ءماجىلىس دەپۋتاتتارى, AMANAT پارتياسى فراكتسياسىنىڭ مۇشەلەرى ايگۇل قۇسپان, سەرگەي پونومارەۆ جانە ايدوس سارىم الماتى قالاسىنىڭ تۇرعىندارىمەن كەزدەسىپ, بىرقاتار الەۋمەتتىك جانە مادەني نىسانداردى ارالادى.
ساپار اياسىندا دەپۋتات ايدوس سارىم ازاماتتاردى جەكە قابىلداپ, الەۋمەتتىك قولداۋ, تۇرعىن ءۇي قۇقىقتارى, مەديتسينالىق كومەكتىڭ قولجەتىمدىلىگى, ءدارى-دارمەكپەن قامتاماسىز ەتۋ جانە قالالىق ورتانى دامىتۋ ماسەلەلەرى بويىنشا تۇرعىنداردىڭ ءوتىنىش-تىلەكتەرىن تىڭدادى. كوتەرىلگەن ماسەلەلەردىڭ ءبىر بولىگىنە قولدانىستاعى زاڭناما اياسىندا تۇسىندىرمە بەرىلدى, ال بىرقاتارى قوسىمشا زەردەلەۋ ءۇشىن جۇمىسقا الىندى.
ءماجىلىس دەپۋتاتى سەرگەي پونومارەۆ مۇحتار اۋەزوۆ اتىنداعى قازاق ۇلتتىق دراما تەاترى عيماراتىنا بارىپ, نىساننىڭ قازىرگى جاي-كۇيىمەن جانە رەكونسترۋكتسيا بارىسىمەن تانىستى. باستاپقىدا وتكەن جىلدىڭ قاراشا ايىندا اياقتالۋى ءتيىس بولعان جوندەۋ جۇمىستارى قازىرگى ۋاقىتتا توقتاپ تۇر. ارحيتەكتۋرالىق ەسكەرتكىش سانالاتىن ءارى ۇلتتىق مادەنيەتتىڭ سيمۆولى بولىپ تابىلاتىن تەاتر بيىل 100 جىلدىق مەرەيتويىن اتاپ وتۋدە. دەپۋتات رەكونسترۋكتسيانى اياقتاۋ ماسەلەسىن رەسپۋبليكالىق دەڭگەيدە قاراۋ قاجەتتىگىن اتاپ ءوتتى.
– مۇنداي نىساندار ۇلتتىڭ مادەني كودىن قالىپتاستىرادى. ەل ءۇشىن ماڭىزى زور مەكەمەلەردىڭ ۇزاققا سوزىلعان قۇرىلىس كۇيىندە قالۋىنا جول بەرمەۋىمىز كەرەك. بۇل ماسەلە ءماجىلىس دەڭگەيىندە كوتەرىلەدى, – دەدى سەرگەي پونومارەۆ.
ال ءماجىلىس دەپۋتاتى ايگۇل قۇسپان الماتى وبلىسىنداعى ۇلتتىق قاۋىپسىزدىك كوميتەتى شەكارا قىزمەتىنىڭ تەحنيكالىق جانە كاسىپتىك وقۋ بولىمشەسىنە باردى. ول بولىمشەنىڭ ماتەريالدىق-تەحنيكالىق بازاسىن, جەكە قۇرامنىڭ قىزمەت ەتۋ جانە وقىتۋ جاعدايىن, سونداي-اق مەديتسينالىق پۋنكتتىڭ جۇمىسىن كورىپ شىقتى. كەزدەسۋ بارىسىندا سانيتارلىق بەيىندەگى مامانداردى دايارلاۋ, اسكەري قىزمەتشىلەردى تۇرعىن ۇيمەن قامتۋ جانە ۆەدومستۆوارالىق ءوزارا ءىس-قيمىل ماسەلەلەرىنە ەرەكشە نازار اۋدارىلدى.
– شەكارا قىزمەتىندە دە جابدىقتاۋ, تۇرعىن ءۇي جاعدايى, مەديتسينالىق قىزمەت كورسەتۋگە قاتىستى تۇيتكىلدەر بار ەكەنىن بىلەمىز. ولاردىڭ ءبىر بولىگى بيۋروكراتيالىق ءارى نورماتيۆتىك سيپاتتاعى ماسەلەلەر, سونداي-اق مەملەكەتتىك ورگاندار اراسىنداعى ءوزارا ءىس-قيمىلعا بايلانىستى. بۇل ماسەلەلەر شەشىمىن تابادى. ەڭ باستىسى – شەكاراشىلاردىڭ رۋحى, ءپاتريوتيزمى مەن كاسىبيلىگى, – دەپ اتاپ ءوتتى ايگۇل قۇسپان.
سونداي-اق دەپۋتاتتار ناۋرىزباي اۋدانىنداعى شۇعىلا شاعىن اۋدانىندا سالىنىپ جاتقان II ءتيپتى ءورت ءسوندىرۋ دەپوسىنىڭ قۇرىلىسىمەن تانىستى. نىسان AMANAT پارتياسىنىڭ سايلاۋالدى باعدارلاماسى اياسىندا جۇزەگە اسىرىلۋدا. جاڭا دەپو ءورت ءسوندىرۋ بولىمشەلەرىنىڭ جەتۋ ۋاقىتىن قىسقارتىپ, قارقىندى دامىپ كەلە جاتقان اۋدان تۇرعىندارىنىڭ قاۋىپسىزدىگىن ارتتىرۋعا مۇمكىندىك بەرەدى. قۇرىلىس جۇمىستارى جوسپارعا ساي جۇرگىزىلىپ جاتىر جانە 2026 جىلدىڭ سوڭىنا دەيىن اياقتالۋى ءتيىس.
دەپۋتاتتاردىڭ ايتۋىنشا, جەدەل قىزمەتتەردىڭ دايىندىق دەڭگەيى قالا تۇرعىندارىنىڭ ءومىر ساپاسى مەن جالپى قاۋىپسىزدىگىنە تىكەلەي اسەر ەتەدى.
