بۇگىندە ۇلتتىق ۇلان وزگە دە سالالار سەكىلدى جاڭا زامان تالاپتارىنا بەيىمدەلىپ, جاڭعىرۋ كەزەڭىن باستاپ وتكەرىپ جاتىر. سونىڭ ىشىندە مەملەكەت باسشىسىنىڭ «قازاقستان جاساندى ينتەللەكت جانە جاپپاي تسيفرلاندىرۋ داۋىرىندە» اتتى جولداۋىندا ايقىندالعان ستراتەگيالىق باسىمدىقتاردى ىسكە اسىرۋ اياسىندا اتقارىلىپ جاتقان جۇمىس كوپ. اتاپ ايتقاندا, جاساندى ينتەللەكت جانە تسيفرلىق دامۋ مينيسترلىگىنىڭ «NitecAI» پلاتفورماسى ورناتىلىپ, اسكەرلەردى باسقارۋ ورتالىعىن ۇلتتىق بەينەمونيتورينگ جۇيەسىنە قوسۋ قامتاماسىز ەتىلدى. بۇل جۇيە «سەرگەك» جانە وزگە دە مەملەكەتتىك بەينەباقىلاۋ رەسۋرستارىمەن بىرىكتىرىلگەن.
ەلىمىزدىڭ اسكەري دوكتريناسى قورعانىستىق سيپاتتا بولعانىمەن, اسكەرلەر كەز كەلگەن زاماناۋي قاۋىپ-قاتەر مەن سىن-تەگەۋرىنگە دايىن بولۋعا ءتيىس. وسىعان بايلانىستى ۇلتتىق ۇلاندا اۆياتسيانى دامىتۋ, ۇشقىشسىز اۆياتسيالىق جۇيەلەردى جەتىلدىرۋ, سونداي-اق اسكەرلەردى زاماناۋي كولىكتىك بروندى-تانك تەحنيكاسىمەن جانە قارۋ-جاراق ۇلگىلەرىمەن جاراقتاندىرۋ باسىم باعىتتار رەتىندە ايقىندالعان.
«بۇگىندە اسكەر كۇشتەرى اۋە كەمەلەرىمەن تولىق قامتاماسىز ەتىلگەن. سونداي-اق 2025–2029 جىلدارعا ارنالعان ۇشقىشسىز اۆياتسيالىق جۇيەلەردى دامىتۋ جوسپارى بەكىتىلىپ, ۇلتتىق ۇلان اكادەمياسىندا بولاشاق وفيتسەرلەردى دايارلاۋ ءۇشىن ۇشقىشسىز اۆياتسيالىق جۇيەلەر بويىنشا وقۋ تسيكلى ەنگىزىلدى. ال ەلوردامىزدا قاتارداعى جانە سەرجانتتىق قۇرامعا ارنالعان ۇۇا ماماندارىن دايارلاۋ سىنىبى جابدىقتالدى. الماتى قالاسى ماڭىنداعى جاۋىنگەرلىك جانە ادىستەمەلىك دايارلىق ورتالىعىندا وسى باعىت بويىنشا مامانداردى كۋرستىق دايارلاۋ باستالدى», دەيدى ۇلتتىق ۇلان باس قولباسشىسىنىڭ كەڭەسشىسى, مايور الىبەك ءابدىلوۆ.
ونىڭ ايتۋىنشا, قازىر اسكەري قىزمەتشىلەردى دايارلاۋدا جاڭا تەحنولوگيالار مەن وقىتۋ ادىستەرى ەنگىزىلىپ جاتىر. ءارتۇرلى وقۋ-جاتتىعۋلار بارىسىندا, ونىڭ ىشىندە حالىقارالىق جاتتىعۋلاردا العاش رەت «FPV» ۇشقىشسىز اۆياتسيالىق جۇيەلەرى جانە وتاندىق وندىرىستەگى ءارتۇرلى ماقساتتاعى سوققى بەرەتىن دروندار قولدانىلعان.
