شەتەلدەن جۇمىس كۇشىن تارتۋعا بەرىلەتىن رۇقساتتار ءوز الدىنا بىرنەشە ساناتقا بولىنەدى. مىسالى, جوعارىداعى ءتىزىمنىڭ ىشىندە باسشىلار مەن ولاردىڭ ورىنباسارلارىنا 537 رۇقسات بەرىلگەن. بۇل – ءبىرىنشى سانات. ەكىنشى سانات بويىنشا, قۇرىلىمدىق بولىمشەلەردىڭ باسشىلارىنا 2 244 رۇقسات بەرىلىپتى. تارتىلعان شەتەل جۇمىس كۇشىنىڭ نەگىزگى بولىگى ءۇشىنشى, ءتورتىنشى ساناتتارعا تيەسىلى. مۇندا ماماندارعا, بىلىكتى جۇمىسشىلار ساناتىنداعىلارعا رۇقسات بەرىلەدى. ناقتى ساندى ايتساق, مامانداردىڭ ۇلەسى – 3 784, بىلىكتى جۇمىسشىلار – 1 271 ادام. سونداي-اق ماۋسىمدىق جۇمىستارعا 2 299 ادام, كورپوراتيۆتىك اۋىستىرۋ اياسىندا 3 970 ادام تارتىلعان.
رەسمي اقپاراتقا ۇڭىلسەك, ەلىمىزدە ناق قازىر شەتەل جۇمىس كۇشىن پايدالاناتىن
1 817 جۇمىس بەرۋشى بار. ولاردىڭ قاناتىنىڭ استىندا شەتەلدىكتەردەن بولەك, 334,4 مىڭنان استام ءوزىمىزدىڭ ەل ازاماتى جۇمىس ىستەيدى. بۇل دەگەنىڭىز, جالپى قىزمەتكەرلەر سانىنىڭ 96%-نا پارا-پار. وسىعان قاراپ, سالىستىرمالى تۇردە شەتەل جۇمىسشىلارىنىڭ ۇلەسى بىزدە از دەپ ايتۋعا بولادى.
قىزمەت تۇرلەرى جونىنەن قۇرىلىس سالاسىندا شەتەلدىكتەر كوپ. قۇرىلىستا 4 993 شەتەل ازاماتى جۇمىس ىستەسە, اۋىل, ورمان, بالىق شارۋاشىلىعىندا – 2 316 ادام, تاۋ-كەن ونەركاسىبى, كارەرلەردى قازۋ باعىتىندا – 1 235 ادام, وڭدەۋ ونەركاسىبىندە 1 155 ادام ەڭبەك ەتەدى. ەڭبەك ميگرانتتارى كەلەتىن نەگىزگى ەلدەردىڭ كوشىن قىتاي باستاپ تۇر. كورشى ەلدەن 5 604 ادام رەسمي جۇمىس ىستەۋگە كەلسە, وزبەكستاننان – 2 110 ادام, تۇركيادان – 1 036 ادام, ءۇندىستاننان – 943 ادام كەلگەن.
كوپشىلىك بىلە بەرمەس, ەڭبەك جانە حالىقتى الەۋمەتتىك قورعاۋ مينيسترلىگى ىشكى ەڭبەك نارىعىن قورعاۋ ماقساتىندا جىل سايىن رەسپۋبليكاعا شەتەل ماماندارىن تارتۋعا كۆوتا بولەدى. بىلتىر جالپى كۆوتا رەسپۋبليكاداعى جۇمىس كۇشىنىڭ سانىنا قاتىستى 0,2% مولشەرىندە, 14,8 مىڭ بىرلىك بولىپ بەلگىلەنگەن. ناۋرىز ايىنان باستاپ جەرگىلىكتى اتقارۋشى ورگانداردىڭ وتىنىمدەرىنە بايلانىستى ءمينيستردىڭ بۇيرىعىمەن كولەم 16,5 مىڭ بىرلىككە دەيىن ۇلعايعان. تامىزدا ماۋسىمدىق شەتەلدىك جۇمىسشىلاردىڭ ەڭبەك قىزمەتىن ىسكە اسىراتىن كاسىپتەر تىزبەسىنىڭ كەڭەيۋىنە بايلانىستى ءمينيستردىڭ بۇيرىعىمەن جالپى كۆوتا رەسپۋبليكاداعى جۇمىس كۇشى سانىنا قاتىستى 0,25%, 19,4 مىڭ بىرلىك مولشەرىندە بەلگىلەنىپتى. بۇگىندە وڭىرلەردىڭ قاجەتتىلىگىن ەسكەرە وتىرىپ, بۇل كۆوتا 16,7 مىڭ بىرلىككە دەيىن قىسقارىپ وتىر.
