ۆەدومستۆونىڭ حابارلاۋىنشا, قىلمىستىق ءىستى ىشكى ىستەر مينيسترلىگىنىڭ وڭتۇستىك وڭىرلىك اسكەري-تەرگەۋ باسقارماسى تەرگەپ جاتىر.
«ساربازدىڭ ولىمىنە اكەلۋى مۇمكىن بارلىق سەبەپتەردى جانە ونىڭ تۋىستارى ايتقان ۋاجدەردى تەكسەرۋ ءۇشىن قاجەتتى تەرگەۋ ارەكەتتەرى جۇرگىزىلىپ جاتىر, سوت-مەديتسينالىق ساراپتامالار تاعايىندالدى. تەرگەۋ بارىسى باس اسكەري پروكۋراتۋرانىڭ باقىلاۋىندا. قىلمىستىق-پروتسەستىك كودەكستىڭ 201-بابىنا سايكەس, سوتقا دەيىنگى تەرگەپ-تەكسەرۋدىڭ وزگە مالىمەتتەرى جاريالانبايدى», دەلىنگەن حابارلامادا.
ۆەدومستۆو دەرەگىنشە, 2026 جىلعى 6 قاڭتاردا ۇلتتىق ۇلان قۇرامىنداعى 6506 اسكەري بولىمدە قىزمەت اتقارعان مەرزىمدى اسكەري قىزمەتشىنىڭ جۇرەگى توقتاعان. دارىگەرلەردىڭ ءومىرىن ساقتاپ قالۋ ارەكەتىنە قاراماستان, ول شىمكەنت قالاسىنداعى اۋرۋحانادا كوز جۇمعان. الدىن الا سەبەپ رەتىندە دارىگەرلەر «جەدەل لەيكوز» دياگنوزىن اتاعان. بۇعان دەيىن ۇلتتىق ۇلان ساربازدىڭ قايعىلى جاعدايعا دەيىن دارىگەرلەردىڭ باقىلاۋىندا بولعانىن جانە تەكسەرۋلەردەن وتكەنىن مالىمدەگەن.
ەسكە سالا كەتەيىك, 2025 جىلدىڭ سوڭىندا قاسىم-جومارت توقاەۆ اسكەر قاتارىندا ساربازداردىڭ قازا تابۋى مەن جاراقات الۋىنا جول بەرمەۋ ءۇشىن الدىن الۋ شارالارىنىڭ تيىمدىلىگىن ارتتىرۋدى تاپسىرعان. بۇعان قوسا مەملەكەت باسشىسى «Turkistan» گازەتىنە بەرگەن سۇحباتىندا «ساربازداردىڭ جاراقات الۋى مەن قازا بولۋى وركەنيەتتى ەلگە جات ءۇردىس» دەپ ايتقان ەدى.
