استانا. 12 تامىز. قىزىلوردا وبلىسىنداعى ارال اۋدانى «ارالتۇز» اكتسيونەرلىك قوعامىنا پارلامەنت ءماجىلىسىنىڭ دەپۋتاتتارى جۇمىس ساپارىمەن باردى. بۇل تۋرالى وبلىس اكىمدىگىنىڭ ءباسپاسوز قىزمەتى حابارلادى.
دەپۋتاتتار اس تۇزىن شىعاراتىن زاۋىتتىڭ جۇمىس بارىسىمەن تانىستى. وندا اتقارىلىپ جاتقان اۋقىمدى شارۋالارعا قانىعىپ, جۇمىسشىلارمەن كەزدەستى.
اكتسيونەرلىك قوعام رەسپۋبليكاداعى تۇز قازۋ مەن ونى وڭدەۋ بويىنشا ەڭ ءىرى كاسىپورىن بولىپ تابىلادى. زاۋىت جىل بويى, ۇزدىكسىز جۇمىس ىستەيدى. مۇنداعى تۇز قازۋ, ونى وڭدەۋ, قالتالاۋ, تاسىمالداۋ جۇمىستارىن كاسىپورىن قىزمەتكەرلەرى جۇمىلا اتقارادى. دەپۋتاتتار تۇز شىعاراتىن ءوندىرىس ورنىنىڭ بارلىق ءبولىمىن ارالاپ, جۇمىسشىلارمەن ءوزارا اڭگىمەلەستى.
«ارالتۇز» كومپانياسىنىڭ پرەزيدەنتى ايدىنبەك تاۋاساروۆ مەيمانداردى زاۋىتتىڭ تىنىس-تىرشىلىگىمەن تانىستىرا وتىرىپ, الداعى ۋاقىتتا كومبينات جانىنان ءبىر تسەح اشۋدى جوسپارلاپ وتىرعانىن ايتتى. ول ءۇشىن ارنايى قۇرىلعىلار دا اكەلىنىپ قويعان. وسى جىلى لەنتاسىن قيۋدى مەجەلەگەن جاڭا تسەحتىڭ جۇمىسى ورگە باسسا, 200 قىزمەتكەرگە ارنالعان جۇمىس ورنى اشىلادى دەپ كۇتىلۋدە.
پارلامەنت ءماجىلىسىنىڭ دەپۋتاتتارى قۇتتىقوجا ىدىرىسوۆ پەن باقىتبەك سماعۇل وسىدان بىرنەشە جىل بۇرىنعى ءوندىرىس وشاعىندا قازىرمەن سالىستىرعاندا ۇلكەن وزگەرىس بار ەكەندىگىن, قايتا جاڭعىرتىلعاننان كەيiن تۇزدىڭ ساپاسى ايتارلىقتاي ارتقاندىعىن ايتىپ, ءوندىرىس جۇمىسىنا وڭ باعالارىن بەردى.
تالعات رايىمبەك.
دەرەك, سۋرەت: قىزىلوردا وبلىسى اكىمدىگىنىڭ ءباسپاسوز قىزمەتى.
