەل اۋماعى ەكى عانا جول-كليماتتىق ايماققا بولىنگەن. جوسپارلانعان عىلىمي زەرتتەۋلەر ناتيجەسىندە وڭىرلىك ەرەكشەلىكتەردى ەسكەرەتىن نەعۇرلىم ناقتى جۇيە قالىپتاستىرىلىپ, ايماقتار سانى التىعا دەيىن ۇلعايتىلماق. بۇل جولدار مەن كولىك قۇرىلىستارىن جوبالاۋ, سالۋ جانە پايدالانۋ ساپاسىن ارتتىرۋعا مۇمكىندىك بەرەدى.
ينستيتۋتتىڭ قىزمەتى كولىك ينفراقۇرىلىمىنىڭ ۇزاق قىزمەت ەتۋى مەن سەنىمدىلىگىن ارتتىرۋعا, كولىك جۇيەسىن باسقارۋدىڭ ءتيىمدى ادىستەرىن دامىتۋعا, يننوۆاتسيالىق ماتەريالدار مەن تەحنولوگيالاردى ازىرلەۋ جانە ەنگىزۋگە, سونداي-اق كولىك قۇرىلىستارىن ءارتۇرلى كليماتتىق جاعدايلارعا بەيىمدەۋگە باعىتتالاتىن بولادى.
الماتى
