وسى ورايدا سەناتور مەملەكەت باسشىسى قاسىم-جومارت توقاەۆتىڭ «ەڭ باستى قۇندىلىعىمىز – ادام جانە ونىڭ ەڭبەگى. مەملەكەت ءار ازاماتتىڭ ەڭبەك ەتىپ, تابىس تابۋىنا, كاسىبي تۇرعىدا دامۋىنا بارلىق جاعدايدى جاساۋعا ءتيىس», دەگەن ۇستانىمىن ەسكە سالدى.
«بۇگىندە ەڭبەك موبيلدىلىگى ورتالىقتارى جۇمىس ىزدەپ جۇرگەن ازامات پەن ناقتى جۇمىس ورىندارىنىڭ اراسىنداعى نەگىزگى كوپىرگە اينالدى. بۇل ورتالىقتار تەك كەڭەس بەرۋمەن شەكتەلمەي, ادامدارعا جاڭا مۇمكىندىكتەر اشىپ, ءومىرىن وزگەرتۋگە جانە تۇراقتى تابىس تابۋعا جول كورسەتىپ وتىر», دەدى بيبىگۇل جەكسەنباي.
كەزدەسۋ بارىسىندا سەناتور مەكەمەنىڭ قازىرگى قىزمەتىمەن تانىسىپ, ەلورداداعى جۇمىسسىزدىق جاعدايىنا قاتىستى وزەكتى اقپارات الدى.
سەناتور سوڭعى جىلدارى پارلامەنت تاراپىنان جۇمىسپەن قامتۋ جانە ەڭبەك نارىعىن دامىتۋعا باعىتتالعان بىرقاتار ماڭىزدى زاڭنامالىق وزگەرىستەر قابىلدانعانىن اتاپ ءوتتى.
«اتاپ ايتقاندا, حالىقتى جۇمىسپەن قامتۋ سالاسىنداعى زاڭناماعا ەنگىزىلگەن وزگەرىستەر ارقىلى كاسىبي وقىتۋ, قايتا دايارلاۋ جانە بىلىكتىلىكتى ارتتىرۋ تەتىكتەرى كەڭەيتىلدى. ال, جۇمىسسىز ازاماتتاردى قولداۋدىڭ قۇقىقتىق نەگىزدەرى كۇشەيتىلىپ, اتاۋلى الەۋمەتتىك كومەك پەن ۋاقىتشا جۇمىسپەن قامتۋ شارالارى جەتىلدىرىلدى. سونداي-اق, ەڭبەك رەسۋرستارىنىڭ موبيلدىلىگىن ارتتىرۋعا جانە كادر تاپشىلىعى بار وڭىرلەرگە جۇمىس كۇشىن تارتۋعا باعىتتالعان نورمالار بەكىتىلىپ, كاسىپكەرلىكتى باستاۋعا ارنالعان مەملەكەتتىك گرانتتار مەن ءوزىن-ءوزى جۇمىسپەن قامتىعان ازاماتتاردى قولداۋ تەتىكتەرى كەڭەيتىلدى. جۇمىسپەن قامتۋ سالاسىنداعى مەملەكەتتىك قىزمەتتەردى تسيفرلاندىرۋ جانە ولاردىڭ قولجەتىمدىلىگىن ارتتىرۋعا باعىتتالعان قۇقىقتىق شارالار قابىلدانىپ جاتىر», دەدى ب. جەكسەنباي.
سەناتوردىڭ ايتۋىنشا, بۇل زاڭنامالىق وزگەرىستەر ەڭبەك موبيلدىلىگى ورتالىقتارىنىڭ ءرولىن كۇشەيتىپ, ەڭبەك نارىعىن ادامعا باعدارلانعان, يكەمدى ءارى ءتيىمدى جۇيەگە اينالدىرۋعا مۇمكىندىك بەردى.
بيبىگۇل جەكسەنباي الداعى ۋاقىتتا دا ەڭبەك جانە جۇمىسپەن قامتۋ سالاسىنداعى زاڭنامانى جەتىلدىرۋدە حالىقتىڭ الەۋمەتتىك وسال توپتارىن, جاستاردى, ايەلدەردى جانە قايتا دايارلاۋدى قاجەت ەتەتىن ازاماتتاردى قولداۋعا باسىمدىق بەرىلەتىنىن جەتكىزدى.
