سۋرەت: agrosky.kz
ابىلقاس ساعىنوۆ اتىنداعى قاراعاندى تەحنيكالىق ۋنيۆەرسيتەتىنىڭ عالىمدارى مەن تۇلەكتەرى نەگىزىن قالاعان «AgroSky» ستارتاپى اۋىل شارۋاشىلىعىنا جاڭا كوزقاراس اكەلدى. ەگىستىك جايىن دروندار باقىلاپ, ال شەشىمدى جاساندى ينتەللەكت ۇسىنادى. وسىلايشا, ايماقتىڭ اگروماماندارىنا ايتۋلى جاڭالىق قۋانىش سىيلاعالى وتىر.
«AgroSky»-دىڭ باستى ارتىقشىلىعى – بولجامعا ەمەس, ناقتى دەرەككە سۇيەنۋى. ارنايى وزىق تەحنولوگيامەن جابدىقتالعان دروندار ەگىستىك القاپتارىن اۋەدەن جۇيەلى تۇردە شولىپ, كوزگە كورىنبەيتىن توپىراقتاعى جانە باسقا دا وزگەرىستەردى قالت جىبەرمەيدى. مۋلتيسپەكترلى بەينەلەر ارقىلى توپىراقتىڭ كۇيى, وسىمدىكتىڭ دامۋى, ىلعال مەن قورەكتىك ەلەمەنتتەردىڭ تارالۋى تولىق كارتاعا تۇسەدى. ال بۇل مالىمەتتەر ونلاين پلاتفورمادا جاساندى ينتەللەكت ارقىلى وڭدەلىپ, فەرمەرلەرگە دايىن شەشىم رەتىندە ۇسىنىلادى.
ياعني جۇيە قاي جەرگە سۋ جەتپەي جاتقانىن, قاي القاپقا تىڭايتقىش ارتىق بەرىلگەنىن, قاي اۋماقتا ەگىننىڭ سولىپ تۇرعانىنا دەيىن ءدال كورسەتىپ بەرەدى. سونىڭ ارقاسىندا سۋ, تىڭايتقىش پەن جانارماي بوسقا جۇمسالمايدى. جوبانىڭ دەرەگىنشە, AgroSky تەحنولوگياسى شىعىندى 30 پايىزعا دەيىن قىسقارتىپ, ونىمدىلىكتى 10–15 پايىزعا ارتتىرۋعا مۇمكىندىك بەرەدى. بۇل – بۇگىنگى قۇبىلمالى كليمات كەزەڭىندە فەرمەر ءۇشىن اۋاداي قاجەت دۇنيە.
جوبانىڭ تيىمدىلىگى ناقتى تاجىريبەدە دە دالەلدەندى. بيىل جازدا قاراعاندى وڭىرىندەگى جارتاس اۋىلىنىڭ ماڭىندا العاشقى عىلىمي-تاجىريبەلىك اۋەباقىلاۋ جۇرگىزىلدى. دروندار جيناعان دەرەكتەر ەگىستىكتىڭ جاي-كۇيىن تولىق اشىپ كورسەتتى.
ء«بىز مۋلتيسپەكترلى دەرەكتەر نەگىزىندە ەگىستىك القاپتارىنىڭ ەگجەي-تەگجەي كارتاسىن جاسادىق. ول فوسفور, ازوت, كالي مەن كومىرتەگىنىڭ شوعىرلانعان ايماقتارىن, سونداي-اق اگرونوميالىق سترەسس بەلگىلەرى بايقالعان ۋچاسكەلەردى انىقتاۋعا مۇمكىندىك بەردى. بۇل – جۇيەنى جەتىلدىرۋ مەن الگوريتمدەردى ناقتىلاۋ ءۇشىن اسا ماڭىزدى عىلىمي بازا», دەيدى جوبانىڭ عىلىمي جەتەكشىسى دميتري وجيگين.
«AgroSky»-دىڭ الەۋەتىن جەرگىلىكتى فەرمەرلەر عانا ەمەس, حالىقارالىق ساراپشىلار دا جوعارى باعالاپ وتىر.
2025 جىلى ستارتاپ «GCIP 2025» (Global Cleantech Innovation Programme) باعدارلاماسىنا قاتىسىپ, قاتاڭ ىرىكتەۋدەن ءوتتى. شامامەن 250 جوبانىڭ ىشىنەن تاڭداپ الىنعان 50 ۇزدىك كوماندانىڭ قاتارىنان كورىنۋى جوبانىڭ ماڭىزدىلىعىن ايعاقتايدى.
«اكسەلەراتسيالىق باعدارلاما بىزگە ءبىلىم عانا ەمەس, ناقتى باعىت بەردى. يدەيانى ونىمگە اينالدىرۋعا, دامۋدىڭ ايقىن ستراتەگياسىن جاساۋعا كومەكتەستى», دەيدى كوماندا جەتەكشىسى.
بۇگىندە «AgroSky» – جاي عانا تەحنولوگيالىق جاڭالىق ەمەس. بۇل – اگروسەكتوردىڭ بولاشاعىنا جاسالعان ينۆەستيتسيا. درون مەن جاساندى ينتەللەكتىنى دالا تىرشىلىگىنە يكەمدەگەن جاس عالىمدار مەن ينجەنەرلەر ديقان ەڭبەگىن جەڭىلدەتىپ قانا قويماي, اۋىل شارۋاشىلىعىن ءتيىمدى, ۇنەمدى ءارى تۇراقتى سالاعا اينالدىرۋعا جول اشىپ وتىر.
ء«بىز – «AgroSky» كومانداسىمىز. دروندار ارقىلى الىنعان سۋرەتتەردى پايدالى كارتالار مەن ناقتى كەڭەستەرگە اينالدىرامىز. بۇل كارتالار فەرمەرگە قاي جەرگە تىڭايتقىشتى كوبىرەك نەمەسە ازىراق بەرۋ كەرەگىن, ەگىننىڭ قالاي ءوسىپ جاتقانىن جانە ءونىم كولەمىن الدىن الا بىلۋگە كومەكتەسەدى. ءبىزدىڭ ماقساتىمىز – ءار گەكتار جەردىڭ ءتيىمدى جۇمىس ىستەۋىنە جاعداي جاساۋ, شىعىندى ازايتىپ, تابىستى كوبەيتۋ. ءوزىمىز جاساعان تەحنولوگيانىڭ, دالالىق سىناقتاردىڭ جانە اگروباعدارلامالارمەن بايلانىستىڭ ارقاسىندا ناتيجە تەز دايىن بولادى. درون ۇشقاننان كەيىن فەرمەر جەكە كابينەتىنە كىرىپ, دايىن كارتالار مەن ۇسىنىستاردى بىردەن كورە الادى», دەيدى اگرونوم-ساراپشى ارتۋر اببازوۆ.
قاراعاندى وبلىسى
