فوتو: قوستاناي وبلىسىنىڭ اكىمدىگى
قوستاناي وبلىسىندا مۇگەدەكتىگى بار ادامداردى الەۋمەتتىك قولداۋعا باعىتتالعان شارالاردى قارجىلاندىرۋ كولەمى جىل سايىن ارتىپ كەلەدى. 2025 جىلى بۇل ماقساتتارعا 15 ملرد تەڭگەدەن استام قاراجات ءبولىندى, بۇل 2022 جىلعى دەڭگەيمەن (7,6 ملرد تەڭگە) سالىستىرعاندا ەكى ەسەگە كوپ.
قارجىنىڭ ەداۋىر بولىگى وڭالتۋدىڭ تەحنيكالىق قۇرالدارى مەن قىزمەتتەرىن قامتاماسىز ەتۋگە باعىتتالىپ جاتىر. اتاپ ايتقاندا, تيفلو جانە سۋردوقۇرالدارمەن, كرەسلو-اربالارمەن, پروتەزدىك-ورتوپەديالىق بۇيىمدارمەن قامتاماسىز ەتۋگە, ساناتوريالىق-كۋرورتتىق ەمدەۋگە, جەكە كومەكشى مەن ىمداۋ ءتىلى مامانىنىڭ قىزمەتتەرىنە جۇمسالاتىن شىعىندار 2022 جىلعى 3 ملرد تەڭگەدەن 2025 جىلى 7 ملرد تەڭگەگە دەيىن ءوستى.
سونىمەن قاتار, جەرگىلىكتى بيۋدجەتتەن I توپتاعى مۇگەدەكتىگى بار ادامدار مەن بالالاردى ساناتوري-كۋرورتتىق ەمدەۋ كەزىندە الىپ جۇرۋگە قوسىمشا قاراجات بولىنەدى. ينۆاتاكسي قىزمەتىن كورسەتۋ اۋماعى دا كەڭەيتىلىپ, ازاماتتاردىڭ قوزعالىسىن جەڭىلدەتىپ, الەۋمەتتىك قىزمەتتەرگە قولجەتىمدىلىك ارتا تۇسەدى.
سوڭعى ەكى جىلدا وبلىستا يپپوتەراپيا جانە مۇگەدەكتەرگە ارنالعان اربالاردى جوندەۋ قىزمەتتەرى دە ەنگىزىلدى. بۇل شارالار ءارتۇرلى پاتولوگيالارى بار بالالاردىڭ دەنساۋلىق جاعدايىن جاقسارتۋعا, سونداي-اق مۇگەدەكتىگى بار ەرەسەكتەردىڭ الەۋمەتتىك بەيىمدەلۋىنە وڭ اسەرىن تيگىزىپ جاتىر.
جاڭا وڭالتۋ ورتالىعىنىڭ اشىلۋى مەملەكەت باسشىسىنىڭ الەۋمەتتىك ينفراقۇرىلىمدى دامىتۋ جانە ازاماتتاردىڭ ءومىر ءسۇرۋ ساپاسىن ارتتىرۋ جونىندەگى تاپسىرمالارىن ىسكە اسىرۋدىڭ كەزەكتى كەزەڭى بولدى. ورتالىقتى زاماناۋي جوعارى تەحنولوگيالىق وڭالتۋ جابدىقتارىمەن جاراقتاندىرۋعا «قازاقستان حالقىنا» قوعامدىق قورى 1 ملرد تەڭگە ءبولدى. بۇعان دەيىن مۇنداي جابدىقتار نەگىزىنەن رەسپۋبليكالىق مەديتسينالىق ۇيىمدارىندا عانا تابىلىپ, ءوڭىر بالالارى ءۇشىن قولجەتىمدىلىگى شەكتەۋلى ەدى.
«96,9 مىڭنان استام ءوتىنىم قارالدى: مۇگەدەكتىكتى سىرتتاي انىقتاۋدىڭ ارتىقشىلىعى نەدە؟
ورتالىقتا بالالاردىڭ دەنساۋلىعىن نىعايتۋعا جانە الەۋمەتتىك وڭالتۋعا باعىتتالعان ارنايى الەۋمەتتىك قىزمەتتەردىڭ تولىق كەشەنى كورسەتىلەدى. ەمدىك جانە بەيىمدەلگەن دەنە شىنىقتىرۋ, مەحانو جانە ەرگوتەراپيا ساباقتارى وتكىزىلەدى, سەنسورلىق جانە ينتەراكتيۆتى زالدار, تۇزدى جانە شۋنگيتتى بولمەلەر جۇمىس ىستەيدى. سونىمەن قاتار تىرەك-قيمىل اپپاراتى, جۇرەك-قان تامىرلارى, جۇيكە جۇيەسى اۋرۋلارىن, سونداي-اق تەرى اۋرۋلارىن ەمدەۋگە ارنالعان ارنايى ۆاننالاردى قولدانۋ ارقىلى سۋ پروتسەدۋرالارى جۇرگىزىلەدى.
ەگەر بۇعان دەيىن وبلىس ورتالىعىنداعى جالعىز وڭالتۋ ورتالىعىندا (20 توسەك-ورىن) جىلىنا 400-دەن اسپايتىن بالا عانا وڭالتۋدان وتە السا, جاڭا ورتالىقتىڭ اشىلۋىمەن جىل سايىن 1,5 جاستان 18 جاسقا دەيىنگى كەمىندە 900 بالانى قامتۋ جوسپارلانىپ وتىر. وڭالتۋ كۋرسىنىڭ ۇزاقتىعى 14 كۇننەن 21 كۇنگە دەيىن ۇلعايتىلدى.
