استانادا بالا ەمىنە دەپ اقشا جيناعان الاياق ەرلى-زايىپتىعا ۇكىم شىقتى

ەرلى-زايىپتىلارعا اسا ءىرى كولەمدە الاياقتىق جاساۋ جانە الدىن الا ءسوز بايلاسۋ ارقىلى قىلمىستىق جولمەن الىنعان اقشانى زاڭداستىرۋ باپتارى بويىنشا ايىپ تاعىلدى. پروكۋرور داۋلەت پەن تولقىن توتاقانوۆتاردى كىنالى دەپ تانىپ, ارقايسىسىن 7 جىلعا باس بوستاندىعىنان ايىرۋدى سۇرادى. ايەل ادامعا قاتىستى پروكۋرور كامەلەتكە تولماعان بالاسىنىڭ بولۋىنا بايلانىستى ۇكىمنىڭ ورىندالۋىن 2 جىلعا كەيىنگە قالدىرۋدى ۇسىندى.

بۇعان دەيىن قارجىلىق مونيتورينگ اگەنتتىگى ەرلى-زايىپتىنى ۇلىن ەمدەۋگە اقشا جيناۋ كەزىندە الاياقتىق جاسادى دەگەن كۇدىككە ىلىنگەنىن حابارلاعان. تەرگەۋ دەرەكتەرىنە سۇيەنسەك, ولار 1,3 ملرد تەڭگەدەن استام قاراجات جيناپ, ونىڭ تەك 6,4 ملن تەڭگەسىن عانا ماقساتتى تۇردە پايدالانعان. اقشا Instagram جانە Facebook جەلىلەرىندەگى بەلسەندى جارناما ارقىلى جينالعان, قاراجاتتىڭ ەداۋىر بولىگى جارنامانى ىلگەرىلەتۋگە, سونداي-اق جىلجىمايتىن م ۇلىك, كولىك ساتىپ الۋعا جانە ءباس تىگۋگە جۇمسالعان. قاجەتتى سوما جينالعانىنا قاراماستان, شەتەلدە جاسالۋى ءتيىس دەپ كورسەتىلگەن وتا ورىندالماعان, تەك سونىڭ كورىنىسى جاسالعان. تەرگەۋ باستالعاننان كەيىن ەرلى-زايىپتىلار م ۇلىكتى جاسىرۋعا ارەكەتتەنگەن, الايدا تەرگەۋ بۇل مامىلەلەردى جالعان دەپ تانىعان. 

سوت توتاقانوۆانىڭ جانە ونىڭ اناسىنىڭ ەسەپشوتتارىنا شامامەن 2,2 ملرد تەڭگە تۇسكەنىن, ونىڭ ىشىندە 1,4 ملرد تەڭگەسى قايىرىمدىلىق قاراجاتى ەكەنىن انىقتادى. ۇكىمدە سۋديا قاراجاتتىڭ تومەندەگى جىلجىمايتىن جانە جىلجىمالى م ۇلىكتەردى ساتىپ الۋعا جۇمسالعانىن كورسەتتى:

• جالپى قۇنى 47 ملن تەڭگە بولاتىن ەكى پاتەر;

• جالپى قۇنى 8 ملن تەڭگە بولاتىن جەر تەلىمدەرى;

• قۇنى 28 ملن تەڭگە بولاتىن LEXUS RX 300 اۆتوكولىگى;

• قۇنى 8,2 ملن تەڭگە بولاتىن Hyundai Santa Fe اۆتوكولىگى;

• قۇنى 15 ملن تەڭگە بولاتىن Toyota Camry 75 اۆتوكولىگى;

• Toyota Land Cruiser Prado 150 اۆتوكولىگى (باعاسى انىقتالماعان).

سونىمەن قاتار ەرلى-زايىپتى برەندتىك تاۋارلار ساتىپ الىپ, قۇمار ويىندارعا قاتىسىپ, وعان 9,7 ملن تەڭگە جۇمساعان. Facebook Ads جارناما پلاتفورماسىنىڭ قىزمەتتەرى ءۇشىن 481 ملن تەڭگە تولەپ, 349,5 ملن تەڭگە كولەمىندەگى قارىزدارىن جاپقان. سونداي-اق سوت ايىپتالۋشىلاردىڭ ارەكەتتەرىنەن قىلمىستىق جولمەن الىنعان اقشانى زاڭداستىرۋ بەلگىلەرى بار ەكەنىن اتاپ ءوتتى. تەرگەۋ دەپوزيتتىك شوتتارداعى قاراجاتتان پايىز تۇرىندە تابىس الىنعانىن دا انىقتاعان.

بالانىڭ ەمىنە بار بولعانى 6,4 ملن تەڭگە باعىتتالعان.

«توتاقانوۆتار كىنالى دەپ تانىلىپ, جازالاردى ءىشىنارا قوسۋ ارقىلى 7 جىلعا باس بوستاندىعىنان ايىرىلدى, قايىرىمدىلىق جيناۋمەن بايلانىستى قىزمەتپەن 10 جىل اينالىسۋ قۇقىعىنان ايىرىلدى, مۇلكى تاركىلەنىپ, جازاسىن ورتاشا قاۋىپسىزدىك دەڭگەيىندەگى قىلمىستىق-اتقارۋ جۇيەسى مەكەمەسىندە وتەيدى», دەلىنگەن سۋديا ۇكىمىندە.

سوت ۇكىمى ازىرگە ازىرگە زاڭدى كۇشىنە ەنگەن جوق.