«NeuHarmony»-دە اۋتيزم سپەكترلى بۇزىلىسى بار بالالار ءۇشىن ونلاين-دياگنوستيكا قاراستىرىلعان. تەكسەرۋدەن وتكەننەن كەيىن جۇيەدە جەكە باعدارلانعان 6 اپتالىق مۋزىكالىق-تەراپەۆتيكالىق كەزەڭ بەلگىلەنەدى. بۇل قىزمەتتى نەيروبۇزىلىسى بار بالالار الەۋمەتتىك-وڭالتۋ ورتالىقتارعا بەرىلگەن جىلدىق پاكەت اياسىندا قولدانا الادى. پلاتفورمادا جەكەلەگەن ءبىلىم بەرۋ قۇرالدارى بالالاردىڭ تۇرعىلىقتى جەرىنە, الەۋمەتتىك جاعدايىنا قاراماستان قولجەتىمدى.
ستارتاپ جەتەكشىسى-فاۋندەر, ك.بايسەيىتوۆا اتىنداعى رەسپۋبليكالىق مۋزىكالىق مەكتەپتىڭ تۇلەگى – كاميليا مۇحامەتقاليەۆا. ول وقۋشى كەزىنەن باستاپ الەۋمەتتىك جوبالاردى ىسكە اسىرۋعا ىنتالى بولعان. وسى ماقساتىنا جەتۋ ءۇشىن الەۋمەتتىك جەلىلەردى قارىم-قاتىناس قۇرالى عانا ەمەس, ءارتۇرلى بەكگراۋندتاعى جانە وزگەرىسكە تالپىناتىنداردى بىرىكتىرۋ قۇرالى رەتىندە قولدانعانىن ايتادى. جوبانىڭ باستالۋى ءوز دەنساۋلىعىممەن بايلانىستى بولدى, دەيدى فاۋندەر. بەس جاسىنان باستاپ كۇيساندىقتا ويناپ, بولاشاقتا ۇلكەن زالداردا كونتسەرت بەرۋدى ارمانداعان كاميليانىڭ ەسەيە كەلە سول قۇلاعى بىتەلىپ قالاتىن بولعان. «مۇنداي جاعدايدا مەنىڭ مۋزىكامەن اينالىسۋىم مۇمكىن بولمادى. ودان شىعار جولدى ىزدەستىرە ءجۇرىپ, «Ayala» الەۋمەتتىك ورتالىعىنا كەلدىم. مۇندا نەيروديۆەرگەنتتى بالالاردى مۋزىكاعا باۋلىعان ءار ءساتىم زور قۋانىش سىيلادى. ويتكەنى مۋزىكالىق تەراپيادان وتكەن بالالاردىڭ دامۋىندا بىرتە-بىرتە ايتارلىقتاي وزگەرىستەر بايقالدى. سول كەزدە جەكە ادىستەمەمدى قۇراستىرۋدى ويلاستىرا باستادىم. وسىلايشا, كوماندالىق جۇمىس ناتيجەسىندە ينكليۋزيۆتى وتباسىلاردى قولداۋ جانە بالالاردىڭ الەۋەتىن اشۋ ءۇشىن نەۆرولوگيا, جاساندى ينتەللەكت جانە مۋزىكا تەراپياسىن بىرىكتىرىپ, «NeuHarmony» ستارتاپىن ازىرلەدىك», دەدى ول.
كوماندا «Technovation» بايقاۋى بارىسىندا قۇرىلعان. قازىردە پلاتفورمانىڭ عىلىميلىعىنا كاميليا مۇحامەتقاليەۆا جاۋاپتى بولسا, مەنەدجمەنت اسسيستەنتى, «دوستىق» مەكتەبىنىڭ, مۋزىكالىق مەكتەپتىڭ تۇلەگى – تولعاناي مۇحتار. يۆەنت جانە ارىپتەستىك مەنەدجەرى نۇردانا قوجاحانوۆا. ول الماتىداعى حيميا-بيلوگيا باعىتىنداعى نزم, بالالار مۋزىكا مەكتەبىنىڭ تۇلەگى. ماركەتينگ ديرەكتورى, حيميا-بيلوگيا باعىتىنداعى نزم وقۋشىسى – اسەم بەيسەنباي. CMO اسسيستەنتى جىبەك ءالىمحان مەن زەرتتەۋ باعىتىنىڭ جەتەكشىسى انزيا تەمەتاي فيزيكا-ماتەماتيكا باعىتىنداعى نزم وقۋشىسى. ال استاناداعى نزم IB وقۋشىسى الىبەك قىزىلباەۆ تەحنيكالىق جۇيەگە, سايتقا جاۋاپ بەرەدى.
