وقيعا 7 قاڭتار كۇنى ميننەسوتا شتاتىندا بولعان. اقش-تىڭ ىشكى قاۋىپسىزدىك ءمينيسترى كريستي نوەمنىڭ رەسمي نۇسقاسىنا سايكەس, پوليتسيا قىزمەتكەرلەرى وپەراتسيادان كەيىن كەڭسەگە قايتىپ بارا جاتقاندا قىزمەتتىك كولىكتىڭ ءبىرى قارعا باتىپ قالعان. سول ساتتە اگەنتتەردى كۇنى بويى باقىلاپ جۇرگەن ءبىر توپ ادام اينالا جينالىپ, ولاردىڭ قوزعالىسىن بوگەمەك بولعان. ءمينيستردىڭ ايتۋىنشا, رەنە گۋد ءوز كولىگىن «قارۋعا اينالدىرىپ», قىزمەتكەرلەردى قاساقانا قاعۋعا ارەكەت ەتكەن. ول ءبىر ساقشىنى كولىگىمەن سوققانىن دا مالىمدەدى.
الايدا كۋاگەر تۇسىرگەن بەينەجازبادا كولىكپەن قاققان ءسات انىق كورىنبەيدى. ۆيدەودا ICE قىزمەتكەرىنىڭ جولدى بوگەپ تۇرعان كولىكتىڭ جۇرگىزۋشى ەسىگىن اشۋعا ۇمتىلعانى, كولىك قوزعالا باستاعانى, ال الدىندا تۇرعان ەكىنشى اگەنتتىڭ شەتكە ىرعىپ, سول ساتتە وق اتقانى بايقالادى.
ىشكى قاۋىپسىزدىك مينيسترلىگى بۇل ارەكەتتى «ىشكى تەرروريزم اكتىسى» دەپ باعالاپ, «پوليتسيا قىزمەتكەرى ءوز ومىرىنە, ارىپتەستەرىنىڭ جانە تۇرعىنداردىڭ قاۋىپسىزدىگىنە قاتەر تونگەندىكتەن, ءوزىن-ءوزى قورعاۋ ماقساتىندا قارۋ قولداندى» دەپ ءتۇسىندىردى.
اقش پرەزيدەنتى دونالد ترامپ تا مارقۇمنىڭ ارەكەتىن «سانالى ءارى اگرەسسيۆتى» دەپ سيپاتتاپ, پوليتسيا مەن ICE قىزمەتكەرلەرىنە راديكالدار كۇن سايىن قاۋىپ توندىرەدى دەپ مالىمدەدى.
ال ميننەاپوليس مەرى دجەيكوب فرەي فەدەرالدى بيلىكتىڭ بۇل ءۋاجىن قاتاڭ سىنعا الىپ, پوليتسيا اگەنتتەرىنىڭ قالادان كەتۋىن تالاپ ەتتى. ميننەسوتا شتاتىنىڭ گۋبەرناتورى تيم ۋولز دا فەدەرالدى ورگانداردىڭ تۇسىندىرمەسىن قابىلدامايتىنىن ايتتى.
وقيعانى فەدەرالدىق تەرگەۋ بيۋروسى زەرتتەپ جاتىر.
مارقۇمنىڭ اناسى دوننا گەندجەر قىزىنىڭ دەپورتاتسياعا قارسى ەشقانداي اكتسياعا قاتىسپاعانىن ايتتى. ال بۇرىنعى كۇيەۋىنىڭ سوزىنشە, سول كۇنى رەنە 6 جاستاعى ۇلىن مەكتەپكە اپارىپ, بىرگە تۇراتىن ازاماتىمەن ۇيىنە قايتىپ كەلە جاتقان.
رەنە گۋد ۆيردجينيا ۋنيۆەرسيتەتىن تامامداعان, ادەبيەت ماماندىعى بويىنشا ءبىلىم العان. الەۋمەتتىك جەلىلەردە ءوزىن «اقىن, جازۋشى, جار جانە انا» دەپ تانىستىرعان.
قازىر ميننەاپوليستە جانە ميننەسوتانىڭ وزگە قالالارىندا تەرگەۋ قىزمەتى مەن ترامپ اكىمشىلىگىنىڭ ساياساتىنا قارسى نارازىلىق اكتسيالارى ءوتىپ جاتىر. كەيبىر ميتينگىلەر كەزىندە ساقشىلار شەرۋشىلەرگە قارسى بۇرىش گازىن قولدانىپ, ادامداردى كۇشپەن ىعىستىرعان.
