فوتو: rail-news.kz
ەنگىزىلگەن وگەرىستەرگە سايكەس ەندى وتاندىق كاسىپورىندارعا ەل ىشىندە تەمىرجول ارقىلى باسىم تاۋارلاردى تاسىمالداۋعا جۇمسالعان شىعىنداردىڭ 50%-نا دەيىن وتەماقى بەرىلەدى. وتەماقىنىڭ ەڭ جوعارى مولشەرى 10 مىڭ ايلىق ەسەپتىك كورسەتكىشتى (43,25 ملن تەڭگە) قۇرايدى. ونەركاسىپ جانە قۇرىلىس مينيسترلىگى بۇعان دەيىن ەلىمىزدە ىشكى تەمىرجول تاسىمالدارىن مەملەكەتتىك قولداۋ شارالارى قولدانىلماعانىن اتاپ ءوتتى.
جاڭا باستاما وندىرۋشىلەردىڭ كولىك شىعىندارىن ازايتۋعا, وتاندىق ءونىمنىڭ باسەكەگە قابىلەتتىلىگىن ارتتىرۋعا باعىتتالعان.
سونىمەن قاتار حالىقارالىق ءونىمدى سەرتيفيكاتتاۋ شىعىندارىن وتەۋ كولەمى دە بەس ەسە ۇلعايدى. بۇرىن مەملەكەت 3 000 اەك-كە دەيىن وتەماقى بەرسە, قازىر – 15 000 اەك-كە دەيىن ارتىپ, شامامەن 65 ملن تەڭگەنى قۇراپ وتىر. حالىقارالىق سەرتيفيكاتتاردىڭ بولۋى ەلدەگى كومپانيالارعا ترانسۇلتتىق قۇرىلىمداردىڭ تەندەرلىك راسىمدەرىنە قاتىسۋعا جانە ەكسپورتتىق مۇمكىندىكتەرىن كەڭەيتۋگە مۇمكىندىك بەرەدى.
توقاەۆ: قازاقستان ازيا ءۇشىن ەت ونىمدەرىنىڭ ءىرى ەكسپورتتاۋشىسى بولا الادى
سونداي-اق, «ونەركاسىپتىك-يننوۆاتسيالىق قىزمەت سۋبەكتىلەرىنىڭ ەڭبەك ونىمدىلىگىن ارتتىرۋعا باعىتتالعان ونەركاسىپتى مەملەكەتتىك ىنتالاندىرۋ شارالارىن ۇسىنۋ قاعيدالارىنا» بىرقاتار وزگەرىستەر ەنگىزىلدى. سالىق كورسەتكىشتەرى بويىنشا تالاپتار جەڭىلدەتىلدى. سوعان ساي ەندى جىل سايىنعى سالىق ءتۇسىمىنىڭ ءوسۋ شارتى جەتى جىلدان از تىركەلگەن كاسىپورىندارعا قولدانىلمايدى (بۇرىن بۇل مەرزىم ءۇش جىلدان از بولعان). بۇل جاڭا وندىرىستەردىڭ جوبالىق قۋاتقا شىعۋ مەرزىمىن ەسكەرىپ, مەملەكەتتىك قولداۋدىڭ قولجەتىمدىلىگىن ارتتىرادى.
ايتا كەتەيىك, «QazIndustry» قازاقستاندىق يندۋستريا جانە ەكسپورت ورتالىعى كاسىپورىنداردىڭ ەڭبەك ونىمدىلىگىن ارتتىرۋعا جانە ءونىمدى ىشكى نارىققا ىلگەرلەتۋگە جۇمسالعان شىعىندارىن وتەۋ بويىنشا وپەراتور. 2025 جىلدىڭ قورىتىندىسى بويىنشا ورتالىق شاعىن جانە ورتا كاسىپكەرلىك سۋبەكتىلەرىنىڭ 1 ملرد 436 ملن تەڭگەدەن استام سوماداعى شىعىندارىن وتەدى. مەملەكەتتىك قولداۋ شامامەن 60 كاسىپورىنعا كورسەتىلدى.
مەملەكەتتىك ىنتالاندىرۋ شارالارى تۋرالى تولىق اقپارات http://www.qazindustry.gov.kz رەسمي سايتىندا جاريالانادى.