جاس عالىمدار ستارتاپ يدەياسىن ازىرلەپ, تسيفرلاندىرۋ ادىستەمەسىن «Technovation» حالىقارالىق باعدارلاماسى اياسىندا جاسادى. «ستارتاپتى ەنگىزبەستەن بۇرىن ينكليۋزيا جانە مۋزىكالىق تەراپيا سالاسى ساراپشىلارىمەن 20-دان استام, سونداي-اق «Technovation» مەنتورى كاميلا رولان, ناريمان امانتاەۆپەن كەڭەستىك. وسى ادىستە كوپ جىلدىق تاجىريبەسى بار كانادالىق ديما تاحبۋبپەن بايلانىس ورناتتىق. كاسىبي مامان بۇل ستارتاپتىڭ تيىمدىلىگىنە نازار اۋداردى. عىلىمي جۇمىستى دايىنداۋ بارىسىندا نەيروپلاستيكا جانە كوگنيتيۆتى دامۋداعى ءرولى, ۇساق جانە ءىرى موتوريكانىڭ دامۋى, قول قيمىلىنا اسەر ەتەتىن داۋىلپاز, كلاۆيشتى-ۇرمالى ينسترۋمەنتتەر, نەيروجۇيەسى ءارتۇرلى بالالاردىڭ نازارى مەن كوڭىل كۇيىن رەتتەۋگە مۋزىكانىڭ اسەرىنە قاتىستى 50-دەن اسا عىلىمي پۋبليكاتسيالارعا شولۋ جاسالدى. بۇل ىزدەنىستەر تەكسەرىلگەن عىلىمي دەرەكتەردى تاجىريبەمەن ۇشتاستىرۋعا جانە ناقتى جاعدايدا جۇمىس ىستەيتىن ادىستەمەنى ازىرلەۋگە ىقپال ەتتى», دەيدى كاميليا.
جاس عالىمدار جوباعا كىرىسپەستەن بۇرىن اتا-انالار اراسىندا ساۋالناما جۇرگىزگەن. ناتيجەسىندە, اتا-انالاردىڭ 70 پايىزى بالالارىن جەكە تەراپيالارعا اپارۋعا مۇمكىندىگى جوق ەكەنىن, ال 85 پايىزى جەكەلەگەن ەمگە مۇقتاجدىعىن, ال 92 پايىزى ونلاين-پلاتفورمالاردىڭ قولجەتىمسىزدىگىن ايتقان.
«NeuHarmony» ادىستەمەسى نەيروپلاستيكالىق-كوگنيتيۆتى نەيروعىلىم مەن مۋزىكالىق تەراپياعا نەگىزدەلگەن. جۇيەلى مۋزىكالىق ساباقتار اسىرەسە, پرەفرونتالدى قاباتتا بالانىڭ نازارىنا جاۋاپ بەرەتىن ەستە ساقتاۋ مەن كوگنيتيۆتى يكەمدىلىگىنە, جاڭا نەيروندى بايلانىسىن بەلسەندىرۋگە ىقپال ەتەدى. اۋديتورلىق-موتورلىق ينتەگراتسيا فورتەپيانودا ويناعاندا قيمىلدىڭ دالدىگى مەن ۇيلەسىمىن جاقسارتا وتىرىپ, ميدىڭ ەستۋ جانە قوزعالىم ورتالىقتارىن بەلسەندىرىپ, سينحروندايدى. مۋزىكالىق بەلسەندىلىك پەن ريتم ءدوفاميندى قالىپقا كەلتىرىپ, قوزعالىسىن باقىلاۋ مەن زەيىنىن جاقسارتادى.
الماتى
