باس پروكۋرور لوندوندا وتكەن سامميتكە قاتىستى

استانا. 24 اقپان. پرەمەر-مينيستر كارىم ءماسىموۆ باستاعان قازاقستاندىق دەلەگاتسيانىڭ قۇرامىندا ۇلىبريتانياعا ساپارى شەڭبەرىندە باس پروكۋرور اسحات داۋىلباەۆ دۇنيەجۇزىلىك قۇقىقتىق سامميت جۇمىسىنا قاتىستى. بۇل تۋرالى باس پروكۋراتۋرانىڭ ءباسپاسوز قىزمەتى حابارلادى. فورۋمدى ەركىن ەكونوميكا مەن قۇقىقتىق ۇستەمدىكتى جىلجىتۋ ماقساتىندا قۇرىلعان ماگنا كارتا – ۇلى ەركىندىك حارتياسىنىڭ 800 جىلدىعىن مەرەكەلەۋ قۇرمەتىنە بريتاندىق بيلىك ۇيىمداستىرعان بولاتىن. فورۋم جۇمىسىنا بۇكىل الەمنىڭ مەملەكەتتىك جانە بيزنەس قۇرىلىمدارىنىڭ, ۇكىمەتتىك ەمەس ۇيىمدار مەن اكادەميالىق ورتانىڭ 2 مىڭعا جۋىق وكىلى قاتىستى. زاڭنىڭ ۇستەمدىك قۇرۋى, سوت تورەلىگىنە قولجەتىمدىلىك, تۇراقتى دامۋ, بيزنەس سالاسىنداعى حالىقارالىق داۋلار, بيزنەس جانە ادام قۇقىقتارى جانە ت.ب. ماسەلەلەر كۇن ءتارتىبىنىڭ نەگىزگى تاقىرىپتارى بولدى. فورۋمنىڭ اشىلۋ سالتاناتىندا كارىم ءماسىموۆ, اقش-تىڭ باس پروكۋرورى ەريك حولدەر, ۇلىبريتانيا ادىلەت ءمينيسترى جانە لورد-كانتسلەرى كريس گرەيلينگ, ەكونوميكالىق ىنتىماقتاستىق جانە دامۋ ۇيىمىنىڭ باس حاتشىسى انحەل گۋرريا ءسوز سويلەدى. وتىرىسقا قاتىسۋشىلارعا الداعى ونجىلدىقتا قۇقىقتىڭ ۇستەمدىك قۇرۋىن ايقىنداۋعا ىقپال ەتەتىن تەحنولوگيالار مەن شەشىمدەر, ەكونوميكالىق قىزمەت پەن حالىقارالىق ساۋدا نەگىزىندە زاڭنىڭ ۇستەمدىك قۇرۋى, كەز كەلگەن گۇلدەنگەن جانە سالاۋاتتى قوعامدا اسا ماڭىزدى مانگە يە بولاتىن زاڭ كۇشىن قولدانۋ تۋرالى, سونىمەن قاتار ولاردىڭ نەگىزىن قۇرايتىن حالىقارالىق ساۋدا مەن زاڭ سالاسىنداعى عالامدىق ۇردىستەر تۋرالى ءتۇرلى پرەزەنتاتسيالار كورسەتىلدى. سامميت بارىسىندا ا.داۋىلباەۆ شەتەلدىك ارىپتەستەرىمەن – اقش, كانادا, رۋمىنيا, تۇركيا, ومان, ءباا ادىلەت مينيسترلەرىمەن جانە باس پروكۋرورلارىمەن قىلمىستىق-قۇقىقتىق سالاداعى وزەكتى ماسەلەلەر بويىنشا ەكىجاقتى كەزدەسۋلەر وتكىزدى. اقش-تىڭ باس پروكۋرورى ە.حولدەرمەن كەزدەسۋى بارىسىندا تاراپتار ءبىر-ءبىرىن قىلمىستىق ىستەر بويىنشا ءوزارا قۇقىقتىق كومەك تۋرالى شارتتىڭ قول قويىلۋىمەن قۇتتىقتادى, سونداي-اق قۇقىقتىق سالاداعى ماڭىزدى سۇراقتاردى تالقىلادى. لوندونعا ساپارى شەڭبەرىندە اسحات داۋىلباەۆتىڭ ۇلىبريتانيانىڭ الاياقتىق قىلمىستارعا قارسى ءىس-ارەكەتتەر كەڭسەسىنىڭ ديرەكتورى دەۆيد گرينمەن كەزدەسۋى ءوتتى. كەزدەسۋ بارىسىندا ءوزارا مۇددەلىلىك تۋعىزاتىن ماسەلەلەر, ونىڭ قاتارىندا پروكۋراتۋرانىڭ قۇقىق قورعاۋ قىزمەتى, ترانسۇلتتىق ۇيىمداسقان قىلمىس, قىلمىستىق جولمەن الىنعان تابىستاردى جىلىستاتۋعا قارسى تۇرۋ بويىنشا ىنتىماقتاستىق جاساۋ, سونىمەن قاتار قازاقستاننىڭ قىلمىستىق ىستەر بويىنشا حالىقارالىق قۇقىقتىق ىنتىماقتاستىق ماسەلەلەرى جونىندەگى ەۋروپا كەڭەسىنىڭ كونۆەنتسيالارىنا قوسىلۋى, ەكىجاقتى شارتتىق-قۇقىقتىق نەگىزدى كەڭەيتۋ جانە نىعايتۋ ماسەلەلەرى تالقىلاندى. تاراپتار تەرروريزمگە قارسى ءىس-قيمىل, ۇلتتىق جانە حالىقارالىق قاۋىپسىزدىكتى قامتاماسىز ەتۋ, جەدەل اقپاراتپەن جانە جۇمىس تاجىريبەسىمەن الماسۋدىڭ شەڭبەرىندە كۇش بىرىكتىرۋدىڭ ەرەكشە وزەكتىلىگىنە توقتالىپ, ەكى ەلدىڭ اراسىنداعى قۇقىقتىق ىنتىماقتاستىقتىڭ ايتارلىقتاي الەۋەتى بار ەكەنىن اتاپ كورسەتتى. ا.داۋىلباەۆ ەكىجاقتى قارىم-قاتىناستى نىعايتۋدىڭ, ۇيىمداسقان قىلمىسقا قارسى كۇرەستە اقپارات جانە جۇمىس تاجىريبەسىن الماسۋدىڭ وزەكتىلىگىن اتاپ ءوتتى. ەكونوميكالىق قىلمىستاردى, الاياقتىقتى, قىلمىستىق جولمەن تابىلعان قاراجاتتى جىلىستاتۋ جانە ولاردى قايتارۋعا قاتىستى ەكونوميكالىق قىلمىستاردى انىقتاۋ جانە تەرگەۋ پروبلەمالارىنا ەرەكشە نازار اۋدارىلدى. تاراپتار قازىرگى زاماننىڭ قاۋىپ-قاتەرلەرىنە ءتيىمدى تۇردە توسقاۋىل قويۋ, قىلمىسپەن كۇرەستىڭ ايماقتىق ماسەلەلەرىن شەشۋدىڭ ورتاق تاسىلدەرىن ازىرلەۋ ءۇشىن ەكى ەلدىڭ قۇزىرەتتى ورگاندارى اراسىنداعى ءوزارا ءىس-قيمىلدى ودان ءارى نىعايتۋعا مۇددەلىلىك تانىتتى. جولدىباي بازار. دەرەك, سۋرەت: باس پروكۋراتۋرانىڭ ءباسپاسوز قىزمەتى.