سونىمەن قاتار مايور ءا.ءابدىلوۆ «زاڭ مەن ءتارتىپ» قاعيداتىن ورنىقتىرۋ, قۇقىق بۇزۋشىلىقتار ءۇشىن جازانىڭ بۇلتارتپاستىعىن قامتاماسىز ەتۋ – مەملەكەتتىڭ ستراتەگيالىق مىندەتى سانالاتىنىن, وسىعان وراي ۇلتتىق ۇلانعا ارتىلعان مىندەت – ىشكى ىستەر ورگاندارىمەن بىرلەسىپ قوعامدىق ءتارتىپتى ساقتاۋ, قوعامدىق قاۋىپسىزدىكتى قامتاماسىز ەتۋ, سونداي-اق قىلمىستىق اتقارۋ جۇيەسى مەكەمەلەرىندە ۇستالاتىن ادامداردىڭ مىنەز-قۇلقىنا باقىلاۋ مەن قاداعالاۋدى جۇزەگە اسىرۋ ەكەنىن ايتتى.
«بىلتىر قۇقىقتىق ءتارتىپ اسكەرلەرى قوعامدىق ءتارتىپتى قامتاماسىز ەتۋ بارىسىندا 17 مىڭ قۇقىق بۇزۋشىنى ۇستاپ, ىشكى ىستەر ورگاندارىنا جەتكىزدى, ولاردىڭ 687-دە قىلمىس بەلگىلەرى انىقتالدى. جاۋىنگەرلىك قىزمەتتى اتقارۋ كەزىندە 308 سۋىق قارۋ مەن وق-ءدارى جانە جالپى سالماعى ءۇش كيلودان اساتىن ەسىرتكى تاركىلەندى. قازىرگى تاڭدا ۇلتتىق ۇلان قاراۋىلدارى قىلمىستىق اتقارۋ جۇيەسىنىڭ 39 مەكەمەسى مەن 1 وندىرىستىك نىساندى كۇزەتەدى. بىلتىر ۇلاندىقتار ىشكى تىيىم سالىنعان ايماققا وتۋگە تالپىنعان 7 سوتتالعان ادامنىڭ جولىن كەسىپ, نەگىزگى قورشاۋ ارقىلى تىيىم سالىنعان زاتتاردى وتكىزۋدىڭ 123 فاكتىسىنىڭ الدىن الدى», دەدى ول.
جىل سايىن ۇلتتىق ۇلان قاتارىنا شامامەن 14 مىڭ جاس شاقىرىلادى ەكەن. اسكەردىڭ نەگىزگى تىرەگى – وفيتسەرلىك قۇرام, ال مىندەتتەردىڭ باسىم بولىگىن كەلىسىمشارت بويىنشا اسكەري قىزمەتشىلەر اتقارادى. اتالعان ساناتتاردىڭ ارقايسىسىمەن تاربيە جۇمىسىن جۇرگىزۋ بەلگىلى ءبىر جۇيەلىلىكتى, قۇرىلىمدى جانە جەكە كوزقاراستى تالاپ ەتەدى. «اسكەري قىزمەتشىلەردىڭ مورالدىق-پسيحولوگيالىق احۋالىنا تىكەلەي اسەر ەتەتىن تاربيە, پسيحولوگيالىق جانە الەۋمەتتىك-قۇقىقتىق جۇمىستى ۇيىمداستىرۋ مەن جۇرگىزۋدىڭ تيىمدىلىگىنە ەرەكشە كوڭىل ءبولىنىپ كەلەدى. وتكەن جىلى اسكەرلەردە تاربيە جۇمىستارىنىڭ كەشەنى 2022–2025 جىلدارعا ارنالعان ء«ومىردى ساقتا» باعدارلاماسىن ىسكە اسىرۋ جانە ىشكى ىستەر مينيسترلىگى جاريالاعان «قۇقىق بۇزۋشىلىقتاردىڭ الدىن الۋ جىلى: زاڭ مەن ءتارتىپ كۇزەتىندە» اياسىندا وتكىزىلدى. قازىرگى ۋاقىتتا قارۋلى كۇشتەردە, باسقا دا اسكەري قۇرالىمداردا 2025–2028 جىلدارعا ارنالعان «ارمياداعى زاڭ مەن ءتارتىپ», «تسيفرلىق الدىن الۋ شارالارى» سياقتى ۆەدومستۆوارالىق باعدارلامالار ىسكە اسىرىلىپ جاتىر», دەيدى باس قولباسشىنىڭ كەڭەسشىسى.
