قالا تۇرعىندارى الەۋمەتتىك جەلىلەردە جازبا جاريالاپ, ىقتيمال سەبەپتەر مەن جاۋاپتى تاراپتاردى تالقىلاۋدا. كوپشىلىگى اۋانىڭ اۋىرلاپ كەتكەنىن, كەيبىر ادامدارعا تىنىس الۋ قيىنداعانىن ايتىپ شاعىمدانعان.
بۇل جاعداي ەكولوگ-بەلسەندىلەردىڭ دە الاڭداۋشىلىعىن تۋعىزدى. قورشاعان ورتانى قورعاۋ ماسەلەسىن ءجيى كوتەرىپ جۇرگەن ەكواكتيۆيست سەرگەي ەفرەموۆ وقيعانىڭ ارتىندا ادام فاكتورى تۇرۋى مۇمكىن ەكەنىن اتاپ ءوتتى.
– تەرەزە اشۋ مۇمكىن ەمەس, بىردەن جوتەل قىسادى, بالالار كوزىمىز اشيدى دەپ شاعىمدانادى. دەم الۋ قيىن, مۇرىن قىشيدى. قالادا تۇمان تۇرعان ساتتەردە كەيبىر كاسىپورىندار گازدى ادەيى شىعارىپ جىبەرۋى مۇمكىن دەپ ويلايمىن, – دەدى ول.
قالا تۇرعىندارىنىڭ شاعىمىنان كەيىن ەكولوگتار كەزەكتى تەكسەرۋ جۇرگىزدى. ساراپتاما قورىتىندىسى اۋا قۇرامىندا قاۋىپتى قوسپالاردىڭ جوق ەكەنىن, بارلىق كورسەتكىش بەلگىلەنگەن شەكتى مولشەردەن اسپاعانىن كورسەتتى.
شىمكەنت قالالىق ەكولوگيا دەپارتامەنتىنىڭ باسشىسى ەرماحان قوزىباەۆتىڭ ايتۋىنشا, ءيىس سەزىلۋى مۇمكىن, الايدا ول ادام دەنساۋلىعىنا زيان كەلتىرەتىن دەڭگەيدەن اسپاۋى ىقتيمال.
– ءيىس بولۋى مۇمكىن, بىراق ول شەكتى رۇقسات ەتىلگەن كونتسەنتراتسيادان اسپاۋى مۇمكىن. ەگەر نورما بۇزىلماسا, دەنساۋلىققا زيان جوق دەپ ەسەپتەلەدى. بۇگىن دەپارتامەنت ماماندارى دا شىعىپ, اۋا قۇرامىن تەكسەردى. قازىرگى ۋاقىتتا ەشقانداي اسىپ كەتۋ تىركەلگەن جوق, – دەدى ول.
سونىمەن قاتار BAITAQ پارتياسىنىڭ وكىلدەرى قالاداعى اۋا ساپاسىن ۋاكىلەتتى ورگاندارمەن بىرگە تالقىلادى. پارتيا مۇشەلەرىنىڭ پىكىرىنشە, مامانداردىڭ كاسىپورىنداردى جەدەل تەكسەرۋگە وكىلەتتىگى جەتكىلىكسىز.
– زاڭناماعا وزگەرىس ەنگىزىپ, ۋاكىلەتتى ورگانداردىڭ ءرولىن كۇشەيتۋ قاجەت. قورشاعان ورتانى قورعاۋ ماسەلەسى باسىمدىققا يە بولۋى ءتيىس. جاۋاپتى قۇرىلىمداردا پوليتسيا سياقتى جەدەل ارەكەت ەتىپ, بىردەن تەكسەرۋ جۇرگىزۋگە مۇمكىندىك بولۋى كەرەك, – دەدى پارتيانىڭ شىمكەنت قالالىق فيليالىنىڭ توراعاسى التاي وردابەكوۆ.
وتكەن جىلى ەكولوگيا دەپارتامەنتى 30-دان استام كاسىپورىندى تەكسەرگەن. انىقتالعان زاڭبۇزۋشىلىقتار ءۇشىن جالپى سوماسى 40 ميلليون تەڭگەدەن اساتىن ايىپپۇل سالىندى. سەگىز ۇيىمنىڭ قىزمەتى ۋاقىتشا توقتاتىلعان. الايدا جاعىمسىز ءيىستىڭ ناقتى سەبەبى مەن ونى شەشۋ جولى ءالى دە بەلگىسىز بولىپ وتىر.
