كەزدەسۋ بارىسىندا مەديتسينالىق كومەكتىڭ ساپاسىنا تىكەلەي اسەر ەتەتىن ناقتى باسىمدىقتار تالقىلاندى. اتاپ ايتقاندا, مەديتسينالىق كومەكتىڭ قولجەتىمدىلىگىن ارتتىرۋ, دارىگەرلەر مەن مەديتسينا قىزمەتكەرلەرىنە تۇسەتىن اكىمشىلىك جۇكتەمەنى ازايتۋ, پروتسەستەردىڭ اشىقتىعىن قامتاماسىز ەتۋ مەن دەرەكتەرمەن جۇمىس ىستەۋ ارقىلى سالانى ءتيىمدى باسقارۋ ماسەلەلەرى قارالدى.
مەديتسينالىق قىزمەت ساپاسى مەن كولەمىن جاساندى ينتەللەكت تەحنولوگيالارىن قولدانۋ ارقىلى باقىلاۋ جۇيەسىن قۇرۋ مىندەتىن بۇعان دەيىن مەملەكەت باسشىسى ءوز جولداۋىندا بەلگىلەگەن بولاتىن.
تسيفرلىق ترانسفورماتسيا اياسىندا قولدانىستاعى اقپاراتتىق جۇيەلەردى شوعىرلاندىرۋ, سونداي-اق بىرىڭعاي مەملەكەتتىك مەديتسينالىق اقپاراتتىق جۇيەنى (بمماج) جانە مەديتسينالىق دەرەكتەردىڭ بىرىڭعاي قويماسى – Smart Data Healthcare جۇيەسىن دامىتۋ جوسپارلانىپ وتىر. اتالعان پلاتفورما دەنساۋلىق ساقتاۋ سالاسىنداعى قولدانىستاعى اقپاراتتىق جۇيەلەردەگى (سونىڭ ىشىندە جەكە مەديتسينالىق اقپاراتتىق جۇيەلەردەگى) مالىمەتتەردى بىرىكتىرىپ, دەرەكتەرگە نەگىزدەلگەن كەشەندى تالداۋ, بولجاۋ مەن باسقارۋشىلىق شەشىمدەر قابىلداۋعا مۇمكىندىك بەرەدى.
ازاماتتارعا بۇل مەديتسينالىق قىزمەتتەردى تۇسىنىكتى ەتە تۇسەدى. ولاردا وزدەرىنىڭ ەلەكتروندىق دەنساۋلىق پاسپورتىنا قول جەتكىزۋ, تاعايىنداۋلاردى, كورسەتىلگەن قىزمەتتەر مەن ەمدەۋ تاريحىن «دەرەكتەردى پاتسيەنتتىڭ ءوزى باقىلايدى» قاعيداتى بويىنشا تسيفرلىق فورماتتا قاداعالاۋ مۇمكىندىگى پايدا بولادى.
سەرۆيستەردى ىڭعايلى ەتۋ ماقساتىندا بارلىق شەشىمدەر QazTech پلاتفورماسىندا ورنالاستىرىلىپ, eGov جۇيەسىمەن بىرىكتىرىلەدى. بۇل ازاماتتارعا ارتىق انىقتاماسىز نەمەسە كەزەكسىز, مەديتسينالىق قىزمەتكە جىلدام ءارى وڭاي قول جەتكىزۋگە مۇمكىندىك بەرەدى.
دەنساۋلىق ساقتاۋ جۇيەسىندەگى نەگىزگى مىندەتتەردىڭ ءبىرى – دەرەكتەردى قورعاۋ مەن بۇرمالاۋدىڭ الدىن الۋ. مەديتسينالىق ۇيىمداردا پاتسيەنتتەردىڭ ناقتى كەلۋىن تىركەيتىن faceID تەتىكتەرى ەنگىزىلگەن. ەندى ونى ەكى تاسىلمەن: eGov Mobile قوسىمشاسى ارقىلى نەمەسە بيومەتريالىق سايكەستەندىرۋ كومەگىمەن راستاۋعا بولادى.
بۇعان قوسا وتكەن جىلدان باستاپ «الەۋمەتتىك ءاميان» جوباسى جۇزەگە اسىرىلىپ جاتىر. ونىڭ اياسىندا ازاماتتار امبۋلاتوريالىق ءدارى-دارمەكپەن قامتاماسىز ەتۋ شەڭبەرىندەگى كەپىلدەندىرىلگەن دارىلىك زاتتار پاكەتىن الا الادى. قىزمەت 700-دەن استام مەملەكەتتىك ءدارىحانانى قامتيدى (17 ملن رەتسەپتىنىڭ 13,9 ملن-ى «الەۋمەتتىك ءاميان» جوباسىنىڭ تسيفرلىق تەتىگى ارقىلى راسىمدەلگەن).
بيىل بۇل تاجىريبەنى قوسىمشا تولەم تەتىگىن پايدالانا وتىرىپ, جەكەمەنشىك ءدارىحانالاردا دا كەڭىنەن قولدانۋ جوسپارلانىپ وتىر. بۇدان بولەك, مەديتسينالىق قىزمەتتەرگە ۆاۋچەر الۋ مۇمكىندىگىن ەنگىزۋ كوزدەلىپ وتىر. بۇل ازاماتتار ءۇشىن مەديتسينالىق كومەك الۋ ۇدەرىسىن ودان ءارى اشىق ءارى ىڭعايلى ەتەدى.
تسيفرلىق شەشىمدەر كەزەڭ-كەزەڭىمەن ەنگىزىلەدى. نەگىزگى ماقسات – ازاماتتارعا ناقتى ناتيجە ۇسىنۋ جانە دارىگەرلەر مەن جالپى دەنساۋلىق ساقتاۋ جۇيەسىنە تۇسەتىن جۇكتەمەنى ازايتۋ.