مايور ءا.ءابدىلوۆ قوعامدا كوپ تالقىلاناتىن اسكەردەگى الىمجەتتىك ماسەلەسىنە دە توقتالدى. ونىڭ ايتۋىنشا, جەكە قۇرامعا باقىلاۋ جۇرگىزۋ جانە ىشكى ەرەجەلەردىڭ بۇزىلۋىنا جول بەرمەۋ ماقساتىندا بەينەباقىلاۋ كامەرالارىنىڭ سانىن ارتتىرۋ جۇمىستارى جالعاسىپ كەلەدى. بۇگىنگى تاڭدا اسكەري قالاشىقتار اۋماعىندا, كازارمالاردا, قارۋ-جاراق قويمالارىندا, اسحانالاردا, تۇرمىستىق قىزمەت كورسەتۋ ورىندارىندا, تاۋلىك بويعى كەزەكشىلىك پۋنكتتەرى مەن قاراۋىلداردا 5 مىڭنان اسا بەينەكامەرا ورناتىلعان. ولاردىڭ جۇمىسى – اسكەري ءبولىم كومانديرلەرىنىڭ, جەدەل كەزەكشىلەردىڭ جانە اسكەري پوليتسيانىڭ تۇراقتى باقىلاۋىندا. كامەرالار جەكە قۇرامدى ناقتى ۋاقىت رەجىمىندە قاداعالاۋعا مۇمكىندىك بەرەدى ەكەن, ياعني قاجەت بولعان جاعدايدا جازبالاردى قايتا قاراپ, زاڭ بۇزۋشىلىقتار مەن جاراقات الۋ فاكتىلەرىن انىقتاۋعا مۇمكىندىك بەرەدى.
«بۇل شارالار ءوز جەمىسىن بەرىپ جاتىر. بىلتار اسكەرلەردە توپتىق قۇقىق بۇزۋشىلىقتارعا جانە مەرزىمدى اسكەري قىزمەتتەگى اسكەري قىزمەتشىلەردىڭ ومىرىنە قاۋىپ تونگەن جاعدايدار بولعان جوق», دەدى ول.
ءا.ءابدىلوۆ مەملەكەت تاراپىنان مەرزىمدى اسكەري قىزمەتشىلەرگە جانە ولاردىڭ قىزمەت ءوتۋ كەزىندەگى قىزىعۋشىلىعىن ارتتىرۋعا ەرەكشە كوڭىل بولىنەتىنىن, سونىڭ ىشىندە «نەسيەلىك دەمالىستار» مەن ۇزدىك ساربازدارعا ءبىلىم گرانتىن ۇسىنۋ مۇمكىندىكتەرى جايىندا ايتتى.
«مەرزىم 2.0» باعدارلاماسى ەلىمىزدىڭ جوعارى وقۋ ورىندارىمەن بىرلەسىپ 2023 جىلدان باستاپ ىسكە اسىرىلىپ جاتىر. 2025 جىلدىڭ وزىندە ۇلتتىق ۇلان ساربازدارىنا ەلىمىزدىڭ جوعارى وقۋ ورىندارىندا تەگىن ءبىلىم الۋعا شامامەن 1 300 گرانت بەرىلدى. قۇقىقتىق ءتارتىپ اسكەرلەرىندەگى ءتورت مىڭعا جۋىق مەرزىمدى قىزمەت ساربازىنىڭ ىشىنەن جاۋىنگەرلىك دايارلىقتا وزىق كورسەتكىشكە قول جەتكىزگەن ۇزدىكتەر جەڭىمپاز اتانىپ, ولارعا وقۋ سەرتيفيكاتتارى تابىستالدى», دەدى ول.
مەملەكەت باسشىسى «Turkistan» گازەتىنە بەرگەن سۇحباتىندا: «پاتريوت بولۋ – ەل مەن وتباسىنىڭ يگىلىگى ءۇشىن ايانباي ەڭبەك ەتۋ», دەگەنى بەلگىلى. بۇل اسىرەسە اسكەري قىزمەتشىلەر ءۇشىن ايرىقشا ماڭىزدى ءسوز. ويتكەنى ءاربىر سارباز ەل ءۇشىن قىزمەت ەتەدى, ول – ەلىنىڭ ناعىز پاتريوتى. ۇلاندىق ساربازدار دا وتان ءۇشىن وتقا دا تۇسۋگە بولاتىنىن ءوز ىسىمەن دالەلدەپ كەلەدى.
