قىسقى دەمالىس كەزىندە كامەلەتكە تولماعاندار تاراپىنان قۇقىق بۇزۋشىلىقتاردىڭ الدىن الۋ, ولاردىڭ قۇقىقتارى مەن زاڭدى مۇددەلەرىن قورعاۋ ماقساتىندا 2025 جىلعى 29 جەلتوقساننان 2026 جىلعى 7 قاڭتارعا دەيىن باتىس قازاقستان وبلىسى اۋماعىندا «دەمالىس» جەدەل-پروفيلاكتيكالىق ءىس-شاراسى وتكەن بولاتىن. وسى ءىس-شارا بارىسىندا پوليتسيا قىزمەتكەرلەرى كامەلەتكە تولماعانداردىڭ قاراۋسىز, تۇنگى ۋاقىتتا زاڭدى وكىلسىز جۇرۋىنە جانە الكوگول ونىمدەرىن ساتۋ تالاپتارىن بۇزۋى فاكتىلەرىن انىقتاۋعا باعىتتالعان كەشەندى پروفيلاكتيكالىق جانە باقىلاۋ شارالارىن وتكىزدى.
ون كۇنگە سوزىلعان ءىس-شارانىڭ قورىتىندىسى بويىنشا ىشكى ىستەر ورگاندارىنا كامەلەتكە تولماعان 130 بالا جەتكىزىلگەن. ولاردىڭ 126-سى – اكىمشىلىك قۇقىق بۇزۋشىلىق جاساعانى ءۇشىن, ال 4-ءۋى – قاراۋسىز جانە بەيبەرەكەت جۇرگەنى ءۇشىن ايىپتالدى.
ء«بىز بۇل بالالاردىڭ ۇشەۋىن اداپتاتسيالىق ورتالىققا ورنالاستىردىق. جالپى ءىس-شارا بارىسىندا 205 اكىمشىلىك قۇقىق بۇزۋشىلىق انىقتالدى. ونىڭ ىشىندە اتا-انالاردىڭ نەمەسە زاڭدى وكىلدەردىڭ تاربيەلىك مىندەتتەرىن ورىنداماعان 15 وقيعا, تۇنگى ۋاقىتتا ويىن-ساۋىق ورىندارىندا بولعان 8 بالا انىقتالدى. الكوگول ونىمدەرىن ساتۋ تالاپتارى 5 رەت بۇزىلدى. قوعامدىق ورىندا ىشىمدىك ءىشىپ, ماس كۇيىندە جۇرگەن ادام قاماۋعا الىندى. وسى كەزەڭدە 176 بالا تۇنگى ۋاقىتتا زاڭدى وكىلسىز نەمەسە تۇرعىنجايدان تىس جەردە بولعانى انىقتالدى», دەيدى وبلىستىق پوليتسيا دەپارتامەنتى ءباسپاسوز قىزمەتىنىڭ جەتەكشىسى نۇرجان قۋانعاليەۆ.
بۇگىندە پوليتسيانىڭ ارنايى پروفيلاكتيكالىق ەسەبىنە جاڭادان الەۋمەتتىك جاعدايى ناشار 5 وتباسى قوسىلعان. بۇعان دەيىن پروفيلاكتيكالىق ەسەپتە تۇرعان 235 وتباسى جانە تىزىمدىك ەسەپتە تۇرعان كامەلەتكە تولماعان 155 بالا تەكسەرىلگەن.
