ۇلتتىق نەيروحيرۋرگيا ورتالىعىنىڭ قىزمەتى مەن دامۋ ماقساتتارى دا اتالعان ستراتەگيالىق باعىتتارمەن تولىق ۇندەس. بۇگىندە استانا مەن ەلىمىزدىڭ بىرقاتار ءىرى قالالارى مەديتسينالىق ءتۋريزمنىڭ تارتىمدى ورتالىعىنا اينالىپ وتىر. ەلىمىزگە دياگنوستيكا مەن ساپالى ەم الۋعا كورشىلەس ەلدەرمەن قاتار, اقش پەن ەۋروپا مەملەكەتتەرىنەن دە پاتسيەنتتەردىڭ كەلۋى وتاندىق دەنساۋلىق ساقتاۋ جۇيەسىنە دەگەن حالىقارالىق سەنىمنىڭ ارتقانىن, سونداي-اق مەديتسينانىڭ باسەكەگە قابىلەتتىلىگىن كورسەتەدى.
وسى باعىتتا ۇلتتىق نەيروحيرۋرگيا ورتالىعى ناقتى ناتيجەلەرگە قول جەتكىزدى. ورتالىعىمىزدا شەتەلدەن كەلگەن 500-دەن استام ناۋقاس ەم قابىلدادى. بۇل كورسەتكىش جىل سايىن ءوسىپ كەلەدى. شەتەلدىك پاتسيەنتتەردىڭ گەوگرافياسى دا كەڭەيە ءتۇستى. ولاردىڭ قاتارىندا رەسەي, قىرعىزستان, وزبەكستان, تاجىكستان, تۇركيا, ازەربايجان, ۋكراينا, گرۋزيا, گەرمانيا, اقش, ۇلىبريتانيا, فرانتسيا, نيگەريا, كانادا, بەلارۋس ەلدەرىنىڭ ازاماتتارى بار. سونىمەن قاتار ورتالىقتا جوعارى تەحنولوگيالىق «گامما-پىشاق» راديوحيرۋرگيالىق جۇيەسى تابىستى قولدانىلادى. بۇل ءادىس باس ميىنداعى ىسىكتەر مەن تامىرلىق پاتولوگيالاردى اشىق وپەراتسياسىز, جوعارى دالدىكپەن ەمدەۋگە مۇمكىندىك بەرەدى.
بۇگىندە «گامما-پىشاق» تەحنولوگياسى ارقىلى 2200-دەن استام ناۋقاس ەم الدى. ولاردىڭ ىشىندە شەتەل ازاماتتارى, نەگىزىنەن وزبەكستان, قىرعىزستان, تاجىكستان ەلدەرىنەن كەلگەن پاتسيەنتتەر بار. بۇل دەرەكتەر ۇلتتىق نەيروحيرۋرگيا ورتالىعىنىڭ وڭىرلىك مەديتسينالىق تۋريزم ورتالىعى رەتىندەگى ماڭىزىن ايقىن كورسەتەدى. وسى باعىتتا ۇلتتىق نەيروحيرۋرگيا ورتالىعى ناقتى ناتيجەلەرگە قول جەتكىزىپ وتىر. جاقىندا ۋكراينادان پاتسيەنت ميداعى ىسىك دياگنوزىمەن ورتالىعىمىزعا جۇگىنىپ, جوعارى تەحنولوگيالىق وپەراتسيا جاساتۋعا ارنايى استانا قالاسىنا كەلدى. وپەراتسياعا دەيىن ول ورتالىق ماماندارىمەن قاشىقتان كەڭەس الىپ, دياگنوزى مەن ەمدەۋ تاكتيكاسىن جان-جاقتى تالقىلادى. ناتيجەسىندە ناۋقاسقا زاماناۋي ترانسنازالدى ءادىس ارقىلى وپەراتسيا ءساتتى جاسالدى. بۇل ءادىس ىسىكتىڭ ناقتى ورنالاسۋىن, جوعارى دالدىكتى, زاماناۋي جابدىقتى, مول كلينيكالىق تاجىريبەنى تالاپ ەتەدى, حالىقارالىق پراكتيكادا ارنايى جابدىقتالعان, كاسىبي ورتالىقتاردا عانا جۇزەگە اسىرىلادى.
مەديتسينالىق ءتۋريزمنىڭ دامۋى ەلىمىزدىڭ حالىقارالىق بەدەلىن ارتتىرىپ قانا قويماي, دەنساۋلىق ساقتاۋ سالاسىنىڭ ەكونوميكالىق الەۋەتىن كەڭەيتۋگە, جاڭا تەحنولوگيالاردى ەنگىزۋگە, مەديتسينالىق كومەكتىڭ ساپاسىن ارتتىرۋعا مۇمكىندىك بەرەدى. بۇل ءوز كەزەگىندە مەملەكەت باسشىسى اتاپ وتكەن الەۋمەتتىك قامسىزداندىرۋ جۇيەسىن نىعايتۋعا تىكەلەي ىقپال ەتەدى.
سونىمەن قاتار كەيىنگى جىلدارى مەديتسينا قىزمەتكەرلەرىنە كورسەتىلىپ وتىرعان الەۋمەتتىك قولداۋدىڭ كۇشەيۋى – سالا دامۋىنىڭ ماڭىزدى فاكتورى. ەڭبەكاقىنىڭ ارتۋى دارىگەرلەر مەن مەديتسينالىق پەرسونالدىڭ الەۋمەتتىك مارتەبەسىن كوتەرىپ, ماماندىقتىڭ بەدەلىن نىعايتتى.
ۇلتتىق نەيروحيرۋرگيا ورتالىعى الداعى ۋاقىتتا دا يننوۆاتسيالىق تەحنولوگيالاردى ەنگىزۋ, حالىقارالىق ىنتىماقتاستىقتى كەڭەيتۋ, مەديتسينالىق ءتۋريزمدى دامىتۋ ارقىلى مەملەكەت باسشىسى بەلگىلەگەن جاڭعىرۋ باعىتىن ىسكە اسىرىپ, حالىق دەنساۋلىعىن نىعايتۋ ىسىنە ۇلەس قوسا بەرمەك.
سەرىك اقشولاقوۆ,
قازاقستاننىڭ ەڭبەك ەرى, «ۇلتتىق نەيروحيرۋرگيا ورتالىعى» اق باسقارما توراعاسى, ۇعا اكادەميگى
