سۋرەت: azattyq-ruhy.kz
وبلىستىق پوليتسيا دەپارتامەنتىنىڭ ءباسپاسوز قىزمەتىنەن ءمالىم ەتكەندەي, بىلتىرعى 25 جەلتوقساندا اتىراۋ قالاسىنىڭ تۇرعىنى اعاسىنىڭ وتباسى جوعالۋىنا بايلانىستى شاعىم تۇسىرگەن. الايدا جوعالعان جانداردى ىزدەستىرۋ ءىسى بىلتىرعى 29 جەلتوقساندا تىركەلگەن.
جوعالعاندار – ەرلى-زايىپتى, ولاردىڭ قىزى مەن ۇلى. وتاعاسى ماقسوت قارابالين – 1959, ايەلى ءناسىپ وتەشقاليەۆا 1961 جىلى ومىرگە كەلگەن. ەرلى-زايىپتىنىڭ 1990 جىلعى قىزى ميرامگۇل مەن 1993 جىلى تۋعان ۇلى ناۋرىزدىڭ ءۇشىنشى توپتاعى مۇگەدەكتىگى بار.
دەپارتامەنت باسشىسىنىڭ ورىنباسارى قۇتتىباي سادىقوۆتىڭ ايتۋىنشا, ەل اۋماعىنداعى ەمدەلۋ ورىندارى تەكسەرىلىپ جاتىر. ءتورت ادامنىڭ تەلەفون ءنومىرى شىمكەنت قالاسىنىڭ اۋماعىندا بايلانىسقا قوسىلعان. بىراق تورتەۋى دە ەلىمىزدىڭ شەكاراسىنان تىسقارى شىقپاعان.
ء«ىز-ءتۇزسىز جوعالعان ءتورت ادامنىڭ تۇرمىستىق جاعدايى ورتاشا بولعان. ولارعا اي سايىن زەينەتاقى مەن جاردەماقى ءتۇسىپ تۇرعان. قارجىلىق ماسەلە تۋىنداماعان», دەيدى ق.سادىقوۆ.
ونىڭ پىكىرىنشە, ولاردى ەشكىم بوپسالاماعان. ەرلى-زايىپتىلار مال ۇستاعانىمەن, سىرت كوز قىزىعاتىن باي-باقۋاتتى ەمەس. بۇل وتباسىنىڭ قىزى مەن كۇيەۋ بالاسى دا ىزدەستىرىلىپ جاتىر. ولار قاراشادا ماحامبەت اۋدانىنىڭ ماحامبەت اۋىلىنداعى ۇيىنەن شىعىپ كەتكەنى انىقتالىپتى.
«كۇيەۋ بالاسىنىڭ تۋىستارىنان ارىز تۇسكەن جوق. ول بەس بالاسىن اناسىنا تاستاپ, ايەلىن ەمدەتۋگە الىپ كەتكەن. ولاردىڭ تۇركىستان وبلىسىنداعى قاپلانبەك شەكارا بەكەتىنەن وزبەكستانعا ءوتىپ, ودان ءارى باسقا ەلگە كەتكەنى بەلگىلى بولىپ وتىر», دەدى ق.سادىقوۆ.
ءتورت ادامنىڭ حابار-وشارسىز كەتكەنى جۇرتشىلىقتى الاڭداتتى. ءبارى دە ولاردىڭ ىستىق ۇياسىنا امان ورالۋىن تىلەدى. الايدا سەيسەنبىدە ەرلى-زايىپتىنىڭ مۇردەسى تابىلدى. بۇل دەرەكتى وبلىستىق پوليتسيا دەپارتامەنتىنىڭ باسشىسى نۇرحات ورازباەۆ راستادى.
«اتالعان دەرەككە قاتىستى ادام ءولتىرۋ بەلگىلەرىمەن قىلمىستىق ءىس قوزعالدى. كۇدىكتىلەردىڭ جەكە باسى انىقتالدى. قازىر كۇدىكتىلەردى تابۋ, ۇستاۋ ماقساتىندا ءتيىستى جەدەل-ىزدەستىرۋ ءىس-شارالارى جۇرگىزىلىپ جاتىر», دەپ مالىمدەدى ن.ورازباەۆ.
ونىڭ ايتۋىنا قاراعاندا, جوعالعانداردىڭ ەكەۋى ءالى تابىلعان جوق. ولاردىڭ جۇرگەن جەرىن انىقتاۋعا قاتىستى ىزدەستىرۋ جالعاسا بەرەدى.
اتىراۋ وبلىسى
