سولتۇستىك قازاقستاندا مۇعالىم قىزمەتىنەن شەتتەتىلدى

پەتروپاۆل. 24 اقپان. سولتۇستىك قازاقستان وبلىسى م. جۇماباەۆ اۋدانىنا قاراستى پولتاۆكا ورتا مەكتەبىنىڭ باستاۋىش سىنىپ وقۋشىلارى ەرەسەكتەرگە ارنالعان ءدارىنى ءىشۋ سالدارىنان ومىرمەن قوشتاسا جازداعان. بۇل تۋرالى egemen.kz ءتىلشىسى حابارلادى. سوندا 18 جاسقا دەيىنگى بالالار تۇتىنۋعا مۇلدەم تىيىم سالعان پرەپاراتتى ىشۋگە مۇددەلى بولعان كىم دەيسىز عوي؟ ۇستاز! وبلىستىق ىشكى ىستەر دەپارتامەنتى ءباسپاسوز قىزمەتىنىڭ جەتەكشىسى مادينا بالعاشوقوۆانىڭ ايتۋىنشا, قوعامدىق ورتانى ۇلارداي شۋلاتقان جايت 13 اقپان كۇنى ءبىلىم ءۇيىنىڭ قاق تورىندە ورىن العان. 35 جىلعا جۋىق جۇمىس ءوتىلى بار, ءوزىن-ءوزى تانۋ ءپانىنىڭ مۇعالىمى سۆەتلانا زۋبارەۆا اشىق ساباق وتكىزۋ ءۇشىن 4 سىنىپقا كەلگەن. ءسىرا, مەكتەپ ەسىگىن اشقانىنا 4 جىل عانا بولعان بالدىرعانداردىڭ الدىندا قاتتى قوبالجىسا كەرەك, «فەنازەپام» اتتى اسا كۇشتى پسيحوتروپتىق ءدارىنىڭ ءبىر تابلەتكاسىن قىلعىتىپ جىبەرگەن. سول-اق ەكەن, ۇياداعى بالاپانداي اۋىزدارىن اشىپ, وزىنە قاراي جاپا-تارماعاي ۇمتىلعان ۇرپەكباستاردى «ءتايت» دەپ زەكىپ, ساباسىنا ءتۇسىرۋدىڭ ورنىنا بىرنەشەۋىن ۇستاتا سالعان. سودان نە بولدى دەيسىز عوي؟ وقۋشىلاردىڭ ءجۇرىس-تۇرىسى باياۋلاپ, مىنەز-قۇلقىندا وزگەرىس پايدا بولعان. ونى باسقا مۇعالىمدەر كورە تۇرا ءمان بەرمەگەن. سىنىپتا وقۋشىلاردىڭ ءبىرىنىڭ باسى اينالىپ, ەندى ءبىرىنىڭ قۇسقىسى كەلگەن. كەشكە تامان پرەپاراتتى تۇگەلدەي «جۇتقان» ەكى قىز بالانىڭ دەنە قىزۋى كۇرت كوتەرىلىپ, مۇرتتاي ۇشقان. اتا-انالارى دەرەۋ دارىگەرلەردىڭ كومەگىنە جۇگىنگەن. اق حالاتتى ابزال جاندار ولاردىڭ دارىدەن ۋلانعانىن بىلىسىمەن اۋداندىق ىشكى ىستەر بولىمىنە حابارلاعان. ال, تابلەتكانى جارىم-جارتىلاي پايدالانعان ەكى وقۋشىنى پەرىشتەلەر قاققان بولۋ كەرەك. بۇگىندە س. زۋبارەۆاعا قىلمىستىق كودەكستىڭ 141-بابى بويىنشا, ءوز قىزمەتىنە سالدىر-سالاق قارادى, ادام دەنساۋلىعىنا ابايسىزدا زالال كەلتىردى دەگەن ايىپ تاعىلىپ, قىلمىستىق ءىس قوزعالعان. «تۇسىنىكسىز ءبىر كەسەل كوپتەن بەرى جانىما قاتتى باتقاندىقتان, ءوزىمدى جايسىز سەزىنەتىنمىن. دارىگەرلەر وتا جاسايمىز دەگەن سوڭ رەتسەپت بويىنشا ساتىلاتىن ءدارىنى قابىلداپ ءجۇر ەدىم. وقۋشىلار قيىلىپ سۇراعان سوڭ تىنىشتاندىرايىن دەپ بەرىپ ەدىم. ارتىنىڭ مۇنداي وقيعاعا سوقتىرارىن كىم بىلگەن؟ – دەپ وكىنىشتەن بارماعىن تىستەيدى ەكى بالانىڭ اناسى. اۋرۋحانادا جاتىپ شىققان وقۋشىلاردىڭ ءبىرىنىڭ اناسى «قىزىم اسا كۇشتى پسيحوتروپتىق ءدارىنى قابىلداۋدىڭ سالدارىنان ءالى ەسىن جيا الماي ءجۇر. كەيبىر قىلىقتارى قاراداي شوشىندىرادى. مۇگەدەك بولىپ قالسا, كىم جاۋاپ بەرەدى؟ بالا تاعدىرىنا كوز جۇما قارايتىن مۇنداي ادامداردىڭ ءبىلىم سالاسىندا جۇمىس ىستەۋگە قاقى جوق!» دەپ جانى كۇيزەلە سويلەيدى. وسىلايشا وقۋشىلارعا ءوزىن-ءوزى تانۋ پانىنەن ساباق بەرۋدىڭ ورنىنا «ءوزىن-ءوزى» باسقا قىرىنان تانىتقان پەداگوگ نەگىزگىزگى جۇمىسىنان الاستاتىلىپ, زەرتحاناشى قىزمەتىن اتقارىپ ءجۇر. ءومىر ەسقالي. دەرەك: egemen.kz. سۋرەت: skocontrol.kz.